Read Central Bicolano Ezekiel 23 Bible Online

Ezekiel 23 - Central Bicolano bible

Ezekiel 23

²“Aki nin tawo, igwa kaidto nin magtugang na babae.

³Kan hoben pa sinda, asin nag-eerok pa sa Egipto, nawara an saindang pagkabirhen asin nagin sinda mga maraot na babae.

⁴An ngaran kan matua Ohola, asin Oholiba an ngaran kan ngohod. (Si Ohola iyo an minarepresentar kan Samaria, asin si Oholiba, kan Jerusalem.) Inagom ko sindang duwa asin nagkaigwa ako nin mga aking lalaki saka babae.

⁵Maski agom ko na si Ohola, nagpadagos pa siya sa pakidorog sa ibang lalaki asin napano siya nin marompot na kamawotan para sa mga namomoot saiya na mga taga Asiria.

⁶Mga soldados sinda na naka-uniporme nin purpura, mga gobernador saka mga halangkaw na opisyal, gabos sinda mga gwapong opisyal na nangangabayo.

⁷Siya an kadorogan kan gabos na opisyal kan Asiria asin an saiyang karompotan iyo an nagdagka saiya sa pagdigta kan saiyang sadiri, sa paagi kan pagsamba sa mga dios-dios nin Asiria.

⁸Nagpadagos siya bilang sarong maraot na babae, gawe na pinonan niya duman sa Egipto, saen nawara niya an saiyang pagkabirhen. Magpoon kan hoben pa siya, dinorogan na siya nin mga lalaki asin ibinilang na sarong maraot na babae.

⁹Kaya itinao ko siya sa kadorogan niyang mga taga Asiria na saiyang narurungawan.

¹⁰Hinubaan ninda siya dangan ginadan siya sa espada; dinakop man ninda an mga aki niyang lalaki saka babae. An nangyari saiya iyo an nagin ngingisihan nin mga babae maski saen.

¹¹“Maski nahiling ini gabos kan tugang niyang si Oholiba, orog pa ining nagin marompot saka maraot ki sa saiya.

¹²Pano man siya nin marompot na kamawotan para sa mga taga Asiria, mga gobernador saka mga halangkaw na opisyal, mga soldados na armado para sa gera, mga gwapong opisyal na nangangabayo.

¹³Nahiling kong marompot nanggad siya, arog karompot kan saiyang tugang.

¹⁴“Nag-orog an saiyang karigsokan. Nadagka siya kan mga ladawan kan mga halangkaw na opisyal nin Babilonia na nakaukit sa mga lanob saka napipintahan nin pula, na napapahaan saka nasusulotan nin turban.

¹⁵

¹⁶Pakahiling niya sainda, napano siya nin marompot na kamawotan dangan nagpadara siya nin mga sugo sainda duman sa Babilonia.

¹⁷Nagduman saiya an mga taga Babilonia, dangan dinorogan siya. Pinagparadorogan siya ninda asin dinigtaan sagkod na mauyam siya sainda.

¹⁸Hayag na ipinahiling niya an saiyang karigsokan asin ipinamidbid sa gabos an saiyang pagkani-maraot na babae. Nauyam ako saiya arog kan pagkauyam ko sa tugang niya.

¹⁹Orog siyang nagin maraot; inulit niya an saiyang gibo kan hoben pa siya, kan saro pa siyang maraot na babae duman sa Egipto.

²⁰Napano siya nin marompot na kamawotan para sa mga lalaking gutom sa laman, na an karigsokan nakakaarog sa mga lalaking asno saka mga kabayo.” (

²¹Oholiba, boot mong uliton an karompotan mo kan ika hoben pa sa Egipto; kan pagkawatan an saimong daghan kan mga lalaki asin mawara an saimong pagkabirhen.)

²²“Kaya ngunyan, Oholiba, iyo ini an itinataram ko saimo, ako, an Kagurangnan Dios. Habo ka na kan saimong mga kadorogan, alagad papaanggoton ko sinda saimo asin dadarahon ko sinda tanganing palibotan ka.

²³Dadarahon ko an gabos na taga Babilonia saka Caldea, an mga lalaki kan Pekod, Soa, asin Koa patin an gabos na taga Asiria. Titiriponon ko an gabos na gwapong lalaki saka opisyal, mga halangkaw na opisyal na nangangabayo.

²⁴Sasalakayon ka ninda hale sa amihan, kaiba an dakulang hukbo saka mga karwahe asin mga lunadan nin armas. Papalibotan ka kan hukbong ini na armado nin kalasag saka helmet, dangan huhukoman ka ninda sosog sa saindang mga pagsusundon.

²⁵Huli ta anggot ako saimo, tutugotan kong hukoman ka ninda sa saindang kaanggotan. Puputolon ninda an saimong dungo saka mga talinga dangan gagadanon ninda an saimong mga aki. Kukuahon ninda an saimong mga aking lalaki saka babae dangan susuloon na buhay.

²⁶Gigision ninda an saimong mga gubing asin kukuahon an saimong mga alahas.

²⁷Tataposon ko an saimong karompotan asin kadustaan na ginibo mo magpoon kan ika yaon pa sa Egipto. Dai ka na mahiling sa arin man na dios-dios, ni mag-iisip manongod sa Egipto.”

²⁸Ini an tataramon nin Kagurangnan Dios, “Itatao taka sa mga tawong naanggotan saka nauuyaman mo.

²⁹Huli ta naoongis sinda saimo, kukuahon ninda an gabos na bunga kan saimong kapagalan dangan babayaan kang huba asin hayag na mahihiling an saimong pagkani-maraot na babae. An saimong kadustaan asin karompotan

³⁰iyo an nagdara saimo kaini. Saro kang maraot na babae para sa mga nasyon asin dinigtaan mo an saimong sadiri huli kan saindang mga dios-dios.

³¹Nagsunod ka sa mga lakad kan saimong tugang, kaya ipapainom ko saimo an parehong kalis nin padusa.”

³²Ini an itinataram nin Kagurangnan Dios, “Mainom ka sa kalis nin saimong tugang; dakula iyan saka hararom. Oolog-ologon ka asin tutuyatuyaon; huli ta pano an kalis na iyan.

³³Mabuburat ka kaiyan asin mapapano nin kamondoan; kalis iyan nin pagkatakot asin pagkarumpag, an kalis kan tugang mong si Samaria.

³⁴Iinomon mo iyan sagkod na maubos, dangan an saimong daghan malulugadan kan mga nagkaparasang pedaso kaiyan. Ako, an Kagurangnan Dios, an nagtaram.”

³⁵Kaya ini an itinataram kan Kagurangnan Dios: “Huli ta nalingawan mo ako asin nagtalikod ka sako, titioson mo an bunga kan saimong kadustaan asin karompotan.”

³⁶Nagtaram sako an Kagurangnan Dios, “Aki nin tawo, andam ka na sa paghukom ki Ohola saka ki Oholiba? Kun siring, ipahayag mo an makauuyam nindang mga gibo.

³⁷Nakidorog sinda sa bako nindang agom asin nanggadan—nakidorog sa mga dios-dios asin ginagadan an mga aki ko sainda. Isinakripisyo ninda an saindang mga aking lalaki sa mga dios-dios.

³⁸Bako sana iyan, dinigtaan ninda an sakuyang Templo asin linapas an Sabbath sa pareho man sanang aldaw.

³⁹Huli ta kan aldaw na gadanon ninda an sakong mga aki bilang sakripisyo para sa saindang mga dios-dios, nagduman man sinda sa sakong Templo dangan dinigtaan iyan!

⁴⁰Paulit-ulit na nagpasugo pa sinda sa mga lalaking gikan sa hararayong mga lugar asin nagdirigdi an mga ini. Nagkarigos an magtugang na babae, kinoloran an saindang mga mata asin nagsulot nin mga alahas, para sa mga lalaking ini.

⁴¹Nagtukaw sinda sa magayon na mga sopa, dangan sa atubangan ninda, nagbugtak sinda nin lamesa na binugtakan nin insenso saka lana nin oliba na hale sako.

⁴²Nadangog an ribok nin sarong grupo na mayo nin kahandalan, sarong grupo nin mga lalaki na pinalaog sa kwarto hale sa kalangtadan. An mga babae binugtakan kan mga ini nin mga pulseras asin mga magayon na korona.

⁴³Dangan nagsaboot ako na sarong babaeng haloy nang nakikidorog sa bako niyang agom an ginagamit ninda bilang sarong maraot na babae.

⁴⁴Pabalik-balik sinda sa maraot na mga babaeng ini. Daing ontok sindang nagbalik ki Ohola saka ki Oholiba, an mga marompot na babae.

⁴⁵Alagad huhukoman sinda kan mga matanos dangan kokondenaron para sa kasalan nin pakikidorog sa bako nindang agom asin panggagadan.”

⁴⁶Ini an itinataram nin Kagurangnan Dios: “Magdara ka nin sarong hukbo laban sainda tanganing takoton saka samsaman sinda.

⁴⁷Pabayaeng gapoon sinda kan hukbong ini asin salakayon, gadanon an saindang mga aki dangan suloon an saindang mga harong.

⁴⁸Sa bilog na daga tataposon ko an karompotan, bilang patanid sa lambang babae na dai maggibo nin karompotan arog sainda.

⁴⁹Dangan kamong magtugang—papadusahan ko kamo huli kan saindong karompotan asin pagsamba sa mga dios-dios. Dangan maaaraman nindo na ako an Kagurangnan Dios.”