Read Central Bicolano Ezekiel 13 Bible Online

Ezekiel 13 - Central Bicolano bible

Ezekiel 13

¹Nagtaram sako an Kagurangnan,

²“Aki nin tawo, magpropesiya ka laban sa mga propeta nin Israel, na nag-iimbento kan sadiri nindang propesiya. Sabihan mo sinda na magdangog sa tataramon nin Kagurangnan!”

³Ini an tataramon kan Kagurangnan Dios, “Herak man sa mga lolong na propeta na nagsusunod kan sadiri nindang espiritu asin nag-iimbento kan sadiri nindang mga bisyon.

⁴Banwaan nin Israel, an saimong mga propeta kabaing sa mga lobo na nag-eerok sa narumpag na syudad.

⁵Dai ninda binabantayan an mga narumpag na kabtang kan kudal ni hinihirahay iyan tanganing madepensahan an Israel pag-abot kan gera sa aldaw nin Kagurangnan.

⁶Bakong totoo an saindang mga bisyon asin kaputikan an saindang mga kapahayagan manongod sa maabot na panahon. Minasabi sindang ipinapahayag ninda an sakong mensahe, alagad dai ko sinda sinugo. Minsan siring, naghahalat sindang magkakatotoo an saindang pahayag!

⁷Sinasabihan ko sinda: Bakong totoo an mga bisyon na nahihiling nindo asin kaputikan an mga pahayag nindo manongod sa maabot na panahon. Minasabi kamo na mga tataramon ko iyan, alagad dai ako nagtaram saindo!”

⁸Kaya nagsasabi an Kagurangnan Dios sa sainda: “Kaputikan an saindong mga tataramon asin bakong totoo an saindong mga bisyon, kaya kalaban ko kamo.

⁹Papadusahan ko kamong mga propeta na naglaladawan nin bakong totoong mga bisyon asin kaputikan na pahayag manongod sa maabot na panahon. Dai kamo makakaayon sa pagtiripon kan sakong banwaan tanganing maggibo nin mga desisyon; an saindong mga ngaran dai makakabilang sa listahan kan mga syudadano nin Israel. Dai nanggad kamo makakabalik sa saindong daga. Dangan maaaraman nindo na ako an Kagurangnan Dios.

¹⁰“Dinadaya kan mga propeta an mga tawo sa pagsabi na an gabos matoninong maski ngani mayo man nin katoninongan. Kun an sakong banwaan minatugdok nin kudal, tinatapalan iyan nin karboro kan mga propeta.

¹¹Sabihan mo an mga propeta na an saindang kudal marurumpag. Mapadara ako nin makosog na uran. Tatamaan iyan kan uran nin yelo, asin hahampason iyan nin bagyo.

¹²Marurumpag an kudal, asin an lambang saro mahapot saindo kun anong karahayan an itinao kan pagtapal nindo nin karboro.”

¹³Kaya ini an tataramon nin Kagurangnan Dios: “Sa sakuyang kaanggotan, mapadara ako nin bagyo saka uran, nin makosog na uran, nin yelo tanganing rumpagon an kudal.

¹⁴Rurumpagon ko an kudal na tinapalan nindo nin karboro, tanganing mahiling an mga pundasyon. Marurumpag iyan asin magagadan kamo gabos. Dangan maaaraman nindo na ako an Kagurangnan.

¹⁵“An kaanggotan ko mamamatean kan kudal asin kan mga nagtapal kaiyan nin karboro. Dangan tataraman ko kamo na mayo na an kudal asin an mga nagtapal kaiyan nin karboro—

¹⁶idtong mga propeta na nagpahayag sa Jerusalem na matoninong an gabos maski mayo man nin katoninongan.” An Kagurangnan Dios an nagtaram.

¹⁷Nagtaram an Kagurangnan, “Ngunyan, aki nin tawo, hilinga an mga babae sa saimong banwaan na nagpopropesiya sa sadiri nindang isip. Magpropesiya ka laban sainda,

¹⁸asin sabihan mo sinda kan itinataram sainda kan Kagurangnan Dios: “Herak man saindo, mga babae! Minatahi kamo nin mga banda para sa takyag na may salamangka saka mga belo para sa payo nin lambang saro, tanganing magkaigwa sinda nin kapangyarihan sa buhay nin iba. Boot nindong makamtan an kapangyarihan sa buhay saka sa kagadanan kan sakong banwaan asin gamiton iyan para sa saindong karahayan.

¹⁹Linalanghad nindo ako sa atubang nin sakong banwaan tanganing magkaigwa sana kamo nin sarong hakbot nin sebada asin dikit na tinapay. Ginagadan nindo an mga tawong dai man dapat gadanon, asin tinutugotan nindong mabuhay an mga tawong dai dapat mabuhay. Nagpuputik kamo sa sakuyang banwaan, asin tinutubod ninda kamo.”

²⁰Kaya ini an tataramon nin Kagurangnan Dios: “Naoongis ako sa saindong mga banda na may salamangka, na ginagamit nindo sa paghingowang magkaigwa nin kapangyarihan sa buhay saka sa kagadanan. Rarapsingon ko iyan sa saindong mga takyag asin papatalingkason ko an mga tawo na nasa irarom kan saindong kapangyarihan.

²¹Rarapsingon ko man an saindong mga belo, asin papadulagon ko sa saindong kapangyarihan an sakuyang banwaan. Dangan maaaraman nindo na ako an Kagurangnan.

²²“Huli kan saindong kaputikan, pinapaluya nindo an boot kan mga matanos na tawo na habo ko man na kulogan. Inoolang nindo an mga maraot na tawo sa pag-ontok kan maraot nindang gibo asin ikaligtas an saindang buhay.

²³Kaya ngunyan, tapos na an saindong bakong totoong mga bisyon asin nakakaribong na pahayag manongod sa maabot na panahon. Ililigtas ko an sakong banwaan sa irarom kan saindong kapangyarihan, tanganing maaraman nindo na ako an Kagurangnan.”