Read Central Bicolano Ezekiel 17 Bible Online

Ezekiel 17 - Central Bicolano bible

Ezekiel 17

¹Nagtaram sako an Kagurangnan,

²“Aki nin tawo, isaysay mo sa mga Israelita an sarong parabola

³tanganing maaraman ninda an itinataram ko sainda, ako an Kagurangnan Dios: Igwa kaidto nin sarong dakulang agila na may magayon na mga balukag saka dakulang mga pakpak. Naglayog ini pasiring sa kabukidan nin Lebanon asin binari an poro kan sarong kahoy na sedro,

⁴dangan dinara sa sarong daga nin komersyo asin sarong syudad nin mga negosyante.

⁵Dangan nagkua siya nin sarong sadit na tinanom hale sa daga nin Israel asin itinanom sa sarong matubang na daga, na danay na igwa nin tubig.

⁶Nagtalubo an tinanom asin nagin sarong hababa saka marambong na balagon nin ubas. An mga sanga nagtalubo paitaas, sa direksyon kan agila, asin an mga gamot uminirarom nin marahay. An balagon napano nin mga sanga saka mga dahon.

⁷“Igwa nin saro pang dakulang agila na may magayon na mga balukag saka dakulang mga pakpak. Ngunyan linaen kan balagon an direksyon kan saiyang mga gamot saka mga sanga; pasiring na ini ngunyan sa agilang ini sa paglaom na matatawan siya kaini nin mas dakul na tubig ki sa lugar na namumugtakan niya.

⁸Alagad an balagon nakatanom na sa sarong matubang asin matubig na oma, tanganing magkaigwa siya nin dakul na sanga saka bunga, dangan magin sarong magayon na balagon.

⁹“Kaya ako, an Kagurangnan Dios, naghahapot: Mabubuhay daw asin magtatalubo an balagon na ini? Dai daw iyan gagaboton kan enot na agila, puputolon an mga sanga dangan papabayaan na maalang? Dai na kaipuhan an sarong makosog na kamot o sarong mapangyaring nasyon tanganing gaboton iyan.

¹⁰Totoo, itinanom na iyan, alagad magtatalubo daw iyan asin mabubuhay? Dai daw iyan maaalang kun hampason iyan kan doros na gikan sa sirangan? Dai daw iyan maalang sa saiyang namumugtakan?”

¹¹Nagtaram sako an Kagurangnan,

¹²“Hapota an mga rebeldeng iyan kun aram ninda an kahulogan kan parabola. Taraman mo sinda na an hade nin Babilonia nagduman sa Jerusalem, binihag an hade asin an mga opisyal kaini dangan dinara pagbalik niya sa Babilonia.

¹³Kinua niya an saro sa mga pamilya kan hade, nakipagtipan digdi dangan pinasumpa na ini magigin maimbod saiya. Ginibo niyang bihag an mga ginagalangan na lalaki

¹⁴tanganing dai makatindog laban saiya, kundi magkuyog nanggad kan saiyang tipan.

¹⁵Alagad nagrebelde saiya an hade nin Juda asin nagpadara nin mga sugo sa Egipto tanganing magkua nin mga kabayo asin nin sarong dakulang hukbo. Manggana daw siya? Makakaligtas daw an naggibo kaiyan? Pwede daw niyang salungaton an tipan asin makaligtas sa padusa?

¹⁶“Mantang ako an Kagurangnan Dios na buhay, magagadan sa Babilonia an hadeng iyan, huli ta dai niya inotob an saiyang panuga asin an tipan na ginibo niya sa hade nin Babilonia, na nagbugtak saiya sa trono.

¹⁷Maski an mapangyaring hukbo kan hade nin Egipto dai makakatabang saiya sa pakilaban kun an mga taga Babilonia magtambak na nin daga asin magkalot na nin mga trinsera tanganing makagadan nin dakul na tawo.

¹⁸Linapas niya an saiyang panuga asin an tipan na ginibo niya. Ginibo niya an mga ini, asin ngunyan dai siya makakadulag.”

¹⁹Kaya ini an tataramon nin Kagurangnan Dios: “Mantang ako an Dios na buhay, papadusahan ko siya huli kan paglapas niya sa tipan na sinumpaan niyang ootobon sa ngaran ko.

²⁰Bibikladon ko an sarong hikot tanganing madakop siya. Dadarahon ko siya sa Babilonia asin papadusahan duman, huli ta dai siya nagin maimbod sakuya.

²¹Magagadan sa gera an pinakamarahay niyang mga soldados, asin an mga matatada magkakawararak sa gabos na direksyon. Dangan maaraman nindo na ako, an Kagurangnan, an nagtaram.”

²²Ini an tataramon nin Kagurangnan Dios: “Makua ako nin sarong lumbod na sanga sa alitoktok nin sarong halangkaw na kahoy na sedro; Itatanom ko iyan sa halangkaw na bukid,

²³sa pinakahalangkaw na bukid nin Israel. Magkakaigwa iyan nin mga sanga asin mga bunga, dangan magigin sarong magayon na kahoy na sedro. Manlaen-laen na klase nin gamgam an mag-eerok diyan, asin magpapaili sa limpoy kaiyan.

²⁴An gabos na kahoy sa daga makakaaram na ako an Kagurangnan. Pinapalod ko an mga halangkaw na kahoy asin pinapahalangkaw an mga hababang kahoy. Pinapaalang ko an mga berdeng kahoy, asin pinapangagin berde an mga alang na kahoy. Ako, an Kagurangnan, an nagtaram, asin gigibohon ko iyan.”