Read Central Bicolano Lamentations 3 Bible Online

Lamentations 3 - Central Bicolano bible

Lamentations 3

¹Ako an tawo na nakakaaram kun ano an mapadusahan nin Dios.

²Padagos na inalaw niya ako pasiring sa kadikloman

³asin mayong herak niya akong hinampak sa bilog na aldaw.

⁴Linugad niya an sakong laman, asin rinonot an sakong mga tolang.

⁵Sinalakay niya ako asin ibinilanggo sa kapaitan asin sa kasakitan.

⁶Pinaerok niya ako sa kadikloman arog sa sarong tawong haloy nang gadan.

⁷Magabat na kadena an iginapos niya sako; saro akong bilanggo na mayong paglaom na makadulag.

⁸Maski nag-aapod ako sa paghagad nin tabang, alagad habo niya akong dangogon;

⁹nagsasayasay ako sa sakong paglakaw; inolangan niya nin darakulang gapo an sakong aagihan.

¹⁰Hinipaan niya ako siring sa sarong oso, siring sa sarong leon na nagtatago.

¹¹Isinuhay niya ako sa sakong dalan, rinonot dangan binayaan;

¹²biningat niya an saiyang pana asin ako an ginibo niyang patamaan.

¹³An saiyang mga bosog tuminadom sa sakong puso.

¹⁴Nagin ngingisihan ako kan gabos na banwaan; bilog na aldaw, ako an nagin saindang subahan.

¹⁵Mapait na pagtios an itinao niya sakong pagkakan saka inomon.

¹⁶Ilinampaso niya sa daga an sakong lalawogon asin rinonot niya sa kagapoan an sakong mga ngipon.

¹⁷An sakong kalag mayo nin katoninongan; lingaw ko na kun ano an kaogmahan.

¹⁸Kaya ako minataram, “Mayo na an sakong kamurawayan asin paglaom sa Kagurangnan.”

¹⁹An giromdom kan sakong kulog, sakong paglalagalag, sarong mapait na hudong.

²⁰Danay ko iyan na naroromdoman, asin nagmomondo an sakong kalag.

²¹Alagad minabalik an paglaom kun naroromdoman ko an bagay na ini:

²²Mayo nin kataposan an pagkamoot asin an pagkaherak nin Kagurangnan,

²³danay na bago iyan siring sa kaagahon, masasarigan siring sa pagsirang kan aldaw.

²⁴Minasabi an kalag ko, “An Kagurangnan iyo an sakong kahirasan, kaya sa saiya ako minalaom.”

²⁵An Kagurangnan marahay sa nagsasarig asin naghahanap saiya.

²⁶Kaya marahay para sa sato an maghalat na may pakatios— an maghalat sa saiya tanganing iligtas kita—

²⁷asin marahay an makanood kaining pakatios mantang hoben pa kita.

²⁸Kun kita nagtitios, dapat na solo sana, kitang magtukaw asin dai maggirong.

²⁹Mapakumbabang magduko kita, huli ta tibaad igwa pa nin paglaom.

³⁰Maski sinampaling asin ininsulto dapat akoon nyato iyan gabos.

³¹An Kagurangnan maheherakon asin dai nagsisikwal sagkod lamang.

³²Pwedeng darahan niya kita nin kamondoan, alagad an pagkamoot niya sato makusog asin masasarigan.

³³An pagpapasakit o an pagpapamondo sato dai niya nawiwilihan.

³⁴Naaaraman nin Kagurangnan kun nagtios an satong mga espiritu sa bilanggoan,

³⁵kun isinasayuma an itinao niya satong mga deretso, iyan saiyang naaaraman;

³⁶kun an hustisya binibiko sa hukoman, iyan saiyang naaaraman.

³⁷Mayo nin siisay man na nakapagboot asin nakagibo nin anoman kun bakong huli sa kabotan nin Kagurangnan.

³⁸Nangyayari an marahay asin an maraot huli sana sa saiyang pagboot.

³⁹Tano ta magrereklamo an tawo kun pinapadusahan an saiyang mga kasalan?

⁴⁰Siyasaton ta an satong mga gawe asin magbalik kita sa Kagurangnan.

⁴¹Bukasan ta an satong puso sa Dios na nasa langit asin mamibi kita,

⁴²“Nagkasala kami saka nagtumang, asin dai mo kami pinatawad, O Kagurangnan.

⁴³“Linamag mo kami asin ginadan; natago an saimong pagkaherak huli kan saimong kaanggotan,

⁴⁴huli kan sarong mahibog na panganoron kaya dai nakakalagbas an samong mga pamibi.

⁴⁵Ginibo mo kaming basurahan kan kinaban.

⁴⁶“Iniinsulto asin pinag-oolog-olog kami kan gabos ming kaiwal.

⁴⁷Inagihan mi na an pagkagaba asin pagkaraot; namumuhay kami sa takot asin pag-alaman.

⁴⁸An sakong mga mata nagbubulos nin mga salog nin luha sa kapahamakan kan sakong banwaan.

⁴⁹“An sakong mga luha padagos na magbubulos siring sa masulog na salog

⁵⁰sagkod na magdungaw an Kagurangnan hale sa langit asin mahiling kita.

⁵¹An puso ko nagmomondo kun nahihiling ko an nangyari sa mga babae kan syudad.

⁵²“Nalitag ako arog sa sarong gamgam kan sakong mga kaiwal na naoongis sako na mayo nin dahelan.

⁵³Buhay pang itinapok ninda ako sa kalot dangan tinahoban ini nin sarong dakulang gapo.

⁵⁴Nagpoon akong malantopan nin tubig, asin naghona ako na harani na an sakong kagadanan.

⁵⁵“Hale sa kairaroman kan kalot inapod ko an saimong ngaran, Kagurangnan.

⁵⁶Nadangog mo kan ako makimaherak na hinanyogon mo an sakong inagrangay.

⁵⁷Sinimbag mo ako asin sinabihan na dai matakot.

⁵⁸“Tinabangan mo ako, Kagurangnan asin ilinigtas mo an sakong buhay.

⁵⁹Aram mo an karatan na ginibo sako, kaya tawan mo ako nin katanosan.

⁶⁰Aram mo kun gurano an pagkaongis sako kan sakong mga kaiwal asin kun paano sinda nagplano laban sako.

⁶¹“Nadangog mo sindang iniinsulto ako, Kagurangnan, asin aram mo an mga plano ninda laban sako.

⁶²Bilog na aldaw ako an saindang pinag-oorolayan asin naggigibo nin mga plano laban sako.

⁶³Magpoon na aga sagkod banggi, ako an ginibo nindang subahan.

⁶⁴“Padusahan mo sinda, Kagurangnan, sosog sa saindang mga gibo.

⁶⁵Maldisyonon mo sinda asin halean nin paglaom!

⁶⁶Sa kaanggotan, lamagon mo sinda asin paraon sa daga, O Kagurangnan!”