Read Central Bicolano Ezekiel 19 Bible Online

Ezekiel 19 - Central Bicolano bible

Ezekiel 19

¹Tinaraman ako nin Kagurangnan na awiton an panambitan na ini para sa duwang prinsipe nin Israel:

²Garo nanggad babaeng leon an saimong ina! Pinadakula niya an saiyang mga ogbon sa tahaw nin maringis na lalaking mga leon.

³Pinadakula niya an sarong ogbon asin tinukdoan na maghanap nin kakanon; ini nagin parakakan nin tawo.

⁴Nagpatanid an mga nasyon laban saiya; nadakop siya sa saro nindang kalot. Dinara siya ninda sa Egipto sa paagi nin mga kawit.

⁵Haloy na naghalat an inang leon sagkod na mawaraan siya nin paglaom. Dangan pinadakula niya an saro pa niyang ogbon, asin nagdakula ining sarong maringis na leon.

⁶Kan dakula na ini, naglibot ini kaiba an ibang mga leon, asin nakanood na maghanap nin kakanon, ini nagin parakakan man nin tawo.

⁷Rinumpag kaini an mga bantayan, rinaot an mga banwa. Natakot saiya an mga tawo sa daga, sa lambang pag-ungal niya.

⁸Nagtiripon an mga nasyon laban saiya; nag-abot an mga tawo hale sa manlaen-laen na lugar. Biniklad ninda an saindang mga pandakop na hikot, asin nadakop siya ninda.

⁹Ibinugtak siya ninda sa sarong hawla dangan dinara sa hade nin Babilonia. Binantayan siya ninda, tanganing an saiyang pag-ungal dai na nanggad madangog sagkod pa man sa kabukidan nin Israel.

¹⁰An saimong ina arog sa sarong tinanom na ubas, na itinanom sa tampi nin sapa. Huli ta dakul an tubig, an tinanom nagin madahon saka mabunga.

¹¹Makokosog an mga sanga kaiyan asin nagin mga setro nin hade. An tinanom na ubas naghalangkaw sagkod sa mga panganoron; nahiling kan gabos na totoong halangkaw asin madahon.

¹²Alagad ginabot ini nin anggot na mga kamot dangan itinapok sa daga. An mga bunga kaini naalang sa huyop kan doros na hale sa sirangan. Binari an mga sanga kaini, naalang dangan sinulo.

¹³Ngunyan nakatanom ini sa desyerto, sa sarong alang asin mamarang daga.

¹⁴Nasulo an poon kaini; natutong an mga sanga asin mga bunga. An mga sanga dai na nanggad magigin makosog, dai na nanggad magigin mga setro nin hade. Saro ining awit nin panambitan; danay ining inaawit.