Read Central Bicolano Ezekiel 11 Bible Online

Ezekiel 11 - Central Bicolano bible

Ezekiel 11

¹Initaas ako kan espiritu nin Dios asin dinara sa trangkahan sa parteng sirangan kan Templo. Duman sa may trangkahan nahiling ko an beynte y singkong lalaki, kaiba si Jaazanias na aking lalaki ni Azzur saka si Pelatias na aking lalaki ni Benaias, an duwang lider kan banwaan.

²Tinaraman ako nin Dios, “Aki nin tawo, an mga tawong ini nagpaplano nin maraot asin nagtatao nin maraot na hatol sa syudad.

³Nagtataram sinda, ‘Dai mahahaloy magpapatugdok giraray kita nin mga harong. An syudad iyo an kaldero, dangan kita an karne na nasa laog kaiyan, alagad minsan siring iniingatan kita kaiyan sa kalayo.’

⁴Kaya magpropesiya ka laban sainda, aki nin tawo.”

⁵Napasairarom ako kan espiritu nin Kagurangnan asin tinaraman niya akong itao an mensaheng ini sa mga tawo: “Banwaan nin Israel, aram ko kun ano an pinagsasabi nindo asin kun ano an saindong pinaplano.

⁶Ginadan nindo an dakul na tawo digdi sa syudad, asin an mga tinampo napano kan saindang mga bangkay.

⁷“Kaya ini an tataramon ko saindo, ako an Kagurangnan Dios. Totoo man nanggad na an syudad na ini iyo an kaldero, alagad arin an karne? An mga bangkay kan saindong mga ginadan! Dai na kamo mag-eerok digdi—itinapok ko kamo sa luwas kan syudad!

⁸Takot kamo sa espada kaya dadarahon ko an mga tawong may espada tanganing salakayon kamo.

⁹Iluluwas ko kamo sa syudad, asin itatao sa mga dayuhan. Sinentensyahan ko na kamo nin kagadanan,

¹⁰asin magagadan kamo sa gera sa sadiri nindong daga. Dangan maaaraman kan gabos na ako an Kagurangnan.

¹¹Dai kamo iingatan kan syudad na ini arog kan pag-ingat kan kaldero sa karneng nasa laog kaiyan. Papadusahan ko kamo saen man kamo mamugtak sa daga nin Israel.

¹²Maaaraman nindo na ako an Kagurangnan, huli ta dai kamo naglakaw sosog sa sakong mga pagboot asin dai nindo inotob an sakong togon kundi sinunod nindo an mga pagboot kan mga nasyon sa palibot nindo.”

¹³Mantang nagpopropesiya ako, natumbang gadan si Pelatias. Nagdapa ako dangan nagkurahaw, “Kagurangnan Dios! Gagadanon mo daw an gabos na natada sa Israel?”

¹⁴Nagtaram sako an Kagurangnan,

¹⁵“Aki nin tawo, ika an pinag-oorolayan kan mga tawo na nag-eerok sa Jerusalem asin kan kapwa mo Israelita na nasa pagkatapokan. An olay ninda, ‘An mga itinapok harayong marahay tanganing magsamba sa Kagurangnan. An dagang ini itinao na niya sato bilang pagsadiri.’

¹⁶“Kaya taraman mo an kapwa mo itinapok kaining sinasabi ko. Ako an nagdara sainda tanganing mag-erok sa harayong mga nasyon asin ako an nagwarak sainda sa ibang mga daga. Alagad makakaibahan ninda ako sa mga daga na saindang dinumanan sa laog kan panahon na iyan.

¹⁷“Kaya sabihan mo sinda kan tataramon ko, an Kagurangnan Dios. Titiponon ko sinda hale sa mga nasyon na pinagwarakan ko sainda, asin itatao ko giraray sainda an daga nin Israel.

¹⁸Pagbalik ninda, kaipuhan haleon ninda an mga maati saka makauuyam na mga dios-dios na saindang nakua.

¹⁹Tatawan ko sinda nin bagong puso asin espiritu. Hahaleon ko sa sainda an sutil na pusong gapo asin riribayan ko iyan nin makinuyog na pusong laman.

²⁰Dangan maglalakaw sinda sosog sa sakong mga pagboot asin kukuyogon ninda an sakong mga togon. Sinda an magigin banwaan ko asin ako an magigin Dios ninda.

²¹Alagad papadusahan ko an mga namomoot na magsamba sa mga maati saka makauuyam na mga dios-dios. Papadusahan ko sinda huli kan saindang ginibo.” An Kagurangnan Dios an nagtaram.

²²Nagpoon paglayog an mga kerubin kaiba an mga rweda, asin nasa itaas ninda an kamurawayan kan Dios nin Israel.

²³Dangan naghale sa Jerusalem an kamurawayan kan Dios asin nag-ontok sa bukid na nasa parteng sirangan kan syudad.

²⁴Sa bisyon, initaas ako kan espiritu nin Dios asin dinara sa mga itinapok sa Babilonia. Dangan napara an bisyon.

²⁵An gabos na bagay na ipinapahiling sako nin Kagurangnan isinasaysay ko sa mga itinapok.