Read Central Bicolano Ezekiel 20 Bible Online

Ezekiel 20 - Central Bicolano bible

Ezekiel 20

¹Kan ikasampolong aldaw kan ikalimang bulan kan ikapitong taon nin samong pagkatapokan, dinolok ako kan nagkapira sa mga kamagurangan nin Israel tanganing makihumapot dapit sa kabotan nin Kagurangnan, asin nagturukaw sinda sa atubangan ko.

²Dangan nagtaram sako an Kagurangnan,

³“Aki nin tawo, magtaram ka sa mga tawong ini asin sabihan mo sinda na ini an tataramon kan Kagurangnan Dios: Bakong nagdigdi kamo sa paghapot kan sakong kabotan? Siring na ako an Dios na buhay, dai ako matugot na maghapot kamo sako. Ako, an Kagurangnan Dios, an nagtaram.

⁴“Aki nin tawo, andam ka na sa paghukom sainda? Kun siring giboha na. Pagiromdoma sinda kan makauuyam na mga bagay na ginibo kan saindang mga ginikanan.

⁵Sabihan mo sinda kan itinataram ko. Kan pilion ko an Israel, nanuga ako sainda. Nagpamidbid ako sainda sa Egipto asin tinaraman ko sinda: Ako an Kagurangnan na saindong Dios.

⁶Kan aldaw na idto nanuga ako na iluluwas ko sinda sa Egipto asin dadarahon sa dagang pinili ko para sainda, sarong mayaman na daga, an pinakamarahay sa gabos na daga.

⁷Tinaraman ko sindang itapok an makauuyam na mga bagay na namomotan ninda asin na dai ninda pagdigtaan an saindang sadiri huli kan mga dios-dios nin Egipto, huli ta ako an Kagurangnan na saindang Dios.

⁸Alagad nagtumang sinda sako asin dai ninda ako dinangog. Dai ninda itinapok an makauuyam na mga bagay na namotan ninda, asin dai ninda binayaan an mga dios-dios nin Egipto. Andam na kuta akong iula sainda an labi-labi kong kaanggotan duman sa Egipto.

⁹Alagad dai ko iyan ginibo, huli ta mapapasopog an sakong ngaran, huli ta sa atubang kan mga nasyon, saen nag-erok sinda, nagpahayag ako sa mga Israelita na iluluwas ko sinda sa Egipto.

¹⁰“Kaya ilinuwas ko sinda sa Egipto pasiring sa kalangtadan.

¹¹Itinao ko sainda an sakong pagboot asin tinukdoan ko sinda kan sakong mga katogonan, na magdadara nin buhay sa kiisay man na nagkukuyog kan mga iyan.

¹²Pinaotob ko sainda an Sabbath bilang tanda kan samong tipan, tanganing pagiromdomon sinda na ako, an Kagurangnan, iyo an nagpapabanal sainda.

¹³Alagad maski sa kalangtadan, sinuhay ninda ako. Dai sinda naglakaw sosog sa sakong mga pagboot asin tinalikodan ninda an sakong mga togon, na nagtatao nin buhay sa kiisay man na nagkukuyog kan mga iyan. Linapas ninda an Sabbath. Andam na kuta akong iula sainda an labi-labi kong kaanggotan duman sa kalangtadan asin gadanon sinda.

¹⁴Alagad dai ko iyan ginibo huli ta mapapasopog an sakong ngaran sa atubang kan mga nasyon na nakahiling kan iluwas ko an Israel hale sa Egipto.

¹⁵Kaya nagsumpa ako sainda duman sa kalangtadan na dai ko sinda dadarahon sa daga na itinao ko sainda, sarong mayaman na daga, an pinakamarahay sa gabos na daga.

¹⁶Nagsumpa ako huli ta isinikwal ninda an sakong mga pagboot. Dai sinda naglakaw sosog sa sakong mga togon asin linapas ninda an Sabbath. Pinaorog ninda an pagsamba sa mga dios-dios.

¹⁷“Alagad naherak ako sainda; dai ko sinda ginadan duman sa kalangtadan.

¹⁸Embes kaiyan, pinatanidan ko an saindang kaakian: Dai kamo magsunod sa mga katogonan kan saindong mga ginikanan; dai nindo pag-arogon an saindang mga kaugalean, ni pagdigtaan an saindong sadiri, huli kan saindang mga dios-dios.

¹⁹Ako an Kagurangnan na saindong Dios. Otobon nindo an sakong mga katogonan asin mga pagboot.

²⁰Pakabanala nindo an Sabbath, tanganing magin tanda iyan kan tipan na ginibo nyato asin magpapagiromdom saindo na ako an Kagurangnan na saindong Dios.

²¹“Alagad an henerasyon na idto nagtumang man sako. Dai sinda naglakaw sosog sa sakong mga pagboot asin sinuhay ninda an sakong mga togon, na nagdadara nin buhay sa kiisay man na nagkukuyog kan mga iyan. Linapas ninda an Sabbath. Andam na kuta akong iula sainda an labi-labi kong kaanggotan duman sa kalangtadan asin gadanon sinda.

²²Alagad dai ko iyan ginibo huli ta mapapasopog an sakuyang ngaran sa atubang kan mga nasyon na nakahiling kan iluwas ko an Israel hale sa Egipto.

²³Kaya saro pang sumpa an ginibo ko duman sa kalangtadan. Nagsumpa ako na iwawarak ko sinda gabos sa mga nasyon,

²⁴huli ta dai ninda kinuyog an sakong mga pagboot; linapas ninda an sakong mga togon asin an Sabbath, saka sinamba ninda an parehong mga dios-dios na pinaglingkodan kan saindang mga ginikanan.

²⁵“Dangan tinawan ko sinda nin mga pagboot na bakong marahay asin mga togon na dai nagdadara nin buhay.

²⁶Tinugotan ko sindang digtaan an saindang sadiri huli kan saindang mga atang, asin pinabayaan ko sindang isakripisyo an saindang mga panganay na lalaki, tanganing matakot sinda asin mamidbid ninda na ako an Kagurangnan.

²⁷“Kaya ngunyan, aki nin tawo, isabi mo sa mga Israelita kun ano an itinataram ko, an Kagurangnan Dios: Saro pa ining paagi nin paglanghad sako kan saindang mga ginikanan, huli kan saindang pagigin bakong maimbod sako.

²⁸Dinara ko sinda sa daga na ipinanuga ko sainda. Kan mahiling ninda an mga halangkaw na bulod asin an mga berdeng kahoy, dinolotan ninda nin sakripisyo an mga ini. Pinaanggot ninda ako huli kan saindang mga tinutong na sakripisyo asin mga dolot na arak.

²⁹Hinapot ko sinda: Ano ining halangkaw na mga lugar na dinudumanan nindo? Kaya sagkod ngunyan inaapod idtong ‘Halangkaw na mga Lugar.’

³⁰Kaya isabi mo sa mga Israelita na ini an tataramon ko: tadaw ta dinidigtaan nindo an saindong sadiri arog kan saindong mga ginigikanan, asin linalamag nindo an saindang mga dios-dios?

³¹Sagkod ngunyan nagdodolot kamo nin parehong mga atang asin dinidigtaan nindo an saindong sadiri, huli kan pagdolot nindo kan saindong mga aki bilang tinutong na sakripisyo sa mga dios-dios na ini. Dangan mahapot pa kamong mga Israelita kun ano an sakong kabotan! Siring na ako an Kagurangnan Dios na buhay, dai ako matugot na maghapot kamo sako.

³²Dai nanggad mangyayari an nasa isip nindo—na kamo makaarog sa ibang mga nasyon, sa mga tawong nag-eerok sa ibang lugar asin nagsasamba sa mga kahoy saka sa mga gapo.

³³“Siring na ako an Kagurangnan Dios na buhay, pinapatanidan ko kamo na sa sakong kaanggotan, gagamitan ko kamo nin makosog asin nakaunat na kamot sa sakong paghahade.

³⁴Ipapahiling ko saindo an sakong kaanggotan asin an sakong kapangyarihan kun tiponon ko na kamo hale sa gabos na daga na nagkawararakan saindo.

³⁵Dadarahon ko kamo sa ‘Kalangtadan nin mga Nasyon,’ asin hayag na kokondenaron ko kamo duman.

³⁶Kokondenaron ko kamo ngunyan, siring na kinondenar ko an saindong mga ginikanan duman sa kalangtadan nin Sinai,” an olay nin Kagurangnan Dios.

³⁷“Didisiplinahon ko kamo asin ipapaotob ko nanggad saindo an sakong tipan.

³⁸Hahaleon ko sa tahaw nindo an mga rebelde asin an mga makasalan. Hahaleon ko sinda sa mga daga na pinag-eerokan ninda, alagad dai ko sinda papabalikon sa daga nin Israel. Dangan maaaraman nindo na ako an Kagurangnan.”

³⁹Ini an tataramon nin Kagurangnan Dios: “Kamong mga Israelita, kun boot nindo, lakaw asin paglingkodan nindo an saindong mga dios-dios! Alagad pinapatanidan ko kamo na pakatapos kaiyan, kaipuhan kuyogon nindo ako asin ontokon nindo an pagdigta sa banal kong ngaran sa paagi nin pagdolot nin mga atang sa saindong mga dios-dios.

⁴⁰Duman sa daga, sa sakong banal na bukid, an halangkaw na bukid nin Israel, kamo gabos na Israelita masamba sako. Mawiwilihan ko kamo, asin hahagadon ko sa saindong darahan ako nin mga sakripisyo, an saindong pinakamarahay na mga dolot, asin an saindong mga banal na regalo.

⁴¹Pakatapos na iluwas ko kamo sa mga daga na pinagwarakan saindo asin pakatipona ko saindo, aakoon ko an mga sakripisyo na tututongon nindo, dangan mahihiling kan mga nasyon na ako banal.

⁴²Kun ibalik ko na kamo sa Israel, an dagang ipinanuga kong itatao sa saindong mga ginikanan, dangan maaaraman nindo na ako an Kagurangnan.

⁴³Dangan magigiromdoman nindo an makauuyam na mga gawe nindo, asin kun paano nindo dinigtaan an saindong sadiri. Mauuyam kamo sa saindong sadiri, huli kan mga maraot na gawe nindo.

⁴⁴Kun maghiro na ako tanganing ikalikay sa kasosopgan an sakong ngaran, maaaraman nindong mga Israelita na ako an Kagurangnan, huli ta an gigibohon ko saindo bako nanggad sosog sa maninigo sa saindong mga maraot na gawe.” An Kagurangnan Dios an nagtaram.

⁴⁵Nagtaram sako an Kagurangnan:

⁴⁶“Aki nin tawo, maghiling ka sa habagat. Magtaram ka laban sa habagat asin magpropesiya ka laban sa kadlagan kan habagat.

⁴⁷Sabihan mo an kadlagan sa habagat na magdangog sa itinataram kan Kagurangnan Dios: Uya, maamak ako nin kalayo, dangan susuloon kaiyan an gabos na kahoy mo, berde man o alang. An kalayong iyan dai nanggad mapapalsok. Malakop iyan magpoon sa habagat sagkod sa amihan, asin an gabos makakamate kan init kaiyan.

⁴⁸Mahihiling kan gabos na ako, an Kagurangnan, iyo an nag-amak kaiyan asin mayo nin siisay man na makakapalsok kaiyan.”

⁴⁹Alagad nagsabi ako, “Kagurangnan Dios, hare ako pagpagiboha kaiyan! Nagrereklamo na sako an lambang saro na danay akong nagtataram sa mga talinhaga.”