Read Central Bicolano Baruch 5 Bible Online

Baruch 5 - Central Bicolano bible

Baruch 5

¹Jerusalem, hubaa an sulot mong gubing nin kamondoan asin kasakitan, dangan sulotan an mayo nin kasagkoran na gayon kan kamurawayan nin Dios.

²Sulotan an alikboy nin katanosan nin Dios. Bugtakan sa saimong payo an korona kan kamurawayan nin Dios na Mayo nin Kasagkoran.

³Ipapahiling nin Dios an saimong kagayonan sa lambang nasyon sa daga.

⁴Sagkod lamang na masabi siya saimo: “An saimong katiwasayan naghahale sa saimong katanosan, asin an saimong kagayonan naghahale sa saimong kaimbodan sako.”

⁵Magbangon ka, Jerusalem, magtindog ka sa alitoktok kan bukid. Hilinga kun saen tinitipon kan An Banal an saimong mga aki na hale sa sirangan saka hale sa solnopan. Nag-oorogma sinda huli ta nagiromdoman sinda nin Dios.

⁶Jerusalem, kinurua saimo kan mga kaiwal an saimong mga aki asin nagraralakaw sinda mantang dinadara sinda sa harayo; alagad ibabalik sinda saimo nin Dios na lunad sa kamurawayan, na garong nakatukaw sa trono nin hade.

⁷Nagboot an Dios na pahababaon an lambang halangkaw na bukid asin an daing sagkod na mga bulod; nagboot siya na tambakan an mga kapantayan saka patagon an daga, tanganing ligtas na makapuli an banwaan nin Israel sa kamurawayan nin Dios.

⁸Sa pagboot nin Dios, matunga an mga kadlagan nin mahahamot na mga kahoy tanganing lindongan an banwaan nin Israel.

⁹An Dios iyo an mangengenot sa pagpuli kan Israel. Mabalik sinda na nag-oogma nin marahay, na pinangengenotan kan saiyang pagkaherak asin katanosan, asin napapalibotan kan liwanag nin saiyang mamuraway na presensya.