Read Central Bicolano Ezekiel 16 Bible Online

Ezekiel 16 - Central Bicolano bible

Ezekiel 16

²“Aki nin tawo, pamidbidan sa Jerusalem an makauuyam na mga bagay na ginibo niya.

³Sabihan mo an Jerusalem kun ano an itinataram saiya kan Kagurangnan Dios: “Namundag ka sa daga nin Canaan. Sarong Amoreo an saimong ama asin sarong Hetea an saimong ina.

⁴Kan mamundag ka, mayo nin nagputol kan saimong pusod, o nagkarigos saimo o naghaplas nin asin o nagpatos saimo nin lampin.

⁵Mayo nin naherak na gibohon saimo an mga bagay na ini. Kan mamundag ka, ikinaongis ka na. Itinapok ka sa oma.

⁶“Dangan nag-agi ako asin nahiling takang nagkakarigos sa sadiring dugo, alagad dai taka pinabayaan na magadan.

⁷Pinadakula taka siring sa matubang na tinanom. Nagdakula ka, kuminosog asin nagin arog sa sarong daraga. Bilog na bilog an saimong mga suso asin naghalaba an saimong buhok, alagad huba ka.

⁸“Pag-agi ko giraray, nahiling kong panahon na tanganing mamoot ka. Tinahoban ko kan sakong alikboy an huba mong hawak, saka nanuga akong mamomotan taka. Nakipagtipan ako saimo kaya nagin sadiri taka.” Ini an tataramon nin Kagurangnan Dios.

⁹“Dangan kinarigos taka nin tubig asin hinale an dugo sa saimong hawak. Linahidan taka nin lana.

¹⁰Ginubingan taka nin binurdahan na gubing asin tinawan nin sapatos na anit, nin turban na lino asin sedang alikboy.

¹¹Sinulotan taka nin mga alahas—mga pulseras asin mga kulintas.

¹²Binugtakan ko nin hikaw an saimong dungo asin mga talinga, asin kinoronahan taka.

¹³Igwa ka nin mga alahas na bulawan saka plata, asin danay kang nakagubing nin purong lino saka seda na gabos binurdahan. Nagkakan ka nin tinapay na gibo sa pinakamarahay na arina, asin igwa ka nin dugos saka lana nin oliba na saimong kakanon. Guminayon ka nin marahay asin nagin sarong reyna.

¹⁴Nabantog ka sa lambang nasyon huli kan saimong mayong kaninan na kagayonan, huli ta ako an nagpagayon saimo.” Ini an tataramon nin Kagurangnan Dios.

¹⁵“Alagad ginamit mo an saimong kagayonan asin kabantogan tanganing makidorog sa kiisay man na mag-agi.

¹⁶Ginamit mo an iba mong gubing tanganing samnohan an saimong mga lugar na pagsasambahan, asin arog sa sarong maraot na babae, itinao mo an hawak mo sa kiisay man.

¹⁷Kinua mo an mga alahas na bulawan saka plata na itinao ko saimo, dangan ginamit mo iyan sa paggibo nin lalaking mga dios-dios, asin nakidorog ka sa mga ini.

¹⁸Kinua mo an binurdahan na mga gubing na itinao ko dangan isinulot mo sa mga dios-dios. An lana nin oliba asin an insenso na itinao ko inatang mo sa mga dios-dios.

¹⁹Tinawan taka nin kakanon—an pinakamarahay na arina, lana nin oliba asin dugos—alagad an mga ini idinolot mo bilang atang tanganing mawilihan ka kan mga dios-dios.” Ini an tataramon nin Kagurangnan Dios.

²⁰“Dangan kinua mo an mga aking lalaki asin babae na nagin aki ko saimo asin isinakripisyo mo sa mga dios-dios. Kulang pa daw an saimong pagkabakong maimbod sako

²¹kaya isinakripisyo mo pa an sakong mga aki sa mga dios-dios?

²²Sa makauuyam mong buhay bilang maraot na babae, dai mo man lamang nagiromdoman an mga aldaw kan ika aki pa—kan huba ka asin nagkakarigos sa sadiri mong dugo.”

²³Nagtaram an Kagurangnan Dios, “Herak man saimo! Ginibo mo an gabos na karatan na iyan, dangan

²⁴sa gilid kan lambang dalan nagtugdok ka nin mga lugar na pagsasambahan sa mga dios-dios asin mga lugar nin pagdodorogan.

²⁵An saimong kagayonan ilinabog mo sa laboy. Idinolot mo an saimong hawak sa kiisay man na nag-agi, asin aroaldaw nagdugang an saimong pagkani-maraot na babae.

²⁶Nakidorog ka sa marompot mong mga kataed, an mga Egipcio, asin ginamit mo an saimong pagkani-maraot na babae tanganing paanggoton ako.

²⁷“Kaya ibinikyaw ko na ngunyan an sakong kamot sa pagpadusa saimo asin sa paghale kan saimong kahirasan sa sakong mga bendisyon. Itinao taka sa kamot kan mga Filisteo, na naoongis saimo asin nauuyam sa marompot mong mga gibo.

²⁸“Huli ta dai ka nakontento sa iba, nakidorog ka man sa mga taga Asiria. Nagin kadorogan ka ninda, alagad dai ka man giraray nakontento sainda.

²⁹Nakidorog ka man sa mga taga Babilonia, an nasyon kan mga negosyante, alagad dai ka man giraray nakontento sainda.”

³⁰Ini an tataramon nin Kagurangnan Dios: “Ginibo mo ini gabos siring sa sarong daing sopog na maraot na babae.

³¹Sa gilid nin lambang dalan nagtugdok ka nin mga lugar na pagsasambahan sa mga dios-dios asin mga lugar nin pagdodorogan. Alagad iba ka man sa ordinaryong maraot na babae huli ta nakikidorog ka bakong huli sa kwarta.

³²Arog ka sa sarong babaeng nakikidorog sa mga dayuhan embes na mamotan an saiyang agom.

³³An ordinaryong maraot na babae binabayadan, alagad ika pa an nagreregalo sa mga kadorogan mo asin nagsusuhol sainda tanganing magduman dangan makidorog saimo.

³⁴Ibang klase kang maraot na babae. Mayo nin nagpirit saimo na magin siring kaiyan. Dai ka binayadan ninda, ika an nagbayad sainda! Kaya iba ka man nanggad.”

³⁵Kaya ngunyan, Jerusalem, maraot na babae, dangoga an tataramon nin Kagurangnan.

³⁶Ini an tataramon nin Kagurangnan Dios: “Huli ta hinuba mo an saimong mga gubing, asin siring sa sarong maraot na babae, itinao mo an saimong hawak sa mga kadorogan mo asin sa makauuyam mong mga dios-dios, dangan ginadan mo an saimong mga aki bilang sakripisyo sa mga dios-dios,

³⁷kaya uya, titiponon ko an mga dati mong kadorogan—an mga namotan mo asin an mga naongisan mo. Dadarahon ko sinda sa palibot mo dangan huhubaan taka tanganing mahiling ninda an saimong pagkani-huba.

³⁸Kokondenaron taka huli kan pakidorog mo sa bako mong agom asin huli kan saimong panggagadan. Dangan sa sakong kaanggotan asin pag-imon, papadusahan taka nin kagadanan.

³⁹Itatao taka sa saindang kapangyarihan, asin rurumpagon ninda an mga lugar saen nagsamba ka asin nakidorog. Kukuahon ninda an saimong mga gubing saka mga alahas, dangan babayaan ka nindang huba nanggad.

⁴⁰“Madara sinda nin sarong hukbo na magapo saimo, asin pepedasohon ka ninda kan saindang mga espada.

⁴¹Susuloon ninda an saimong mga harong asin papadusahan ka ninda sa atubang nin dakul na babae. Oontokon ko an saimong pagigin maraot na babae asin an pagtao mo nin mga regalo sa mga kadorogan mo.

⁴²Dangan mahahale an sakong kaanggotan asin matotoninong ako. Dai na ako maaanggot asin mag-iimon.

⁴³Nalingawan mo kun pano taka inataman kan ika aki pa, asin pinaanggot mo ako huli kan gabos na ginibo mo. Kaya pinabayad taka kan gabos na iyan. Tadaw ta dinugangan mo nin karompotan an makauuyam na mga bagay na ginibo mo?” An Kagurangnan Dios an nagtaram.

⁴⁴Nagtaram an Kagurangnan, “Gagamiton kan mga tawo an talinhagang ini manongod saimo, Jerusalem: ‘Kun ano an ina, iyo man an aking babae.’

⁴⁵Ika mananggad an aking babae kan saimong ina. Ikinaongis niya an saiyang agom saka mga aki. Arog ka kan saimong mga tugang na babae, na naoongis sa saindang agom saka mga aki. Ika asin an mga tugang mong syudad igwa nin inang Hetea asin amang Amoreo.

⁴⁶“An matua mong tugang na babae, kaiba an saiyang mga baryo, iyo an Samaria, sa amihan. An ngohod mong tugang na babae, kaiba an saiyang mga baryo, iyo an Sodoma, sa habagat.

⁴⁷Alagad dai ka nakontento sa paglakaw sa saindang mga dalan asin sa pag-arog kan makauuyam nindang gibo. Sa halipot sanang panahon nagin mas marompot ka pa ki sa sainda.

⁴⁸“Mantang ako an Kagurangnan Dios na buhay, an karatan na ginibo kan babae mong tugang na iyo an Sodoma saka an saiyang mga baryo dai nanggad makakapantay sa karatan na ginibo mo asin kan saimong mga baryo.

⁴⁹Nag-orgulyo siya asin an saiyang mga aking babae huli ta igwa sinda nin dakul na kakanon asin nag-eerok sa katoninongan, alagad dai ninda inataman an mga dukha saka an mga daing sukat.

⁵⁰Mapaabaw-abaw sinda saka matagas an payo, asin ginibo ninda an mga bagay na habo ko, kaya tinunaw ko sinda siring sa naaaraman mo.

⁵¹“An kasalan kan Samaria dai man lamang nakabanga sa mga kasalan mo. Mas dakul na makauuyam na mga gawe an ginibo mo. Huli kan karompotan mo, an mga tugang mong babae garo nagin matanos kun ibaing an ginibo ninda sa naginibo mo.

⁵²Kaya ngunyan tioson mo an kasosopgan. Mas dakul an mga kasalan mo ki sa mga kasalan kan mga tugang mong babae, kaya garo matanos sinda kun ibaing saimo. Kaya masopog ka asin tioson mo an pagkawara kan saimong onra, huli ta ginibo mong garo mabini an saimong mga tugang na babae.”

⁵³Tinaraman nin Kagurangnan an Jerusalem, “Papauswagon ko giraray sinda—an Sodoma saka an saiyang mga baryo, asin an Samaria saka an saiyang mga baryo. Ika man, papauswagon ko giraray.

⁵⁴Ikakasopog mo an saimong sadiri, asin ipapahiling kan saimong kasosopgan an kauswagan kan mga tugang mong babae.

⁵⁵An Sodoma, an Samaria asin ika, sagkod an saindong mga baryo, magigin mauswag giraray.

⁵⁶Bakong ginibo mong ngingisihan an Sodoma kan panahon nin saimong kapaabaw-abawan,

⁵⁷asin bago nahayag an saimong karatan? Ngunyan nakakaarog ka man saiya—sarong ngingisihan para sa mga Edomita, sa mga Filisteo asin sa mga kanatad mong naoongis saimo.

⁵⁸Kaipuhan tioson mo an padusa kan saimong karompotan, kan makauuyam na mga bagay na ginibo mo.” An Kagurangnan an nagtaram.

⁵⁹Ini an tataramon kan Kagurangnan Dios, “Gigibohon ko saimo an maninigo sa mga ginibo mo, huli ta dai mo pinahalagahan an saimong mga panuga asin tinalikodan mo an tipan.

⁶⁰Alagad gigiromdomon ko an tipan ko sa saimo kan ika aki pa, dangan makikipagtipan ako saimo nin sarong tipan na magdadanay sagkod lamang.

⁶¹Magigiromdoman mo an mga ginibo mo dangan ikakasopog mo iyan kun makua mo na giraray an matua asin an ngohod mong mga tugang na babae. Gigibohon ko sindang garo mga aki mong babae, maski bako man ini kaayon sa tipan ko saimo.

⁶²Babagohon ko an tipan ko saimo dangan maaraman mo na ako an Kagurangnan.

⁶³Papatawadon ko an mga karatan na naginibo mo, alagad magigiromdoman mo an mga iyan asin masosopog ka maski sa pagbuka kan saimong ngoso.” An Kagurangnan Dios an nagtaram.