Read Central Bicolano Ezekiel 21 Bible Online

Ezekiel 21 - Central Bicolano bible

Ezekiel 21

¹Nagtaram sako an Kagurangnan,

²“Aki nin tawo, maghiling ka sa Jerusalem asin magtaram ka laban sa mga lugar na pinagsasambahan kan mga tawo. Patanidan mo an daga nin Israel

³na ako, an Kagurangnan, an nagtataram: Kalaban nindo ako. Huhugkoton ko an sakong espada asin gagadanon ko kamo gabos, matanos man o maraot.

⁴Gagamiton ko an sakong espada laban sa kiisay man, magpoon sa amihan sagkod sa habagat.

⁵Maaaraman kan gabos na ako, an Kagurangnan, an naghugkot kan sakong espada asin dai ko na iyan isasarong giraray.

⁶“Aki nin tawo, mag-agrangay ka na garo naroronot na an saimong puso sa pagkawara nin paglaom. Mag-agrangay ka sa kamondoan duman sa lugar na mahihiling ka kan gabos.

⁷Kun hapoton ka ninda kun tadaw ta nag-aagrangay ka, sabihan mo sinda na ginigibo mo iyan huli kan baretang maabot. Pag-abot kaiyan, matutunaw sa takot an saindang puso, manluluya an saindang mga kamot, mawawara an saindang kosog asin tatakigan an saindang mga tuhod. Nag-abot na an panahon asin uya na.” An Kagurangnan Dios an nagtaram.

⁸Nagtaram sako an Kagurangnan,

⁹“Aki nin tawo, magpropesiya ka asin sabihan mo an mga tawo kan itinataram ko, an Kagurangnan: Sarong espada, sarong espada an pinatarom asin pinakintab.

¹⁰Pinatarom tanganing ipanggadan, pinakintab tanganing magsilyab siring sa kikilat. Dai pwedeng magkaigwa nin kaogmahan, huli ta an sakong banwaan dai nagpahalaga sa lambang patanid asin padusa.

¹¹Pinapakintab an espada tanganing andamon sa paggamit. Pinatarom iyan asin pinakintab, tanganing itao sa kamot kan paragadan.

¹²Aki nin tawo, maghibi ka asin maghaya; huli ta an espadang iyan para sa sakong banwaan, asin para sa gabos na prinsipe nin Israel. Gagadanon sinda sa espada kaiba an sakong banwaan. Tumboka an saimong daghan sa kawaraan nin paglaom!

¹³Binabalo ko an sakong banwaan, asin kun magsayuma sindang magbakle, an gabos na ini mangyayari sa sainda.

¹⁴“Kaya, aki nin tawo, magpropesiya ka. Mag-upak ka asin an espada dai maontok sa paggadan. Espada iyan na nanggagadan, sarong espada na nananakot asin nanggagadan.

¹⁵An espadang iyan nakakapaluya kan boot kan sakuyang banwaan asin nakakapatumba sainda. An saindang syudad hinuhomaan ko nin sarong espada na nagsisilyab siring sa kikilat asin andam sa paggadan.

¹⁶Matarom na espada, manigbas ka sa too asin sa wala! Manigbas ka maski saen man na direksyon.

¹⁷Maupak man ako, asin mawawara an sakong kaanggotan. Ako, an Kagurangnan, an nagtaram.”

¹⁸Nagtaram sako an Kagurangnan,

¹⁹“Aki nin tawo, magtanda ka nin duwang dalan na pwedeng agihan kan madigding hade nin Babilonia, na dara an saiyang espada. An duwang dalan na iyan kaipuhan na magpoon sa saro sanang lugar. Tandaan mo nin sarong poste an lugar na pagsasangahan kaiyan.

²⁰An saro matukdo sa hade kan dalan pasiring sa Rabba, an syudad kan mga Ammonita, asin an saro pasiring sa Juda, sa pinapusog na syudad nin Jerusalem.

²¹An hade nin Babilonia nagtitindog sa may poste sa pinagsasangahan kan dalan. Tanganing maaraman niya kun arin na dalan an saiyang aagihan, hinihiro niya an mga bosog, nakikihumapot siya sa saiyang mga dios-dios, asin sinisiyasat an apdo kan sarong hayop na isinakripisyo.

²²Sa too niyang kamot yaon an bosog na may ngaran ‘Jerusalem’! Sinasabihan siya kaini na magbugtak nin mga trosong panrumpag nin trangkahan, magtambak nin daga asin magkalot nin mga trinsera.

²³An mga taga Jerusalem dai matubod kaini huli kan mga tipan na ginibo ninda. Alagad an kapahayagan na ini magpapagiromdom sainda kan saindang mga kasalan, asin magpapatanid sainda na sinda mabibihag.

²⁴Kaya ini an tataramon ko, an Kagurangnan Dios: Hayag na an saimong mga kasalan. Aram na kan gabos na ika maninigong padusahan. Nahihiling an saimong mga kasalan sa gabos mong gibo. Maninigo ka nang padusahan, asin itatao taka sa saimong mga kaiwal.

²⁵“Ika, maraot na pamayo nin Israel, nagdadangadang na an saimong aldaw, an aldaw kan huring pagpadusa saimo.

²⁶Ako, an Kagurangnan Dios, an nagtaram: Halea an saimong turban asin an saimong korona. Mababago an gabos na bagay. Iiitaas an mapakumbaba asin ibababa an mga mapalangkaw!

²⁷Pagkarumpag, pagkarumpag! Iyo, ipaparumpag ko an syudad. Alagad dai ini mangyayari sagkod na dumatong an saro na pinili ko na igwa nin deretso sa pagpadusa sa syudad. Sa saiya itatao ko an deretsong ini.

²⁸“Aki nin tawo, magpropesiya ka asin ipahayag mo an itinataram ko, an Kagurangnan Dios, sa mga Ammonita, na nagtutuyatuya sa Israel. Sabihan mo sinda: Sarong espada an hinugkot tanganing manggadan. Pinakintab iyan tanganing ipanggadan, asin tanganing magsilyab arog sa kikilat.

²⁹Bakong totoo an mga bisyon na nahihiling nindo, asin kaputikan an mga ipinapahayag nindo. Tampalasan saka maraot kamo; nagdadangadang na an saindong aldaw, an aldaw kan huring pagpadusa saindo. Mahugpa sa saindong mga liog an espada.

³⁰“Isarong an espada! Huhukoman ko kamo sa lugar na pinaglalangan saindo, sa daga na namundagan nindo.

³¹Mamamatean nindo an sakong kaanggotan kun butasan ko na iyan siring sa naglalaad na kalayo. Itatao ko kamo sa kamot nin maringis na mga tawo, na mga tood sa panggagadan.

³²Magagadan kamo huli sa kalayo. An saindong dugo magbulos sa sadiri nindong daga, asin dai na kamo magigiromdoman sagkod pa man.’” An Kagurangnan an nagtaram.