Read Central Bicolano Lamentations 5 Bible Online

Lamentations 5 - Central Bicolano bible

Lamentations 5

¹Giromdoma, Kagurangnan, an nangyari samo; masdan mo kami asin hilinga an samong kasosopgan.

²An samong pagsadiri yaon na sa mga dayuhan, mga taga ibang nasyon na an nag-eerok sa samong mga harong.

³An samong mga ama ginadan kan mga kaiwal, asin an samong mga ina balo na ngunyan.

⁴Kaipuhan bayadan mi an tubig na samong iniinom, sagkod an mga kahoy na samong iganagatong.

⁵Pinapagtrabaho kami arog sa mga asno o kamelyo; pagal na kami alagad dai tinutugotan na magpahingalo.

⁶Tanganing mabuhay, nakilimos kami nin pagkakan sa Egipto asin sa Asiria.

⁷Nagkasala an samong mga ginikanan, asin mayo na sinda ngunyan, alagad kami an nagtitios para sa saindang mga kasalan.

⁸Mga oripon an namamayo samo; mayo nin maligtas samo sa saindang kapangyarihan.

⁹Sa paghanap nin pagkakan, buhay mi nasa pag-alaman, sa kamot kan mga bandido sa kalangtadan.

¹⁰Gutom an dahelan kan samong kalentura sagkod na an kublit mi magin arog kainit sa horno.

¹¹An samong mga agom linupigan sa Bukid nin Sion, an mga birhen sa mga banwa nin Juda.

¹²An samong mga lider binihag dangan binitay; dai ginalangan maski an kamagurangan.

¹³An mga hoben na lalaki pirit na pinatrabaho sa mga gilingan; mga aki pinanluluya sa gabat kan mga kahoy na saindang pasan.

¹⁴Pinabayaan na kan mga gurang an pagtiripon sa trangkahan kan syudad, asin kan mga hoben na lalaki an saindang musika.

¹⁵Naontok na an kaogmahan kan samong mga puso; an samong mga pagsayaw nagi nang mga pagmondo.

¹⁶Mayo nang natada sa mga ipinag-oorgulyo nyamo; nagkasala kami, herak man samo!

¹⁷Makuri an pagmondo kan samong mga puso asin dai na nakakamaan an samong mga mata huli kan mga luha,

¹⁸huli ta an Bukid nin Sion rumpag na asin mayong nag-eerok, saka pinaglakaw-lakawan nin mga lalaw na ayam.

¹⁹Alagad ika, Kagurangnan, hade sagkod pa man; an saimong trono magdadanay sa gabos na henerasyon.

²⁰Tadaw ta pinabayaan mo kami sa haloy na panahon? Magigiromdoman mo pa daw kami giraray?

²¹Balikan kami saimo, Kagurangnan! Ibalik mo kami! Balikan an dati nyamong kamurawayan.

²²O totoo mananggad na isinikwal mo na kami sagkod lamang? Mayo na daw nin kasagkoran an saimong kaanggotan?