Read Central Bicolano Ezekiel 24 Bible Online

Ezekiel 24 - Central Bicolano bible

Ezekiel 24

¹Kan ikasampolong aldaw kan ikasampolong bulan kan ikasiyam na taon nin samuyang pagkatapokan, nagtaram sako an Kagurangnan,

²“Aki nin tawo, isurat mo an petsa ngunyan, huli ta iyo ini an aldaw na popoonan kan hade nin Babilonia an pagsalakay sa Jerusalem.

³Isaysay mo sa sakong rebeldeng banwaan an parabolang ini asin sabihan mo sinda na ini an tataramon nin Kagurangnan Dios: Isunad mo an kaldero, asin panoon mo nin tubig.

⁴Bugtakan mo kan pinakamarahay na karne— an kawkawan asin an pata— saka an piling mga tolang na may laman.

⁵Pilion mo an karne kan pinakamarahay sa mga karnero; tambakan mo nin igatong sa irarom kan kaldero. Pakalakagaa an tubig; labonan mo an mga tolang saka an karne.”

⁶Ini an itinataram nin Kagurangnan Dios, “Herak man sa syudad nin mga paragadan! Arog iyan sa sarong tinataklang kaldero na dai lamang linilinigan. Hinahale diyan an lambang pedaso nin karne asin mayo nin itinatada.

⁷Igwa nin panggagadan sa syudad, alagad pinabulos an dugo bako sa daga tanganing matambonan kan alpog, kundi sa nahihiling na gapo.

⁸Binayaan ko an dugo duman sa lugar na dai matatago asin maghahagad iyan nin pagbalos.”

⁹Ini an itinataram nin Kagurangnan Dios: “Herak man sa syudad nin mga paragadan! Ako mismo an matambak kan igatong.

¹⁰Pagdara pa nin dakul na kahoy! Palaada pa an kalayo! Lutoa nin marahay an karne! Pakalakagaa nin marahay an tubig sagkod na magmara an mga tolang.

¹¹Dangan bugtakan sa baga an mayong laog na bronseng kaldero sagkod na magbaga iyan. Mahahale an mga ati saka takla kaiyan, dangan magigin malinig giraray,

¹²maski ngani dai man mahahale kan kalayo an gabos na takla kaiyan.

¹³Jerusalem, an takla mo iyo an saimong marompot na gibo. Maski hiningowa kong malinigan ka, nagdanay kang maati. Dai ka na nanggad malilinigan sagkod na mamatean mo an bilog kong kaanggotan.

¹⁴Ako, an Kagurangnan, an nagtaram. Uminabot na an panahon na dapat akong maghiro. Dai ko paliligtason an saimong mga kasalan; mayo ako nin paliligtason o maheherakan. Papadusahan taka huli kan saimong mga ginibo.” An Kagurangnan Dios an nagtaram.

¹⁵Nagtaram sako an Kagurangnan,

¹⁶“Aki nin tawo, sa sarong hiro kan kamot, kukuahon ko an tawong namomotan mo nin marahay. Dai ka dapat magmondo o magtangis o maghibi.

¹⁷Mag-agrangay ka, alagad dai dapat madangog iyan; dai ka nanggad magpahiling na ika nagmomondo. Dai ka mag-aris nin buhok ni magtangkas kan sandalyas. Dai mo pagtahoban an saimong lalawogon o magkakan kan kakanon nin mga nagmomondo.”

¹⁸Kaya pagkaagang amay, nagtaram ako sa mga tawo. Pagkabanggi, nagadan an sakong agom, asin sunod na aldaw ginibo ko an gabos na ipinagboot sako.

¹⁹Hinapot ako kan mga tawo, “Tano ta arog kaiyan an hiro-hiro mo?”

²⁰Kaya tinaraman ko sinda, “Nagtaram sako an Kagurangnan asin sinabihan ako

²¹na itao ko sa saindong mga Israelita an mensaheng ini: Hilinga, didigtaan ko an Templo, an orgulyo kan saindong kapangyarihan, an nawiwilihan kan saindong mga mata asin kamawotan kan saindong kalag. An saindong mga aking lalaki saka babae, na binayaan nindo sa Jerusalem, gabos magagadan sa gera.

²²Dangan aarogon nindo an ginibo ko. Dai nindo tatahoban an saindong lalawogon asin dai kamo makakan kan kakanon nin mga nagmomondo.

²³Dai nindo aarison an saindong buhok, ni tatangkason an saindong sandalyas; dai kamo magmomondo o maghihibi. Manluluya kamo huli kan saindong mga kasalan asin mag-aagrangay kamo sa lambang saro.

²⁴Dangan ako an magigin tanda para saindo. Nagtataram an Kagurangnan na kun mangyari na ini, maaaraman nindo na siya an Kagurangnan Dios.”

²⁵Nagtaram an Kagurangnan, “Ngunyan, aki nin tawo, hahaleon ko sa sainda an pusog na Templo, an saindang kaogmahan asin orgulyo, an nawiwilihan kan saindang mga mata saka kaogmahan kan saindang mga puso. Hahaleon ko man an saindang mga aking lalaki saka babae.

²⁶Sa aldaw na gibohon ko iyan, an tawong makakadulag sa kagadanan madatong tanganing mag-osip saimo dapit kaini.

²⁷Sa aldaw man sanang iyan, makakataram ka na asin dai na magigin pola. Makikiolay-olay ka saiya. Sa paaging iyan, magigin sarong tanda ka para sainda, asin maaaraman ninda na ako an Kagurangnan.”