Read Central Bicolano Lamentations 1 Bible Online

Lamentations 1 - Central Bicolano bible

Lamentations 1

¹Mapungaw na nagtutukaw an Jerusalem, na dating pano nin mga tawo! Dakula siya kaidto sa gabos na nasyon, ngunyan arog na sa sarong babaeng balo! Kaidto saro siyang prinsesa sa tahaw nin mga syudad, ngunyan saro nang oripon.

²Naghihibi siya bilog na banggi, mga luha nagbubulos sa saiyang pisngi. Sa kadakul na namomoot saiya, mayo na ni sarong minaranga; mga katood niya nagpasaluib saiya asin gabos nagin kaiwal niya.

³An mga taga Juda nagin makaheherak na mga oripon, na pirit na pinahale sa saindang harong. Nag-eerok sinda ngunyan sa mga dagang dayuhan, mayong nakukuang mapapahingaloan. Napapalibotan siya nin mga kaiwal mantang nasa makuring kasakitan.

⁴Nagmomondo an mga dalan pasiring sa Sion huli ta mayong minadalaw para sa mga talaan na pyesta; mapungaw an saiyang mga trangkahan, nag-aagrangay an saiyang kapadian; ginuyod sa harayo an saiyang mga daraga, asin siya mismo nagtitios nin kapaitan.

⁵Mga kaiwal an nagsakop saiya, nagin mauswag an mga kalaban niya; pinasakitan siya nin Kagurangnan huli kan dakul niyang mga kasalan. Nagharale an saiyang kaakian, binihag kan mga kaiwal.

⁶Nawara na an kamurawayan nin Jerusalem. An saiyang mga lider garong mga usa na sa kagutoman pinanluluya, mayo nin kosog na minadulag sinda sa mga paraayam.

⁷Sa aldaw nin saiyang kasakitan saka kapaitan, nagigiromdoman nin Jerusalem an mahalagang mga bagay na sadiri niya kaidto. Kan mahulog siya sa kamot kan kaiwal, asin mayo sa saiya nin nagtabang; pinagtuyatuya siya kan kaiwal, nginisihan an saiyang pagkarumpag.

⁸An Jerusalem nagkasala nin makuri, kaya siya nagin maati. Ikinakauyam siya ngunyan kan gabos na dating nag-omaw saiya, huli ta nahiling ninda an saiyang pagkanihuba; nag-aagrangay siya asin nagtatahob kan saiyang lalawogon.

⁹An saiyang ati madaling nahiling; alagad dai niya pinahalagahan an saiyang kataposan. Mangirhat an saiyang pagkarumpag; mayo nin pwedeng magranga saiya. Nanggana an saiyang mga kaiwal, asin naghahagad siya nin pagkaherak sa Kagurangnan.

¹⁰Sinamsam kan kaiwal an gabos niyang kayamanan. Nahiling niya an paglaog kan mga kaiwal sa saiyang Templo, an lugar na ipinangalad nin Kagurangnan na laogon nin mga pagano.

¹¹Nag-aagrangay an saiyang banwaan mantang naghahanap nin pagkakan; an kayamanan ninda iriniribay nin tinapay tanganing padagos sindang mabuhay. “Hilinga ako, Kagurangnan,” an sabi kan syudad; “hilinga ako sa sakong kasakitan!”

¹²“Kamo na mga nag-aagi, mayo daw nin halaga ini saindo? Hilinga kun igwa nin kamondoan arog kan sakuyang kamondoan, na dinadara sako nin Kagurangnan kan aldaw nin labi-labi niyang kaanggotan.

¹³“Hale sa itaas nagpadara siya nin kalayo, na nag-irarom sagkod sa mga tolang ko. Nagbugtak siya nin siod para sa sakong mga bitis, dangan binayaan niya ako; binayaan na namumungnan, nakukulogan sa bilog na aldaw.

¹⁴“Itinala niya an sakong mga kasalan dangan iginakod sa sarong sakal, na ibinugtak sa sakuyang abaga, na nagin dahelan kan sakong panluluya. Itinao ako nin Kagurangnan sa kamot kan mga kaiwal, na dai ko kayang labanan.

¹⁵“Nginisihan nin Kagurangnan an makokosog kong mga soldados. Sarong hukbo an inatubang niya sako tanganing ronoton an mga hoben kong lalaki. Siring sa mga ubas, an aking daraga nin Juda tinimaktimakan nin Kagurangnan.

¹⁶“Huli kaini ako naghihibi; mga mata ko nagbubulos nin luha. Mayo nin minaranga sako; mayo nin pwedeng magpakosog kan boot ko. Nagmomondo an sakong kaakian huli ta nadaog ako kan kaiwal.

¹⁷“Iginawagaw ko an sakong mga kamot alagad mayo nin minatabang sako. Hale sa manlaen-laen na lugar inapod nin Kagurangnan an sakong mga kaiwal; an paghiling ninda sako sarong maati na bagay.

¹⁸“Alagad tama an Kagurangnan, huli ta dai ko siya kinuyog. Dangoga nindo ako, kamo gabos na banwaan, asin hilinga an sakong kasakitan; an gabos kong mga hoben na lalaki asin babae napaduman sa pagkabihag.

¹⁹“Inapodan ko an mga namomoot sako, alagad dinaya ninda ako. An mga padi asin mga lider nagkagaradan sa mga tinampo kan syudad, mantang naghahanap nin pagkakan tanganing padagos na mabuhay.

²⁰“Hilinga, Kagurangnan, an sakuyang kasakitan; an kalag ko nasa kahorasaan. Ronot na an sakuyang puso huli kan sakong mga kasalan. Igwa nin garadanan sa mga tinampo; minsan sa laog nin harong an kagadanan yaon man.

²¹“Dangoga an sakong inagrangay; mayo nin nagraranga sako. Naoogma an mga kaiwal ko kan madangog an mga kasakitan na ipinadara mo sako. Paabota na an aldaw na saimong panuga, asin arog sako pasakitan mo man an mga kaiwal ko.

²²“Kondenara sinda huli kan saindang mga karatan, siring na pinadusahan mo ako huli kan sakong mga kasalan. Minaagrangay ako sa kasakitan, asin pinanluluya an sakuyang puso.”