Read Central Bicolano Susanna 1 Bible Online

Susanna 1 - Central Bicolano bible

Susanna 1

¹Igwa kaidto nin sarong lalaki na nag-erok sa Babilon na an ngaran Joakim.

²An agom niya iyo si Susana na aking babae ni Hilkias. Si Susana sarong magayon na babae saka may pagkatakot sa Kagurangnan.

³Mga maimbod na Judio an saiyang mga magurang na nagpadakula kan saindang aking babae sosog sa Katogonan ni Moises.

⁴Mayaman nin marahay si Joakim asin napapalibotan nin mahiwas na tatamnan an saiyang harong. Parating nagtitipon duman an ibang Judio, huli ta ginagalangan siya kan gabos.

⁵An saiyang harong iyo an nagin opisina kan duwang hukom asin nagduduman an mga tawo na may asunto. An duwang lider na ini kan komunidad nin mga Judio itinalaga bilang mga hukom kan taon na idto. Nagsabi an Kagurangnan manongod sainda, “Nagluwas an karatan hale sa Babilon, hale sa mga hukom, na dapat kutana iyo an nangengenot kan banwaan.”

⁶

⁷Aroaldaw kun odto, kun nakahale na an gabos na tawo tanganing magkakan, ugale na ni Susana na maglakaw-lakaw sa tatamnan kan saiyang agom.

⁸Parati siyang nahihiling kan duwang hukom mantang siya naglalakaw-lakaw, asin nagpoon sindang magmawot saiya.

⁹Huli kan saindang maraot na kaisipan ki Susana, dai na sinda namimibi asin nalingawan na ninda an matanos na paghukom.

¹⁰Pareho sindang igwa nin dakulang pagmawot na mapasaiya si Susana alagad hinihilom sana nindang duwa an saindang namamatean

¹¹huli ta pareho sindang nasosopog na akoon an saiyang karigsokan.

¹²Kaya naghalat na sana sinda aroaldaw tanganing mamasdan siya.

¹³Sarong aldaw, nagsinabihan sinda, “Magpuli na kita; oras na nin pangodto.”

¹⁴Nagluwas sinda, dangan nagsuhay. Alagad dai nahaloy nagbalik sinda tanganing hilingon si Susana, asin dai tinutuyong nagsabatan sinda. Sa enot, naghingowa an lambang saro na magpaliwanag kun tadaw ta idtoon siya duman, alagad sa bandang huri, pareho sindang nagtuga kan saindang kamawotan ki Susana. Nagplano sinda na maghalat kan panahon na nagsosolo ini.

¹⁵Kaya nagpadagos sinda sa paghalat kan tamang panahon. Sarong aldaw, nagduman sa tatamnan si Susana arog kan dati niyang ginigibo, kaiba an duwa niyang sorogoon na babae. Mayo na nin ibang tawo duman kundi an duwang hukom na nagtatago saka nagmamasid ki Susana. Mainit kaidto an panahon asin naisipan ni Susana na mangarigos. Kaya sinabihan niya an saiyang mga sorogoon, “Darahan nindo ako nin lana saka pahamot. Dangan baratan nindo an mga trangkahan tanganing makakarigos na ako.”

¹⁶

¹⁷

¹⁸Binaratan kan duwang sorogoon an mga trangkahan dangan nagluwas sa pintoan na nasa gilid tanganing kuahon an kaipuhan ni Susana. Dai ninda nahiling an duwang hukom na nagtatago.

¹⁹Pakahale kan mga sorogoon, nagluwas tolos an duwang hukom sa saindang pinagtatagoan, nagdalagan pasiring ki Susana,

²⁰saka nagsabi saiya, “Igwa nin barat an mga trangkahan asin mayo nin makakahiling sato. Nagkakalayo an samong kamawotan saimo kaya magtugot kang makidorog samo.

²¹Kun magsayuma ka, masaksi kami laban saimo na may kaibahan kang sarong hoben na lalaki, asin na iyo ini an dahelan kun tadaw ta pinahale mo an saimong mga sorogoon na babae.”

²²Naghangos nin hararom si Susana saka nagsabi, “Mayo ako nin malulusotan. Kun magtugot ako saindo, gagadanon ako sa salang pagpasambay. Kun magsayuma ako, dai ako makakadulag sa saindo.

²³Alagad mas papaorogon ko pang magin saindong biktima na mayo nin sala ki sa magkasala ako sa Kagurangnan.”

²⁴Dangan makosog siyang nagkurahaw, alagad ikinurahaw man kan mga hukom an saindang sumbong laban saiya.

²⁵Nagdalagan an saro sa mga hukom dangan binukasan an mga trangkahan.

²⁶Kan madangog kan mga sorogoon na nasa laog kan harong an kinurahaw sa tatamnan, hidale sindang naglaog sa pintoan na nasa gilid tanganing aramon an nangyari ki Susana.

²⁷Sinasabi kan duwang hukom an saindang istorya, asin nasopog nin marahay an mga sorogoon huli ta mayo pa lamang nin nagsabi nin siring kaidto manongod ki Susana.

²⁸Sunod na aldaw, kan magtiripon na sa harong ni Joakim an mga tawo, nag-abot an duwang hukom na andam na ipadagos an maraot nindang plano na ipagadan si Susana.

²⁹Nagsabi sinda sa atubang kan mga tawo, “Padigdihon nindo si Susana na aking babae ni Hilkias, saka agom ni Joakim.” Kan apodon siya,

³⁰nag-abot siya na kaibahan an saiyang mga magurang, mga aki saka an gabos niyang kadugo.

³¹Si Susana sarong babae na mabini nin marahay saka magayon.

³²Igwa nin takop na belo an saiyang lalawogon, alagad nagboot an duwang maraot na lalaki na haleon an belo, tanganing mapaogma ninda an saindang sadiri sa paghiling kan saiyang magayon na lalawogon.

³³Alagad naghihibi an saiyang pamilya asin an lambang nakahiling saiya.

³⁴Dangan nagtindog an duwang hukom sa atubang kan mga tawo. Ibinugtak ninda an saindang mga kamot sa payo ni Susana, saka nagpoon magsabi kan saindang mga sumbong laban saiya.

³⁵Naghihibi si Susana, alagad nagtingkalag siya sa langit huli ta nananarig siya sa Kagurangnan.

³⁶Nagsabi an mga hukom, “Naglalakaw kami kaidto sa tatamnan kan mag-abot an babaeng ini kaiba an saiyang duwang sorogoon na babae. Binaratan niya an mga trangkahan saka pinahale an mga sorogoon.

³⁷Dangan nagdolok saiya an sarong hoben na lalaki na nagtatago sa tatamnan, saka nagdorog sinda.

³⁸Yaon kami kaidto sa sarong kanto kan tatamnan, asin kan mahiling mi an ginigibo ninda, nagdalagan kami pasiring sainda.

³⁹Nadakop mi sindang nagdodorog. Hiningowa ming pugolon an lalaki, alagad mas makosog siya samo. Nagdalagan siya, binukasan an mga trangkahan saka duminulag.

⁴⁰Kaya pinugol mi an babaeng ini saka hinapot kun siisay an hoben na lalaki, alagad habo siyang magtuga. Minasumpa kami na totoo an samong sinabi.”

⁴¹An duwang lalaki bako sanang mga lider kan komunidad kundi mga hukom pa, kaya nagtubod kan saindang ginibong istorya an mga tawo, asin sinentensyahan ninda nin kagadanan si Susana.

⁴²Dangan makosog na nagkurahaw si Susana, “Dios na mayo nin kataposan, mayo nin pwedeng itago saimo; naaaraman mo an gabos bago man ini mangyari.

⁴³Uya ako na madali nang magadan, alagad naaaraman mo na mayo ako nin sala. Naaaraman mo na nagpuputik an mga lalaking ini. Tadaw ta dapat akong magadan?”

⁴⁴Dinangog nin Kagurangnan an saiyang pamibi

⁴⁵asin pinasabongan niya an sarong hoben na lalaki na an ngaran Daniel tanganing magtaram, mantang dinadara si Susana pasiring sa lugar na paggagadanan saiya.

⁴⁶Nagkurahaw si Daniel, “Habo akong mapabilang sa magadan sa babaeng ini!”

⁴⁷Nagsalingoy an gabos na tawo sa paghiling saiya dangan naghapot, “Ano an boot mong sabihon?”

⁴⁸Nagtindog si Daniel sa atubang ninda saka nagsabi, “Banwaan nin Israel, arog na kamo kaini kalolong? Kokondenaron daw nindo an sarong babaeng Israelita na magadan sa siring kahababaw na ebidensya? Dai pa ngani nindo hiningowang maaraman an katotoohan.

⁴⁹Bukasi giraray nindo an kaso. Kaputikan an itinaong sumbong kan mga lalaking ini.”

⁵⁰Kaya hidaling nagbalik an gabos na tawo. Nagsabi ki Daniel an mga kamagurangan, “Itinao saimo nin Dios an kadonongan na lampas sa saimong edad, kaya magtukaw ka sa kaibahan mi asin paliwanagan samo an boot mong sabihon.”

⁵¹Sinabihan sinda ni Daniel, “Suhaya an duwang hukom, asin saro-saro ko sindang hahapoton.”

⁵²Kan masuhay na sinda inapod ni Daniel an saro dangan nagsabi, “Ika na tada kan maraot na panahon, sisimbagon mo ngunyan an gabos na kasalan na ginibo mo.

⁵³Bakong tama an ginigibo mong paghukom. Kinokondenar mo an mayo nin sala saka tinatalingkasan an nagkasala, maski nagtaram an Kagurangnan, ‘Dai nindo paggadanon an mayo nin sala.’

⁵⁴Kun totoong nahiling mo na nakidorog an babaeng ini, sabihan daw sako kun sa limpoy nin anong kahoy sinda nagdorog?” “Sa limpoy nin sarong sadit na kahoy na goma,” an simbag niya.

⁵⁵Nagsabi si Daniel, “Marahay! Katimbang kan kaputikan na iyan an saimong buhay. An anghel nin Dios tinawan na nin pagboot na baakon ka sa duwa.”

⁵⁶Dangan hinale duman an enot na hukom asin dinara sa atubangan ni Daniel an ikaduwa. “Orog ka pang nakakaagid sa sarong Cananeo ki sa sarong Judio,” an sabi saiya ni Daniel. “Biniko kan gayon kan babaeng ini an saimong paghukom asin rinaot kan karigsokan an saimong pag-isip.

⁵⁷Natood ka na na mapasaimo an magustohan mo sa kababaehan nin Israel huli ta takot sinda saimo, alagad uya an sarong babaeng Judio, asin dai siya nagtugot sa gusto mo.

⁵⁸Ngunyan, taraman sako kun sa limpoy nin anong kahoy sinda kan mahiling mo?” “Sa limpoy nin sarong dakulang kahoy na hamurawon,” an simbag niya.

⁵⁹Nagsabi si Daniel, “Marahay! Katimbang kan kaputikan na iyan an saimong buhay. An anghel nin Dios naghahalat na kapot an saiyang espada asin andam siya tanganing pagduwahon ka. Dangan pareho na kamong mapapara sa tahaw nyamo.”

⁶⁰Dangan nagkurahaw an gabos na tawo saka nag-omaw sa Dios na nagliligtas sa mga nagsasarig saiya.

⁶¹Nagtirindog sinda sa pagpadusa sa duwang hukom huli ta sa sainda man sanang mga tataramon napatotoohan ni Daniel na sinda nagputik.

⁶²Sosog sa Katogonan ni Moises, an tawong minatao nin bakong totoong sumbong iyo an mag-aako kan parehong padusa na nakatalaan kutana sa akusado. Kaya ginadan an duwang hukom, asin nakaligtas an buhay kan sarong babae na mayo nin sala.

⁶³An mga magurang ni Susana, an saiyang agom, saka an gabos niyang kadugo nag-omaw sa Dios huli ta napatotoohan na dai siya nagkasala sosog sa sumbong laban saiya.

⁶⁴Magpoon kaidto, iginalang si Daniel kan mga tawo.