Read Central Bicolano Ezekiel 22 Bible Online

Ezekiel 22 - Central Bicolano bible

Ezekiel 22

¹Nagtaram sako an Kagurangnan,

²“Aki nin tawo, andam ka na sa paghukom kan syudad na pano nin mga paragadan? Ipahayag mo saiya an makauuyam na mga bagay na ginibo niya.

³Isabi mo sa syudad kun ano an itinataram ko, an Kagurangnan Dios: Huli ta dakul an ginadan mo sa sadiri mong banwaan asin dinigtaan mo an saimong sadiri huli sa pagsamba sa mga dios-dios, kaya nagdadangadang na an oras mo.

⁴Kinondenar ka huli sa panggagadan asin sa pagdigta kan sadiri huli kan mga dios-dios na ginibo mo; kaya nagdadangadang na an saimong aldaw, uminabot na an saimong oras! Kaya tinugotan kong pagngisihan ka kan mga nasyon asin pagtuyatuyaon kan mga banwaan.

⁵An mga banwaan na nasa harani asin nasa harayo nagtutuyatuya saimo huli kan pagsalungat mo sa katogonan.

⁶An gabos na lider nin Israel nagsasarig sa sadiri nindang kosog asin nanggagadan.

⁷Mayo nin siisay man sa syudad na minagalang sa saiyang mga magurang. Dinadaya nindo an mga dayuhan asin inaabuso an mga babaeng balo saka mga ilo.

⁸Dai nindo pinapahalagahan an mga banal na lugar asin an Sabbath.

⁹An nagkapira sa sainda nagpuputik manongod sa iba tanganing ipagadan an mga ini. May nagkapira saindang nagkakakan kan sakripisyong idinolot sa mga dios-dios. An iba naggigibo nin karigsokan.

¹⁰An nagkapira sainda nakikidorog sa agom kan saindang ama. An iba namimirit sa mga babae na makidorog sainda mantang nasa panahon nin pagregla.

¹¹An iba nakikidorog sa bako nindang agom; mantang an iba namimirit sa saindang mga manugang na babae o mga tugang na babae sa ama na makidorog sa sainda.

¹²An iba sa sainda nagpapatandan tanganing manggadan. An iba nagpapautang sa kapwa Israelita na igwa nin dakulang tubo. Nalingawan na ninda ako.” An Kagurangnan Dios an nagtaram.

¹³“Kaya ngunyan, papadusahan ko kamo huli kan saindong mga panghahabon saka mga panggagadan.

¹⁴Naghohona daw kamo na igwa pa kamo nin matatadang isog asin kosog kun gibohon ko na iyan saindo? Ako, an Kagurangnan, an nagtaram asin gigibohon ko iyan.

¹⁵Iwawarak ko kamo sa gabos na daga asin nasyon; tataposon ko an saindong mga maraot na gibo.

¹⁶Kaya dai kamo gagalangan kan ibang nasyon, alagad maaaraman nindo na ako an Kagurangnan.”

¹⁷Nagtaram sako an Kagurangnan,

¹⁸“Aki nin tawo, an mga Israelita mayo na nin halaga para sako. Arog sinda sa ati nin metal—bronse, lata, lansang, asin timga—an ati na natatada pakatapos na linigan an plata sa horno.

¹⁹Kaya ako, an Kagurangnan Dios, an nagtataram na garo sinda ati nin metal. Titiponon ko sinda sa Jerusalem

²⁰siring na tinitipon nin mga tawo an lata, bronse, lansang, saka timga sa sarong horno tanganing tunawon. Tutunawon ko man sinda kan sakong labi-labing kaanggotan.

²¹Titiponon ko sinda sa Jerusalem asin maamak ako nin kalayo tanganing tunawon sinda kan kalayo nin sakong kaanggotan.

²²Matutunaw sinda sa Jerusalem siring na an plata natutunaw sa sarong horno; dangan maaaraman ninda na an saindang namamatean iyo an kaanggotan nin Kagurangnan.”

²³Nagtaram giraray sako an Kagurangnan,

²⁴“Aki nin tawo, taraman mo an mga Israelita na bako nang banal an saindang daga, kaya papadusahan ko iyan sa sakuyang kaanggotan.

²⁵An mga lider nakakabaing sa mga leon na nag-uungal sa ibabaw kan mga hayop na ginadan ninda. Ginagadan ninda an mga tawo, sinasamsam an gabos na kwarta saka mga pagsadiri na pwede nindang makua. Huli kan panggagadan ninda, dakul an nagigin balo.

²⁶Linalapas kan mga padi an sakuyang mga togon asin dai ninda ginagalangan an banal na mga bagay. Dai ninda minimidbid kun arin an banal asin kun arin an bako. Dai ninda itinutukdo an kalaenan kan mga bagay na malinig sa mga maati, asin dai ninda pinapahalagahan an sakong Sabbath. Kaya dai ako ginagalangan kan banwaan nin Israel.

²⁷An mga opisyal kan gobyerno garo mga lobo na nagroronot kan mga hayop na saindang ginadan. Minagadan sinda tangani sanang yumaman.

²⁸Tinahoban kan mga propeta an mga kasalan na ini, siring sa sarong pinaputing lanob. Nakakahiling sinda nin bako totoong mga bisyon asin nagpuputik sinda sa saindang mga pahayag manongod sa maabot na panahon. Nagsasabi sinda na yaon sainda an tataramon nin Kagurangnan Dios, maski ako, an Kagurangnan, dai man kaiyan nagtaram sainda.

²⁹An mga mayaman nandadaya saka nanghahabon. Inaapi ninda an mga dukha asin pirit na kinikikilan an mga dayuhan.

³⁰Naghanap ako nin saro man lamang na lalaki sa sainda na makakatugdok nin kudal, na makakatindog sa kabtang kan kudal na narumpag tanganing bantayan an daga kun madali ko nang tunawon iyan kan sakong kaanggotan, alagad mayo akong nakua.

³¹Kaya iuula ko sainda an sakong kaanggotan, asin siring sa kalayo, susuloon ko sinda huli kan saindang mga ginibo.” An Kagurangnan Dios an nagtaram.