Read Central Bicolano Jeremiah 52 Bible Online

Jeremiah 52 - Central Bicolano bible

Jeremiah 52

¹Beynte y unong taon an edad ni Zedekias kan siya magin hade sa Juda, asin onseng taon siyang naghade sa Jerusalem. An saiyang ina iyo si Hamutal na aki ni Jeremias na taga Libna.

²Ginibo niya an maraot sa atubang nin Kagurangnan, sosog sa gabos na ginibo ni Jehoiakim.

³An Kagurangnan naanggot sa Jerusalem saka sa Juda kaya isinikwal niya sinda. Nagrebelde si Zedekias ki Hadeng Nebukadnezzar nin Babilonia,

⁴kaya nag-abot si Nebukadnezzar kaiba an bilog niyang hukbo dangan sinalakay an Jerusalem kan ikasampolong aldaw kan ikasampolong bulan kan ikasiyam na taon kan paghahade ni Zedekias. Nagkampo sinda sa luwas kan syudad, nagtugdok nin panlaom na mga kudal sa palibot kaiyan,

⁵asin padagos na linaom an syudad sagkod kan ikaonseng taon kan paghahade ni Zedekias.

⁶Kan ikasiyam na aldaw kan ikaapat na bulan kan taon na idto, kan makuri na an gutom sa syudad, mala ta mayo na nin nakakakan an mga tawo,

⁷nalagbas an mga kudal kan syudad. Maski napalibotan kan mga taga Babilonia an syudad, nakadulag pagkabanggi an gabos na soldados ni Zedekias. Nag-agi sinda sa trangkahan na nasa duwang kudal, na harani sa tatamnan kan hade. Nagdulag sinda pasiring sa Araba.

⁸Alagad si Hadeng Zedekias linamag kan hukbo kan Babilonia asin inabotan sa kapatagan nin Jerico. Binayaan si Zedekias kan gabos niyang soldados.

⁹Binihag ninda si Zedekias dangan dinara ki Hadeng Nebukadnezzar, na yaon kaidto sa Ribla, sa teritoryo nin Hamat, asin duman itinao saiya ni Nebukadnezzar an maninigong padusa.

¹⁰Duman sa Ribla, ginadan ni Hadeng Nebukadnezzar an mga aking lalaki ni Zedekias mantang naghihiling ini. Ginadan man niya an mga opisyal nin Juda.

¹¹Pakatapos, ipinahulwat niya an mga mata ni Zedekias, pinakadenahan saka ipinadara sa Babilon. Nagdanay si Zedekias sa bilanggoan sa Babilon sagkod sa aldaw nin saiyang pagkagadan.

¹²Kan ikasampolong aldaw kan ikalimang bulan, kan ika dyes y nuebeng taon kan paghahade ni Nebukadnezzar sa Babilonia, luminaog sa Jerusalem si Nebuzaradan, an parahatol kan hade asin pamayo kan saiyang hukbo.

¹³Sinulo niya an Templo, an palasyo, asin an mga harong kan gabos na mahalagang tawo sa Jerusalem.

¹⁴An mga kudal sa palibot kan Jerusalem ginaba kan mga soldados ni Nebuzaradan.

¹⁵Binihag ni Nebuzaradan an mga tawong nawalat sa syudad, an natatadang ekspertong mga trabahador, asin an mga nag-apil sa hade nin Babilonia.

¹⁶Alagad iwinalat niya sa Juda an nagkapira sa pinakadukha na mayo nin sadiring rogaring, tanganing nagtanom nin ubas saka magtrabaho sa daga.

¹⁷Rinonot kan mga taga Babilonia an mga bronseng harigi, an mga kariton sa Templo, asin an dakulang bronseng tangke, dangan dinara ninda sa Babilon an gabos na bronse.

¹⁸Kinua ninda an mga kaldero, mga pala, mga pamalsok nin mitsa, mga palanggana, mga mangko para sa insenso, asin an gabos na kagamitan na bronse na ginagamit sa Templo.

¹⁹Kinua ninda an lambang kagamitan na gibo sa bulawan saka sa plata; sagkod an saradit na mangko, an mga bugtakan nin baga, an mga palanggana, an mga lalagan kan abo, an mga kandelero, an mga mangko para sa insenso, saka an mga mangko para sa dolot na arak.

²⁰Magabat nin marahay an mga harigi, mga bronseng kariton saka an dakulang bronseng tangke na ipinagibo ni Hadeng Solomon para sa Templo, kaya dai na tinimbang an mga ini.

²¹Magkapareho an duwang harigi: an lambang saro igwa nin langkaw na otso metros saka singko metros may treynta sentimetros an palibot. Dai ini nin laog sa tahaw, asin setenta y singko milimetros an hibog kan metal. Sa ibabaw kan lambang harigi igwa nin bronseng kapitel na duwang metros may beynte sentimetros an langkaw. Nakasabod sa lambang kapitel an sarong bronseng sinalapid na kadena na sinamnohan nin bronseng mga granada.

²³Igwa nin sanggatos na granada an sinalapid na kadena kan lambang harigi, alagad nobenta y seis sana an nahihiling hale sa daga.

²⁴Laen pa kaini, binihag ni Nebuzaradan na pamayong opisyal kan hukbo kan hade, si Seraias na halangkaw na padi, si Sofonias na ikaduwang padi, asin an tolong bantay sa Templo.

²⁵Kinua man niya sa syudad an sarong opisyal na namamahala kan hukbo, an pito sa mga personal na parahatol kan hade na yaon pa sa syudad, an sekretaryo kan pamayo kan hukbo, na iyo an namamahala kan mga kasuratan kan hukbo, asin sesenta pang lalaki.

²⁶Dinara sinda ni Nebuzaradan sa hade nin Babilonia, na yaon kaidto sa Ribla,

²⁷sa teritoryo nin Hamat. Duman sa Ribla, ipinahampak sinda kan hade saka ipinagadan. Kaya dinarang bihag an mga taga Juda sa luwas kan saindang daga.

²⁸Iyo ini an bilang kan mga tawong binihag ni Nebukadnezzar: kan ikapitong taon nin saiyang paghahade, binihag niya an tres mil beynte tres na Judio;

²⁹kan ikadyes y otsong taon nin saiyang paghahade, binihag niya hale sa Jerusalem an otso syentos treynta y dos katawo;

³⁰kan ikabeynte y tres na taon nin saiyang paghahade, binihag ni Nebuzaradan, an syete syentos kwarenta y singkong Judio. An kabilogan na bilang kan mga binihag uminabot sa kwatro mil seis syentos katawo.

³¹Kan taon nin pagtukaw ni Evil-merodak bilang hade nin Babilonia, may pagkaherak na tinalingkasan niya si Hadeng Jehoiakin nin Juda, sa paagi nin pagpaluwas saiya sa bilanggoan. Nangyari ini kan ikabeynte y singkong aldaw kan ikadoseng bulan kan ikatreynta y syeteng taon nin pagkabihag ki Jehoiakin.

³²Pinahilingan niya nin karahayan si Jehoiakin saka tinawan nin mas halangkaw na katongdan ki sa katongdan kan mga hadeng kaiba niya na itinapok man sa Babilonia.

³³Tinugotan si Jehoiakin na maggubing kan bakong sa bilanggo saka magkakan sa lamesa kan hade mantang siya nabubuhay.

³⁴Aroaldaw, an saiyang mga kaipuhan itinao saiya kan hade sagkod sa aldaw nin saiyang pagkagadan.