Read Central Bicolano Ezekiel 25 Bible Online

Ezekiel 25 - Central Bicolano bible

Ezekiel 25

¹Nagtaram sako an Kagurangnan,

²“Aki nin tawo, kondenaron mo an daga nin Ammon.

³Sabihan mo sinda na maghinanyog kan itinataram ko, an Kagurangnan Dios: Huli ta nag-ogma kamo kan mahiling nindong nadigtaan an sakong Templo, kan maraot an daga nin Israel, asin kan itinapok an banwaan nin Juda,

⁴kaya itatao ko kamo sa mga taga sirangan tanganing bihagon. Mabugtak sinda nin mga kampo saka mga harong sa tahaw nindo. Kakakanon ninda an bunga saka iinomon an gatas na kutana para saindo.

⁵An Rabba gigibohon kong pasabsaban nin mga kamelyo asin an bilog na banwaan nin Ammon gigibohon kong sarong laoman nin mga karnero. Dangan maaaraman nindo na ako an Kagurangnan.

⁶“Ini an itinataram nin Kagurangnan Dios: Nag-oropak kamo asin nagrulukso sa kaogmahan. Ikinaongis nindo an daga nin Israel.

⁷Huli ta ginibo nindo iyan, itatao ko kamo sa ibang mga nasyon na mahabon saka masamsam kan pagsadiri nindo. Pupuhoon ko kamo kaya dai na kamo ibibilang na sarong nasyon. Dangan maaaraman nindo na ako an Kagurangnan.”

⁸Nagtaram an Kagurangnan Dios, “Huli ta nagsabi an Moab na an Juda arog sa ibang mga nasyon,

⁹kaya tutugotan kong salakayon an mga syudad na nagbabantay kan mga pagdolonan kan Moab, salakayon sagkod an pinakamarahay na mga syudad nin Bet-jesemot, Baal-meon, saka Kiriataim.

¹⁰Tutugotan ko an mga taga sirangan na daogon an Moab kaiba an Ammon, tanganing dai na magin sarong nasyon an Moab.

¹¹Papadusahan ko an Moab, asin maaaraman ninda na ako an Kagurangnan.”

¹²Nagtaram an Kagurangnan Dios, “Huli ta nagbalos an Edom sa banwaan nin Juda, asin an pagbalos na iyan sarong makuring kasalan kan Edom,

¹³kaya minapahayag ako na papadusahan ko an Edom asin gagadanon ko an lambang tawo saka hayop diyan. Raraoton ko an daga nin Edom, magpoon sa syudad nin Teman sagkod sa syudad nin Dedan, asin an mga tawo diyan gabos magagadan sa gera.

¹⁴An sakong banwaan nin Israel mabalos sa Edom para sako, asin ipapamate ninda sa Edom an dakula kong kaanggotan. Maaaraman kan Edom na ako an Kagurangnan, kun ipahiling ko na sainda an pagbalos ko sainda.” An Kagurangnan Dios an nagtaram.

¹⁵Nagtaram an Kagurangnan Dios, “Huli ta an mga Filisteo nagbalos nin makuri sa suanoy nindang mga kaiwal, asin ginadan ninda an mga ini sa saindang kaanggotan,

¹⁶kaya minapahayag ako na sasalakayon ko an mga Filisteo asin paparaon ko sinda. Gagadanon ko an gabos na nag-eerok sa Kapantayan nin Filistia.

¹⁷Papadusahan ko sinda nin makuri asin mabalos ako sainda. Mamamatean ninda an sakong kaanggotan. Dangan maaaraman ninda na ako an Kagurangnan.”