Read Central Bicolano Ezekiel 12 Bible Online

Ezekiel 12 - Central Bicolano bible

Ezekiel 12

¹Nagtaram sako an Kagurangnan,

²“Aki nin tawo, nag-eerok ka sa tahaw nin mga rebeldeng tawo. Igwa sinda nin mga mata, alagad dai nakakamaan; igwa nin mga talinga, alagad dai nakakadangog, huli ta mga rebelde sinda.

³“Kaya ngunyan, aki nin tawo, mag-andam ka nin kagamitan nin sarong itinapok asin maghale ka bago magdiklom. Kaipuhan mahiling kan gabos an saimong paghale pasiring sa ibang lugar. Tibaad pa masabotan ninda na sinda mga rebelde.

⁴Mantang maliwanag pa, andamon mo sa atubang ninda an kagamitan bilang sarong itinapok, asin kaipuhan mahiling ninda an paghale mo pagkabanggi, na garong itatapok ka.

⁵Mantang naghihiling sinda, gumibo ka nin labot sa kudal kan saimong harong dangan duman ka mag-agi.

⁶Sa atubang ninda pasanon mo an saimong kagamitan asin lumuwas ka pasiring sa diklom na may tahob an mata tanganing dai mo mahiling an saimong padudumanan. An gigibohon mo magigin sarong patanid para sa mga Israelita.”

⁷Ginibo ko an itinaram sako nin Kagurangnan. Kan aldaw na idto inandam ko an kagamitan nin sarong itinapok asin pagkabanggi, guminibo ako nin labot sa kudal, na an ginamit ko mga kamot ko sana, dangan nagluwas ako pasiring sa diklom, pasan an sakong kagamitan, mantang naghihiling sinda.

⁸Pagkaaga, nagtaram sako an Kagurangnan,

⁹“Aki nin tawo, bakong hinapot ka kan mga rebeldeng Israelita kun ano an ginigibo mo?

¹⁰Sabihan mo sinda kan tataramon ko saimo, ako an Kagurangnan Dios. An mensaheng ini para sa prinsipe na naghahade sa Jerusalem asin para sa gabos na nag-eerok duman.

¹¹Sabihan mo sinda na an saimong ginibo sarong tanda kan mangyayari sainda—itatapok sinda asin mabibihag.

¹²An prinsipe na naghahade sainda mapasan kan saiyang kagamitan pasiring sa diklom dangan madulag huli sa pag-agi sa sarong labot na ginibo ninda sa kudal para saiya. Tatahoban niya an saiyang mga mata asin dai niya mahihiling kun saen siya maduman.

¹³Alagad bibikladon ko an sakong hikot asin dadakopon ko siya. Dangan dadarahon ko siya sa Babilonia. Magagadan siya duman na dai nahihiling an lugar na idto.

¹⁴Iwawarak ko sa gabos na direksyon an gabos na opisyal na nakapalibot saiya, asin an gabos niyang mga parahatol saka mga bantay; dangan hahanapon sinda kan mga tawo tanganing gadanon.

¹⁵“Kun iwarak ko na sinda sa ibang nasyon asin sa mga dayuhan na daga, dangan ninda maaaraman na ako an Kagurangnan.

¹⁶Tutugotan kong an nagkapira sa sainda matadang buhay sa gera, sa makuring gutom asin sa peste, tanganing sa tahaw kan mga nasyon, maaaraman ninda na makauuyam an saindang mga gawe asin tanganing mamidbidan ninda na ako an Kagurangnan.”

¹⁷Nagtaram sako an Kagurangnan,

¹⁸“Aki nin tawo, magtakig ka mantang nagkakakan, asin mangobogkobog ka sa takot mantang nag-iinom.

¹⁹Sabihan mo an bilog na nasyon na iyo ini an mensahe kan Kagurangnan Dios para sa banwaan nin Jerusalem, na nag-eerok pa sa saindang daga. Magtatakig sinda mantang nagkakakan asin magkokobogkobog sa takot mantang nag-iinom. Huhubaan an saindang daga, huli sa kadahasan kan mga nag-eerok duman.

²⁰An mga syudad na ngunyan pano nin mga tawo matutunaw asin an daga magigin sarong kalangtadan. Dangan maaaraman ninda na ako an Kagurangnan.”

²¹Nagtaram sako an Kagurangnan,

²²“Aki nin tawo, tadaw ta inuulit-ulit kan mga taga Israel an talinhagang ini: ‘Nag-aagi an mga aldaw asin dai man nagkakatotoo an lambang bisyon’?

²³Sabihan mo sinda na ini an tataramon ko, an Kagurangnan Dios: Tataposon ko na an talinhagang ini, asin dai na ini madadangog pa sa Israel. Alagad sabihan mo sinda: Nag-abot na an mga aldaw asin magkakatotoo na an lambang bisyon!

²⁴“Sa Israel, dai na magkakaigwa nin bakong totoong mga bisyon asin makakaribong na mga propesiya.

²⁵Ako, an Kagurangnan, an mataram sainda, asin mangyayari an itinataram ko. Dai na mahahaloy. Sa saindong panahon, kamong mga rebelde, gigibohon ko an ipinatanid kong gigibohon. Ako an nagtaram,” olay nin Kagurangnan Dios.

²⁶Nagtaram sako an Kagurangnan,

²⁷“Aki nin tawo, naghohona an mga Israelita na an saimong mga bisyon saka mga propesiya ipinapanongod mo sa harayo pang panahon.

²⁸Kaya sabihan mo sinda na ako, an Kagurangnan Dios, an nagtataram: Dai na mahahaloy. Mangyayari na an sinabi ko. Ako, an Kagurangnan Dios, an nagtaram!”