Read Central Bicolano Ezekiel 14 Bible Online

Ezekiel 14 - Central Bicolano bible

Ezekiel 14

¹Nagkapira sa mga lider nin Israel an nagdolok sako sa paghapot kan kabotan nin Kagurangnan.

²Dangan nagtaram sako an Kagurangnan,

³“Aki nin tawo, idinusay kan mga lalaking ini an saindang puso sa mga dios-dios, asin tinutugotan ninda an mga ini na darahon sinda sa kasalan. Naghohona daw sinda na sisimbagon ko sinda?

⁴“Kaya kaolayon asin taraman mo sinda kun ano an itinataram ko, ako an Kagurangnan Dios: An lambang Israelita na magdusay kan saiyang puso sa mga dios-dios asin magtugot sa mga ini na darahon siya sa kasalan dangan makihumapot sa sarong propeta, makakakua nin simbag hale sako—an simbag na maninigo sa kadakul niyang dios-dios!

⁵Pinaharayo sa sako kan mga dios-dios na iyan an mga Israelita, alagad huli kan sakong simbag, linalaom kong magigin maimbod giraray sinda sako.

⁶“Kaya ngunyan sabihan mo an mga Israelita kan itinataram ko, an Kagurangnan Dios: Magbakle kamo asin bayae nindo an makauuyam nindong mga dios-dios.

⁷“Kun an saro sa mga Israelita o sa mga dayuhan na nag-eerok sa Israel an magtalikod sako, magdusay kan saiyang puso sa mga dios-dios, asin magtugot sa mga ini na darahon siya sa kasalan, dangan makihumapot sa sarong propeta, ako, an Kagurangnan, an masimbag saiya!

⁸Kakalabanon ko siya asin gigibohon kong sarong tanda asin ngingisihan. Hahaleon ko siya sa katiriponan nin sakuyang banwaan, tanganing maaraman nindo na ako an Kagurangnan.

⁹“Kun an sarong propeta nadagkang magtao nin salang kasimbagan, nangyari iyan huli ta ako, an Kagurangnan, an nagdagka saiya. Hahaleon ko siya sa sakuyang banwaan nin Israel.

¹⁰Maako nin parehong padusa an propeta asin an nakihumapot saiya.

¹¹Gigibohon ko ini tanganing an mga Israelita dai magbaya sako asin dai magdigta kan saindang sadiri huli sa saindang mga kasalan, tanganing sinda an magin banwaan ko asin ako an magin Dios ninda.” An Kagurangnan Dios an nagtaram.

¹²Nagtaram sako an Kagurangnan,

¹³“Aki nin tawo, kun an sarong daga nagkakasala asin nagigin bakong maimbod sa sako, uunaton ko an sakong kamot asin raraoton ko an ginigikanan kan saindang kakanon. Mapadara ako nin makuring gutom asin gagadanon ko an mga tawo saka mga hayop.

¹⁴Maski pa nag-eerok duman idtong tolong lalaki na si Noe, Danel, asin Job, an ikakaligtas sana kan saindang katanosan iyo an sadiri nindang buhay.” An Kagurangnan Dios an nagtaram.

¹⁵“Pwede man na magpadara ako nin mga lalaw na hayop tanganing gadanon an mga tawo. An daga mapapano nin pag-alaman asin mayo na nin makakaagi diyan.

¹⁶Maski pa nag-eerok duman an nasabing tolong lalaki, mantang ako an Kagurangnan Dios na buhay, dai ninda pwedeng ikaligtas maski an saindang mga aki. An ikakaligtas sana kan saindang katanosan iyo an sadiri nindang buhay, asin an daga makakaarog sa sarong kalangtadan.

¹⁷“Pwede man na darahan ko nin gera an dagang idto asin magpadara nin nakakaraot na armas na magadan kan mga tawo saka mga hayop.

¹⁸Maski pa nag-eerok duman an nasabing tolong lalaki, mantang ako an Kagurangnan Dios na buhay, dai ninda pwedeng ikaligtas maski an saindang mga aki, kundi an sadiri sana nindang buhay.

¹⁹“Kun magpadara ako nin peste sa dagang idto, asin sa sakong kaanggotan gadanon ko an mga tawo saka mga hayop,

²⁰maski pa nag-eerok duman si Noe, si Danel, saka si Job, mantang ako an Kagurangnan Dios na buhay, dai ninda pwedeng ikaligtas maski an saindang mga aki. An ikakaligtas sana kan saindang katanosan iyo an sadiri nindang buhay.”

²¹Ini an tataramon nin Kagurangnan Dios: “Mapadara ako nin apat na mangirhat na padusa sa Jerusalem—gera, makuring gutom, lalaw na mga hayop, asin peste—tanganing gadanon an mga tawo saka mga hayop.

²²Kun igwang matadang buhay sa sainda asin ikinaligtas man ninda an saindang mga aki, maanan mo sinda kun magdolok sinda saimo. Mahihiling mo na mga maraot sinda asin masasabotan mo na matanos an pagpadusa ko sa Jerusalem;

²³dangan maaaraman mo na may marahay na dahelan an gabos na ginibo ko.” An Kagurangnan Dios an nagtaram.