Read Central Bicolano Lamentations 2 Bible Online

Lamentations 2 - Central Bicolano bible

Lamentations 2

¹Sa kaanggotan nin Kagurangnan tinahoban niya an Sion nin kadikloman. Rinumpag niya an langitnon na kamurawayan nin Israel. Sa aldaw nin saiyang kaanggotan binayaan niya maski an saiyang Templo.

²Mayo nin pagkaherak na rinaot nin Kagurangnan an lambang harong sa Juda; sa kaanggotan rinumpag niya an mga bantayan nin depensa kan daga. Dinarahan niya nin kasosopgan an kahadean asin an mga namamayo kaiyan.

³Sa labi-labing kaanggotan, rinonot niya an kosog nin Israel; sa atubang kan kaiwal, dai niya kami tinabangan. An kaanggotan niya samo siring sa kalayo na minaraot kan gabos.

⁴Arog sa kaiwal, an saiyang mga bosog ihinimunta niya samo; ginadan niya an gabos na nakakapaogma samo. An saiyang labi-labing kaanggotan namatean nyamo digdi sa Jerusalem.

⁵Arog sa sarong kaiwal, rinaot nin Kagurangnan an Israel. Rinaot niya an mga palasyo saka an mga bantayan; an kamondoan asin an panambitan kan mga taga Juda saiya pang dinagdagan.

⁶Rinaot niya an Templo, an lugar na pinagsasambahan mi saiya. Hinale niya an mga pyesta asin an Sabbath. Ipinamate niya sa hade asin sa padi an kosog kan saiyang kaanggotan.

⁷Isinikwal nin Kagurangnan an saiyang altar asin binayaan an saiyang banal na Templo. An mga kudal kaini itinugot niyang rumpagon kan mga kaiwal, na nagkurahaw sa kapangganahan sa lugar na pinagsambahan mi kaidto.

⁸Kabotan nin Kagurangnan na marumpag an mga kudal nin Sion; sinukol niya iyan tanganing maraot nanggad an gabos. An mga tore saka an mga kudal gabos rumpag na ngunyan.

⁹An mga trangkahan natahoban na kan mga gaba; bari asin ronot na an mga barat kan mga iyan. Nabihag na an hade asin an mga prinsipe; mayo na an Katogonan. An mga propeta dai na nagkakaigwa nin mga bisyon hale sa Kagurangnan.

¹⁰An mga kamagurangan nin Jerusalem mayong ribok na nagtutukaw sa daga; nagbugtak sinda nin abo sa payo, asin sa pagmondo naggubing nin sako. An mga daraga nin Jerusalem nagduko na kan saindang mga payo sa daga.

¹¹Hubag na an mga mata ko sa kahihibi; napupurisaw an kalag ko. Makuri an kamondoan kan puso ko huli sa pagkagadan kan sakuyang banwaan, huli ta nagkakadirismayo an mga aki saka mga omboy sa mga tinampo kan syudad.

¹²Gutom saka paha, nag-aagrangay sinda sa saindang mga ina; nadidismayo sinda sa mga tinampo na garong nagkarulugadan, asin luway-luway na nagagadan sa kamot kan saindang mga ina.

¹³O Jerusalem, ano an masasabi ko para saimo? Saen taka ikakabaing, tanganing ika sakuyang maranga? An pagkarumpag mo arog kahiwas kan kadagatan; siisay an makakahirahay saimo?

¹⁴An saimong mga propeta mayong sinabi saimo kundi kaputikan; dai ninda ihinayag an saimong kasalan tanganing dai ka makabalik sa dati mong kamugtakan, kundi pinatubod kang an pagsolsol dai na kaipuhan.

¹⁵Pinag-oolog-olog ka kan mga nag-aaragi; pinagtutuyatuya asin pinagngingisihan ninda an rumpag nang Jerusalem: “Iyo ini an magayon na syudad kaidto? Iyo ini an kaogmahan kan kinaban?”

¹⁶An gabos mong kaiwal nag-olog-olog saimo nagtutuyatuya, asin nagpaparagot nin ngipon mantang nagkukurahaw, “Narumpag mi siya! Iyo ini an aldaw na satong pinagparahalat!”

¹⁷Ginibo mananggad nin Kagurangnan an saiyang itinaram na gigibohon; mayo nin pagkaherak na rinaot niya kita, siring kan ipinatakot niya kaidto. Pinapanggana niya an satong mga kaiwal, pinaogma sa satong pagbagsak.

¹⁸O Jerusalem, pag-agrangay sa Kagurangnan! Aldaw-banggi na pabuloson mo an saimong mga luha arog sa salog; hare pag-ontok sa paghaya saka sa pagmondo!

¹⁹Sa bilog na banggi magtindog ka asin mag-apod sa Kagurangnan; siring sa tubig, iula mo an saimong puso sa atubangan nin Kagurangnan! Makimaherak ka para sa saimong mga aki na nadidismayo sa gutom sa lambang kanto kan tinampo.

²⁰Hilinga, Kagurangnan! Hilinga kun siisay an saimong pinapadusahan! Dapat daw na kakanon kan mga ina an mga aki na saindang namomotan? Dapat daw na an mga padi saka mga propeta sa Templo mismo gadanon?

²¹Nahuhutad sa mga tinampo an bangkay kan mga hoben saka mga gurang; mga hoben na lalaki asin babae nagkagaradan sa espada kan mga kaiwal; mayo nin pagkaherak na ginadan mo sinda sa aldaw nin saimong kaanggotan.

²²Inalok mo an mga kaiwal ko na magselebrar nin sarong pyesta nin takot sa palibot ko. Sa aldaw nin saimong kaanggotan, mayo nin nakadulag o natadang buhay. Ginadan ninda an sakong mga aki, na sakong pinadakula asin namotan.