Read Central Bicolano Epistle of Jeremiah 1 Bible Online

Epistle of Jeremiah 1 - Central Bicolano bible

Epistle of Jeremiah 1

¹Saro ining kopya kan surat na ipinadara ni Jeremias sa mga taga Jerusalem bago sinda binihag kan hade nin Babilonia saka dinara sa Babilon. Nasusurat digdi an mensahe na ipinagboot nin Dios ki Jeremias na itao sainda.

²Nagkasala kamo sa Dios. Kaya madali na kamong darahon sa Babilon bilang mga bihag ni Hadeng Nebukadnezzar.

³Magdadanay kamong bihag duman sa halawig na panahon, sagkod sa ikapitong henerasyon. Pakatapos kaiyan matoninong kamong papangenotan nin Dios pabalik sa saindong daga hale sa Babilon.

⁴Duman sa Babilon mahihiling nindo an mga dios-dios na gibo sa kahoy, plata, saka bulawan. An mga dios-dios na ini pinapasan kan mga tawo saka natatakotan kan mga pagano.

⁵Mag-ingat kamo na dai nanggad mag-arog sa mga paganong idto. Dai kamo matakot sa mga dios-dios na idto kun mahiling nindo sinda na ipinagpoprosesyon saka sinasamba.

⁶Embes kaiyan, magsaboot kamo, “Kagurangnan, ika sana an samong sasambahon.”

⁷Iibahan kamo duman kan anghel nin Dios asin aatamanon niya kamo.

⁸An saindang mga dios-dios nakakalopkopan nin plata saka bulawan, asin igwa nin dila na ginibo kan mga paraukit. Alagad dai sinda nakakataram huli ta bako sindang totoong dios.

⁹Minagibo nin mga koronang bulawan an mga tawo dangan ibinubugtak iyan sa payo kan saindang mga dios-dios, na garo baga an mga ini mga babaeng mahilig sa mga alahas.

¹⁰May mga panahon na an mga plata saka bulawan kan mga dios-dios hilom na hinahabon kan mga padi saka ginagasto ninda para sa sadiri;

¹¹kun minsan ibinabayad ninda iyan sa mga maraot na babae sa templo. An mga dios-dios na iyan na gibo sa kahoy, plata, saka bulawan ginugubingan ninda na garo mga tawo.

¹²Alagad an mga dios-dios, sulotan man nin mga gubing na purpura, dai kayang mag-ingat kan saindang sadiri tanganing dai sinda pagtaklaon asin pag-anayon.

¹³Kun minahugpa sa saindang lalawogon an alpog sa templo, kaipuhan igwa nin maghale kaiyan.

¹⁴May kapot sindang setro arog kan mga hukom, alagad mayo sinda nin kapangyarihan na padusahan an nagkasala sainda.

¹⁵Kun minsan igwa sinda nin kapot na kutsilyo saka patok, alagad dai ninda kayang iligtas an saindang sadiri tanganing dai maraot sa gera o madara kan mga parahabon.

¹⁶An gabos na ini nagpapatotoo na bako sindang dios. Kaya dai nindo sinda pagsambahon.

¹⁷Arog sa pasang mangko, mayo nin pakinabang an mga dios-dios na idto na nagtutukaw sa saindang mga templo. An saindang mga mata pano nin alpog na dara kan mga bitis kan mga tawong naglalaog duman.

¹⁸Pinapapusog kan mga padi an mga templo sa paagi nin mga pinto, barat, saka mga kandado, tanganing dai makalaog an mga parahabon. Kinukulong ninda an mga dios-dios arog sa sarong bilanggo na madali nang gadanon huli sa sarong krimen laban sa hade.

¹⁹An mga padi nagpapagkot nin mga ilawan para sa mga dios-dios, na mas dakul ki sa kaipuhan ninda, alagad maski saro kaiyan dai nahihiling kan mga dios-dios.

²⁰An laog ninda kinakakan kan mga anay, arog kan kahoy na kahabaan kan templo, asin raot na an saindang gubing, alagad dai sinda nakakaaram.

²¹Nangingitom na kan aso na hale sa templo an saindang lalawogon.

²²Nagtutugdon sainda an mga kalabidong, mga dignos, saka iba pang gamgam, asin nagtutukaw sainda pati mga ikos.

²³An gabos na ini nagpapatotoo na bako sinda dios. Kaya dai nindo sinda pagsambahon.

²⁴An mga dios-dios na ini nakakalopkopan nin bulawan tanganing gumayon, alagad dai sinda magkikinang kun mayo nin magpakinang sainda. Kan sinda tunawon saka pormahon mayo sinda nin namatean.

²⁵Mayo nin kalaenan kun gurano kamahal an presyong ibinabayad para sainda; dai sindang hinangos.

²⁶Mayo sinda nin pakinabang. Kaipuhan pang pasanon sinda huli ta dai sinda nakakalakaw.

²⁷Maski an nag-aataman kan mga dios-dios napapasopog kun nahuhulog an saro sainda asin kaipuhan na puroton iyan. Kun an saro sa mga dios-dios pinapatindog sa sarong lugar, dai iyan nakakahiro. Dangan kun napapatagilid iyan, dai iyan nakakatanos. An pagdolot sainda nin mga regalo nakakaarog sa pagtao nin regalo sa sarong bangkay.

²⁸Ipinapabakal kan mga padi an mga isinakripisyo sa saindang mga dios-dios saka ginagamit ninda an kwarta para sa saindang sadiri. An ibang sakripisyo inaasinan kan saindang mga agom tanganing gamiton ngapit, embes na ihiras sa mga dukha asin sa mga mayong sukat.

²⁹Maski an mga babaeng nareregla o bagong mangaki tinutugotan na magduta sa mga sakripisyo. An gabos na ini nagpapatotoo na bako sinda dios. Kaya dai nindo sinda pagsambahon.

³⁰Paanong maapod sindang mga dios mantang tinutugotan an mga babae na magdolot sa mga bagay na iyan na gibo sa kahoy, plata, saka bulawan?

³¹Maski panahon nin pagmondo nagtutukaw sa laog kan templo an mga padi na girisi an gubing, aris an buhok, saka mayo nin tahob an payo.

³²Nagriribok sinda asin nagkukurahaw sa atubangan kan saindang mga dios-dios arog kan ginigibo nin iba sa panahon na igwa nin gadan.

³³Hinuhuba ninda an gubing kan saindang mga dios-dios dangan itinatao sa saindang mga agom saka mga aki.

³⁴Gibohan man nin maraot o nin marahay an mga dios-dios na iyan, dai sinda makakabalos. An sarong tawo dai ninda magigibong hade asin an sarong hade dai ninda mapapahale sa saiyang trono.

³⁵Dai ninda mapapayaman an sarong tawo o matatawan nin kwarta. Kun igwa nin manuga sainda dangan dai maotob iyan, dai ninda iyan mapapabayad.

³⁶Dai ninda ikakaligtas sa kagadanan an sarong tawo, asin dai ninda matatabangan an maluya laban sa makosog.

³⁷Dai ninda magigibong makahiling an sarong buta o ikakaligtas an nasa kasakitan.

³⁸Mayo sinda nin ikakatabang sa mga babaeng balo saka mga ilo.

³⁹An mga bagay na ini na gibo sa kahoy asin napapatos nin plata saka bulawan nakakaarog sa gapong hale sa kabukidan na mayo nin kapangyarihan. Mapapasopog an mga nagsasamba sainda.

⁴⁰Kaya paano sinda ibibilang o aapodon na mga dios? An mga taga Babilonia iyo mismo an naghahale kan onra kan sadiri nindang mga dios.

⁴¹Kun may nahihiling sindang sarong pola, dinadara ninda ini sa templo ni Bel tanganing ipamibi na makataram, na garo baga nasasabotan sinda ni Bel.

⁴²Alagad huli sa saindang kamangmangan, maski aram nindang dai nakakatabang an saindang mga dios, padagos na sinasamba ninda an mga ini.

⁴³Bako sana iyan, may mga babae na nagtutukaw sa gilid kan dalan, may gakod na lubid saka nagtututong nin insenso. Dangan itinatangro ninda an saindang sadiri sa mga lalaki. Kun may napiling saro, minabalik ini tanganing rawrawan an babaeng nagtutukaw kasunod niya na kaya dai napili huli ta bakong magayon arog saiya.

⁴⁴An gabos na ginigibo manongod sa mga dios na ini bakong tama. Paano sinda ibibilang o aapodon na mga dios?

⁴⁵Gibo sinda kan mga paraukit saka mga panday; kun ano an boot kan mga ini iyo an mangyayari sainda.

⁴⁶An mga tawong naggibo sainda dai mabubuhay nin halawig, kaya paanong magigin dios an saindang ginibo?

⁴⁷An mga tawong ini mayo nin iwinalat na pamana para sa masurunod na henerasyon kundi kaputikan asin kasosopgan.

⁴⁸Kun minaabot an gera saka karibokan, minaplano an mga padi kun saen sinda magtatago kaiba an saindang mga dios.

⁴⁹Mayo nin magiginibo an mga dios na iyan sa panahon nin gera asin karibokan. Tadaw ta dai nahihiling kan mga tawo na bako sindang mga dios?

⁵⁰An mga dios na iyan mga kahoy sana na pinatos nin plata saka bulawan. Maabot an panahon na magigin malinaw nanggad na bako sinda mga dios.

⁵¹Maaaraman kan gabos na nasyon saka mga hade na an mga dios gibo sana nin tawo. Mayo sinda kan kapangyarihan nin sarong dios,

⁵²asin dapat na maaraman kan gabos na bako sinda totoong dios.

⁵³An sarong tawo dai ninda magigibong hade asin dai ninda mapapabulos an uran.

⁵⁴Dai sinda makakapagdesisyon manongod sa sadiring mga kasibotan o makakatao nin hustisya sa sarong inapi; mayo nanggad sinda nin magigibo. Mayo sinda nin pakinabang arog kan mga uwak na naglalayog sa kaitaasan.

⁵⁵Kun nasusulo an templo, minadurulag an mga padi tanganing iligtas an saindang sadiri. Binabayaan ninda an mga dios-dios na gibo sa kahoy asin patos nin plata saka bulawan na nasusulo arog sa mga kahoy na kahabaan.

⁵⁶Dai sinda makakalaban sa mga hade o makakaduman sa gera. Siisay an matubod na dios sinda?

⁵⁷Dai ikakaligtas kan mga dios-dios na iyan na gibo sa kahoy asin napapatos nin plata saka bulawan an saindang sadiri laban sa mga parahabon saka mga tulisan na minakua kan mga

⁵⁸plata, mga bulawan saka mga gubing kan mga dios-dios. Dai sinda mapupugol kan mga dios-dios.

⁵⁹Marahay pa ki sa mga bakong totoong dios na iyan an sarong maisog na hade o an sarong kasangkapan sa harong. Marahay pa ki sa sainda an sarong pinto na nag-iingat kan mga bagay na nasa laog kan harong. Maski an kahoy na harigi sa sarong palasyo marahay pa ki sa bakong totoong dios.

⁶⁰Linalang nin Dios an aldaw, an bulan, saka an mga bitoon tanganing magtao nin liwanag, asin minakuyog sinda saiya.

⁶¹Siring man an kikilat saka an doros. Mahihiling maski sa harayo an kikilat asin naghuhuyop maski saen an doros.

⁶²Kun pinagbobotan nin Dios an mga panganoron na maglakop sa bilog na kinaban, minakuyog sinda.

⁶³Kun an Dios minapahilig nin kalayo hale sa langit tanganing suloon an kabukidan asin kadlagan, minakuyog iyan kan pagboot niya. An mga bagay na ini dai magigibo kan mga dios-dios—dai ngani ninda iyan kayang arogon.

⁶⁴Tadaw ta aapodon ta sindang mga dios, mantang dai ninda kayang tabangan kita o kulogon?

⁶⁵Aram nindo na bako sinda dios, kaya dai nindo sinda pagsambahon.

⁶⁶An mga dios-dios na ini mayo nin kapangyarihan sa mga hade; dai ninda pwedeng maldisyonon an mga ini o tawan nin mga bendisyon.

⁶⁷Dai ninda matatawan an mga nasyon nin anoman na tanda sa langit; dai sinda makakatao nin liwanag arog kan aldaw o kan bulan.

⁶⁸Marahay pa an mga lalaw na hayop ki sa mga dios-dios na iyan, huli ta nakakadulag sinda sa pag-alaman asin natatabangan ninda an saindang sadiri.

⁶⁹Kaya malinaw nanggad na bako sinda mga dios. Dai nindo sinda pagsambahon.

⁷⁰An mga dios-dios nindang iyan, na gibo sa kahoy asin patos nin plata saka bulawan nakakaarog sa tawo-tawong patakot sa oma. Mayo iyan nin ikakatabang.

⁷¹Garo iyan matonok na sadit na kahoy sa sarong tatamnan na embes na alawon an mga gamgam iyo logod an nagtataong tugdonan sainda. An mga dios-dios na iyan nakakaarog sa bangkay na itinapok sa kadikloman.

⁷²Girisi na an gubing na kolor purpura saka lino na sulot ninda, kaya aram ta na bako sinda dios. Sa kataposan, uuboson sinda kan mga anay asin mayo na sinda nin pakinabang sa kiisay man maski saen.

⁷³Mas marahay an sarong tawong matanos na mayo nin mga dios-dios, huli ta dai siya madadaya asin dai mapapasopog.