Read Central Bicolano Ezekiel 26 Bible Online

Ezekiel 26 - Central Bicolano bible

Ezekiel 26

¹Kan enot na aldaw kan…na bulan, kan ikaonseng taon nin samuyang pagkatapokan, nagtaram sako an Kagurangnan,

²“Aki nin tawo, nagtaram an Tiro manongod sa Jerusalem nin, ‘Rumpag na an Jerusalem! Mayo na an saiyang kosog sa negosyo! Mayo na kitang karibal!’

³“Kaya iyo ini an itinataram ko, an Kagurangnan Dios: Kalaban mo ako, syudad nin Tiro, asin dadarahon ko an dakul na nasyon tanganing salakayon ka. Maabot sinda siring sa mga alon kan dagat.

⁴Raraoton ninda an mga kudal kan saimong syudad, asin rurumpagon ninda an saimong mga tore. Dangan sisighidon ko an gabos na daga diyan sagkod na gapo na sana an matada.

⁵Babaladon diyan kan mga parasira an saindang mga hikot. Ako, an Kagurangnan Dios, an nagtaram. An Tiro sasamsaman kan mga nasyon

⁶asin gagadanon ninda kan saindang espada an mga nag-eerok sa pinakadakulang kabtang na daga kan saiyang nasyon. Dangan maaaraman kan Tiro na ako an Kagurangnan.”

⁷Nagtataram an Kagurangnan Dios, “Dadarahon ko sa Tiro an pinakadakulang hade—si Hadeng Nebukadnezzar nin Babilonia—tanganing salakayon an Tiro. Madatong siya hale sa amihan kaiba an dakulang hukbo, mga kabayo saka mga karwahe, asin mga soldados na nakakabayo.

⁸Magagadan sa espada an gabos na nag-eerok sa pinakadakulang kabtang na daga kan nasyon. An mga kaiwal makalot nin mga trinsera, matambak nin daga sa palibot, asin magibo nin sarong kudal nin mga kalasag laban saimo.

⁹Tutumbokon ninda nin mga dakulang troso an saimong mga kudal asin sa paagi nin mga patok, rurumpagon ninda an saimong mga tore.

¹⁰Matatahoban ka kan alpog na maitaas huli sa pagpadalagan ninda kan saindang mga kabayo. Huli kan ribok kan saindang mga kabayo na nagguguyod kan mga karwahe saka mga lunadan nin mga kagamitan, matatanyog an saimong mga kudal mantang naglalaog sinda sa mga trangkahan kan narumpag na syudad.

¹¹An saindang nakakabayong mga soldados garo mga bagyong maaragi sa saimong mga tinampo sa paggadan kan saimong mga namamanwaan. Marurumpag an mga darakula mong harigi.

¹²Sasamsamon kan saimong mga kaiwal an kayamanan saka mga itinitinda mo. Rurumpagon ninda an saimong mga kudal asin raraoton an magagayon mong mga harong. Kukuahon ninda an narumpag na mga gapo saka mga kahoy dangan itatapok sa dagat.

¹³Oontokon ko an saimong mga awit, asin dai na madadangog an tanog kan saimong mga lira.

¹⁴Gigibohon takang sarong gapo, asin babaladon diyan kan mga parasira an saindang mga hikot. An syudad dai na nanggad hihirahayon. Ako, an Kagurangnan Dios, an nagtaram.”

¹⁵Ini an itinataram nin Kagurangnan Dios manongod sa Tiro, “Kun sinasakop na kamo, an mga tawo na nag-eerok sa tampi kan dagat matatakot sa mga kinurahaw kan mga ginagaradan.

¹⁶An gabos na hade kan mga nasyon na nasa tampi kan dagat mababa sa saindang mga trono. Huhubaon ninda an saindang mga gubing, asin hahaleon an mga binurdahan nindang mga gubing, dangan nagtatakig na matukaw sa daga. Matatakot nanggad sinda sa nangyayari saindo, kaya dai maontok an saindang pagtakig.

¹⁷Aawiton ninda an panambitan na ini para sa saindo: Rumpag na an bantog na syudad! An saiyang mga barko nawara na sa dagat. An mga dagat pinaghadean kan mga tawo sa syudad na ini. Tinakot ninda an gabos na nag-eerok sa tampi kan dagat.

¹⁸Ngunyan, sa aldaw nin pagkarumpag kaiyan, nagtarakig an mga isla. An saindang banwaan namomongnan kan siring na pagkatunaw.”

¹⁹Ini an itinataram nin Kagurangnan Dios, “Gigibohon takang sarong mamondong syudad, arog kamondo kan nagkararaot na mga syudad na mayo nin nag-eerok. Tatahoban taka kan mga tubig kan dakulang dagat.

²⁰Dangan ihuhulog taka sa kinaban nin mga gadan sa kaibahan kan mga tawong nabuhay kan suanoy na panahon. Mag-eerok ka diyan sa kaibahan kan mga gadan, sa tahaw kan suanoy na mga gaba. Huli kaiyan, dai ka na pag-eerokan, ni magkakaigwa nin lugar sa daga kan mga nabubuhay.

²¹Gigibohon takang sarong makatatakot na arogan, asin iyan an magigin kataposan mo. Pwedeng hanapon ka kan mga tawo, alagad dai ka na nanggad ninda makukua.” An Kagurangnan Dios an nagtaram.