Read Central Bicolano Lamentations 4 Bible Online

Lamentations 4 - Central Bicolano bible

Lamentations 4

¹Nag-itom na nin marahay an dating nagkikinang na bulawan! An mga gapo kan Templo nagkawararak na sa mga tinampo.

²Kaidto mahalaga samo siring sa bulawan an mga aking lalaki nin Sion, alagad ngunyan siring na sana sinda sa dalipay na mga koron.

³Maski an babaeng lobo nagpapasuso kan saiyang mga ogbon, alagad an sakong banwaan arog na sa ostrits na maringis sa saiyang mga ogbon.

⁴Pinababayaan ninda an saindang mga omboy na magadan sa paha saka sa gutom; an mga aki nakikilimos nin kakanon, alagad mayo nin nagtatao sa sainda.

⁵An mga tawo na nagkakan nin masiram na kakanon kaidto ngunyan nagagadan sa gutom sa mga tinampo; an mga nagdakula sa luho kaidto ngunyan namumurot nin pagkakan sa basurahan.

⁶Mas orog an padusa sa sakong banwaan ki sa padusa sa mga taga Sodoma, na bigla sanang buminagsak huli kan kapangyarihan nin Dios.

⁷Kaidto an samong mga prinsipe mayo nin digta asin dalisay siring sa nyebe, makokosog saka marahay an mga hawak.

⁸Ngunyan dai namimidbidan na naghihigda sinda sa mga tinampo, an saindang lalawogon maitom siring sa oring; an saindang kublit dukot na sa tolang asin alang na siring sa kahoy.

⁹Mas marahay pa an mga nagadan sa gera ki sa nagadan sa gutom, na luway-luway na nagagadan huli ta mayo sinda nin makakakan.

¹⁰Sa makuring kasakitan na nag-abot sa sakong banwaan, linuto kan mga mamomoton na ina an saindang kaakian tanganing magin kakanon.

¹¹Pinaluwas nin Kagurangnan an bilog niyang kaanggotan; nagpagkot siya nin kalayo sa Sion na tuminutong sagkod kan mga pundasyon.

¹²Mayo nin siisay man, maski an mga hade sa dayuhan na mga nasyon, na nagtubod na an mga trangkahan nin Jerusalem malalaog nin mga kaiwal.

¹³Alagad nangyari ini, huli sa kasalan kan saiyang mga propeta, sa kasombikalan kan saiyang mga padi, na nagpabulos kan dugo nin mga matanos.

¹⁴An saiyang mga lider nagkarapkarap sa mga tinampo siring sa mga buta, mga nadigtaan nin dugo, kaya mayong nangahas na magduta sainda.

¹⁵Nagkurahaw an mga tawo, “Humarayo kamo, mga maati! Dai nindo kami pagdutaan!” Kaya naglagalag sinda sa mga nasyon, mayo nin minaako sa sainda.

¹⁶Pinabayaan sinda nin Kagurangnan; iwinarak niya mismo sinda. Dai niya ginalangan an mga padi asin mga lider.

¹⁷Nagdiklom na an samong panhiling sa paghanap nin tabang na dai man nag-abot; nagparahalat kami nin tabang hale sa sarong nasyon na mayo man nin ikakatao.

¹⁸Binantayan kami kan mga kaiwal, kaya dai kami nakalakaw sa samong mga tinampo; bilang na an samong mga aldaw, huli ta uminabot na an samong kataposan.

¹⁹An mga naglamag samo mas marikas pa ki sa mga agila sa kaitaasan; linamag ninda kami sa kabubuldan, hinipaan ninda kami sa kalangtadan.

²⁰Binihag ninda an ginikanan kan samong buhay, an hade na linahidan nin Kagurangnan, an samong sinarigan na maingat samo sa lambang parasalakay.”

²¹Mga taga Edom asin Uz, mag-ogma kamo asin maggayagaya; alagad maabot man saindo an kasakitan; huba man kamong magsasayasay sa kasosopgan.

²²An Sion nagbayad na kan saiyang kasalan; hahaleon na kami nin Kagurangnan sa pagkatapokan. Alagad, O Edom, papadusahan ka nin Kagurangnan; ihahayag niya an saimong mga kasalan.