Read Central Bicolano Ezekiel 18 Bible Online

Ezekiel 18 - Central Bicolano bible

Ezekiel 18

¹Nagtaram sako an Kagurangnan,

²“Ano ining talinhaga na pinag-uulit-ulit kan mga tawo sa daga nin Israel? ‘An mga magurang an nagkakan kan maalsom na ubas, Alagad an mga aki iyo an nangilohan.’

³“Mantang ako an Kagurangnan Dios na buhay, an talinhagang ini dai na nanggad madadangog sa Israel.

⁴Kapot ko an buhay nin lambang tawo, an buhay kan magurang asin kan aki. An tawong nagkakasala iyo an magagadan.

⁵“Halimbawa igwa nin sarong lalaking totoong marahay, matanos saka onesto.

⁶Dai siya nagsasamba sa mga dios-dios kan mga Israelita asin dai nagkakakan kan mga sakripisyong idinolot sa mga ipinapangalad na lugar na pagsasambahan. Dai niya dinadagkang magkasala an agom nin iba asin dai siya nakikidorog sa babaeng nasa panahon nin pagregla.

⁷Dai siya nandadaya o nanghahabon sa kiisay man. Ipinupuli niya an bagay na isinangra kan nag-utang saiya; pinapakakan niya an nagugutom asin ginugubingan an mga huba.

⁸Dai siya nagpapautang na may patubo. Minasayuma siya sa paggibo nin maraot asin nagtatao siya nin matanos na sentensya sa anoman na kaso.

⁹An siring na tawo nag-ootob kan sakong mga togon asin maingat na nagsusunod kan sakong mga pagboot. Matanos siya asin mabubuhay nanggad,” olay nin Kagurangnan Dios.

¹⁰“Halimbawa an tawong ini igwa nin aking lalaki na mahabon asin paragadan, na minagibo kan mga bagay

¹¹na dai ginibo kan ama. Kinakakan niya an mga sakripisyong idinolot sa mga ipinapangalad na lugar na pagsasambahan, asin dinadagka niyang magkasala an agom nin iba.

¹²Dinadaya niya an mga dukha, nanghahabon siya asin dai niya ipinupuli an isinangra kan nag-utang saiya. Nagduduman siya sa mga paganong altar asin nagsasamba sa makauuyam na mga dios-dios,

¹³dangan nagpapautang na may patubo. Mabubuhay daw siya? Dai nanggad! Ginibo niya an makauuyam na mga bagay na ini, kaya magagadan siya. Siya an babasolon sa sadiri niyang kagadanan.

¹⁴“Halimbawa an tawong ini igwa nin aking lalaki, na nakahiling kan mga kasalan na ginibo kan saiyang ama, alagad dai niya inaarog.

¹⁵Dai siya nagsasamba sa mga dios-dios kan mga Israelita o nagkakakan kan mga sakripisyo na idinolot sa ipinapangalad na lugar na pagsasambahan. Dai niya dinadagkang magkasala an agom nin iba,

¹⁶dai nang-aapi o nanghahabon. Ipinupuli niya an isinangra kan nag-utang saiya. Pinapakakan niya an nagugutom asin ginugubingan an huba.

¹⁷Nagsasayuma siyang maggibo nin maraot asin dai nagpapautang na may patubo. Sinusunod niya an sakong mga togon asin kinukuyog an sakong mga pagboot. Dai siya magagadan huli kan kasalan kan saiyang ama, kundi totoong mabubuhay.

¹⁸Alagad an saiyang ama, na nandaya asin nanghabon patin danay na naggibo nin maraot sa iba, magagadan huli kan mga kasalan na siya mismo an naggibo.

¹⁹“Alagad minahapot kamo, ‘Tadaw ta dai magtios an aki huli sa mga kasalan kan saiyang ama?’ An simbag iyo na an aki naggibo kan matanos saka marahay. Inotob niya an sakong mga pagboot asin maingat na sinunod iyan, kaya totoong mabubuhay siya.

²⁰An nagkakasala iyo an magagadan. An aki dai magtitios huli sa mga kasalan kan saiyang ama, asin an ama dai magtitios huli sa kasalan kan saiyang aki. An marahay na tawo babalosan sosog sa marahay na naginibo niya, asin an maraot na tawo magtitios huli sa maraot na naginibo niya.

²¹“Kun an maraot na tawo mag-ontok sa saiyang pagkakasala dangan mag-otob kan sakong mga pagboot, asin maggibo kan matanos saka marahay, dai siya magagadan; totoong mabubuhay siya.

²²Papatawadon an gabos niyang kasalan asin mabubuhay siya, huli ta naggibo siya kan matanos.

²³Sa paghona mo naoogma ako kun nagagadan an sarong maraot na tawo?” an hapot kan Kagurangnan Dios. “Dai, mas boot ko pang magsolsol siya dangan mabuhay.

²⁴“Alagad kun an sarong matanos na tawo mag-ontok sa paggibo nin marahay dangan magpoon sa paggibo nin maraot saka makauuyam na mga bagay na ginigibo kan mga tampalasan, padagos daw siyang mabubuhay? Dai! Mayo sa mga matanos na bagay na ginibo niya an magigiromdoman. Magagadan siya, huli ta dai siya nagin maimbod asin huli kan saiyang mga kasalan.

²⁵“Alagad minataram kamo, ‘Bakong tama an gibo kan Kagurangnan Dios.’ Pagdangog kamo sako, kamong mga Israelita. Naghohona kamo na bakong tama an mga palakaw ko? An mga palakaw nindo iyo an bakong tama.

²⁶Kun an sarong matanos na tawo mag-ontok sa paggibo nin matanos asin magpoon sa paggibo nin maraot dangan nagadan, nagadan siya huli kan karatan na ginibo niya.

²⁷Kun an sarong maraot na tawo mag-ontok sa pagkakasala asin maggibo nin matanos saka marahay, iliniligtas niya an saiyang buhay.

²⁸Pinaghorophorop niya an saiyang gibo dangan nagtalikod siya sa gabos na kasalan na naginibo niya, kaya dai siya magagadan kundi mabubuhay.

²⁹Alagad minasabi kamong mga Israelita, ‘Bakong tama an ginigibo nin Kagurangnan Dios.’ Naghohona kamo na bakong tama an mga palakaw ko? An mga palakaw nindo iyo an bakong tama.

³⁰“Kaya ako, an Kagurangnan Dios, an mahukom sa saindong mga Israelita, sosog sa mga ginibo nindo. Magtalikod na kamo sa gabos nindong kasalan, asin dai kamo magtugot na matunaw kamo huli kan saindong kasombikalan.

³¹Bayaan nindo an gabos na kasalan na naginibo nindo tumang sako, asin magkua kamo para saindo nin bagong puso saka bagong espiritu! Kamong mga Israelita, tadaw ta boot nindong magadan?

³²Dai ko mawot na magadan an siisay man,” olay nin Kagurangnan Dios. “Kaya magtalikod na kamo sa saindong mga kasalan tanganing mabuhay.”