Read Central Bicolano Baruch 1 Bible Online

Baruch 1 - Central Bicolano bible

Baruch 1

¹An librong ini sinurat ni Baruc na aking lalaki ni Neraias, na makoapo ni Maseias, asin guminikan ki Zedekias, Hasadias, saka Hilkias. Sinurat ini sa Babilon

²kan ikapitong aldaw kan bulan, limang taon pakatapos na sakopon saka suloon kan mga taga Babilonia an Jerusalem.

³Binasa ni Baruc an librong ini ki Jehoiakin, na aking lalaki ni Jehoiakim, na hade nin Juda, asin sa gabos na tawo na nag-erok sa Babilon, sa tampi kan Salog nin Sud. Nagduman an lambang saro sa pagdangog—an mga ginagalangan na tawo, an mga kadugo kan hade, an kamagurangan, sa katunayan an gabos na tawo, ano man an saindang kamugtakan sa buhay.

⁵Pakabasa kan libro, naghibi an lambang saro, nag-ayuno saka namibi sa Kagurangnan.

⁶Dangan nagtao nin kwarta an mga tawo sosog sa makakaya ninda,

⁷asin an natipon ipinadara ninda sa Jerusalem sa Halangkaw na Padi na si Jehoiakim na aking lalaki ni Hilkias saka makoapo ni Sallum, asin sa ibang mga padi sagkod sa gabos na kaibahan niya sa Jerusalem.

⁸Kan ikasampolong aldaw kan bulan nin Sivan, kinua ni Baruc an banal na mga kagamitan na sinamsam sa Templo dangan ibinalik idto sa Juda. Iyo ini an platang mga kagamitan na ipinagibo ni Zedekias na aking lalaki ni Hadeng Josias nin Juda

⁹pakatapos na bihagon ni Hadeng Nebukadnezzar nin Babilonia si Jehoiakin, an mga pamayo, an mga trabahador, an mga ginagalangan na tawo asin an mga ordinaryong tawo, dangan dinara sinda sa Babilon hale sa Jerusalem.

¹⁰Nagsurat an banwaan: Gamiton nindo an kwartang kaiba kaini sa pagbakal nin mga hayop para sa mga tinutong na atang saka dolot para sa kasalan, sa pagbakal nin insenso asin nin dolot na pagkakan. Idolot nindo an mga ini sa altar nin Kagurangnan na satong Dios,

¹¹dangan ipamibi nindo si Hadeng Nebukadnezzar nin Babilonia saka si Belsazzar na saiyang aki, na magpadagos sindang buhay sagkod na yaon an kalangitan.

¹²Dangan pakokosogon kita saka gigiyahan nin Kagurangnan. Aatamanon kita ni Nebukadnezzar asin kan saiyang aking si Belsazzar. Magigin maimbod kita sainda sagkod na kita nabubuhay, asin mawiwilihan ninda kita.

¹³Ipamibi man nindo kami sa Kagurangnan Dios, huli ta nagkasala kami saiya, asin sagkod ngunyan anggot pa siya samo.

¹⁴Basahon nindo an librong ini na ipinapadara mi saindo saka magkumpisal kamo kan saindong kasalan sa laog kan Templo sa enot na aldaw kan Pyesta nin mga Harong-Harong asin sa ibang aldaw nin banal na pagtiripon.

¹⁵Iyo ini an sasabihon nindo: “Matanos an Kagurangnan nyamong Dios. Alagad sagkod ngunyan pano kami nin kasosopgan. Kaming mga taga Juda asin mga taga Jerusalem,

¹⁶patin an samong mga hade, mga pamayo, mga padi, mga propeta, saka an samong mga ginikanan gabos napasopog,

¹⁷huli ta nagkasala kami sa Kagurangnan na samong Dios

¹⁸asin nagsuway kami saiya. Dai kami naghinanyog saiya o namuhay sosog sa saiyang mga kabotan.

¹⁹Magpoon kan aldaw na an samong mga ginikanan ilinuwas nin Kagurangnan sa Egipto sagkod ngunyan, nagpadagos kami sa pagigin bakong maimbod asin sa pagsuway saiya.

²⁰Kaidtong panahon, kan pangenotan nin Kagurangnan an samong mga ginikanan paluwas sa Egipto tanganing ikatao niya samo an sarong mayaman saka matubang na daga, minaldisyon niya kami sa paagi ni Moises na saiyang sorogoon. Kaya ngunyan nagtitios kami huli kan mga maldisyon na idto.

²¹Dai mi dinangog an tingog nin Kagurangnan na samong Dios sa paagi kan mga propeta. Embes kaiyan, sinunod mi an lambang magustohan mi saka nagpadagos kami sa paggibo nin karatan. Nagsamba kami sa mga dios-dios saka ginibo mi an mga bagay na ikinakaongis nin Kagurangnan.