Read Central Bicolano Ezekiel 27 Bible Online

Ezekiel 27 - Central Bicolano bible

Ezekiel 27

¹Nagtaram sako an Kagurangnan,

²“Aki nin tawo, mag-awit ka nin sarong panambitan para sa Tiro,

³an syudad na nagtitindog sa tampi kan dagat asin nakikipagnegosyo sa mga banwaan na nag-eerok man sa tampi kan dagat. Sabihan mo an Tiro na ini an itinataram nin Kagurangnan Dios: “Tiro, ipinaghambog mo an saimong mayong kaninan na kagayonan.

⁴An harong mo iyo an dagat. Ginibo kang arog sa sarong magayon na barko kan mga nagtugdok saimo.

⁵An ginamit nindang mga tabla mga kahoy nin pino na gikan sa Bukid nin Hermon, asin an palo kaiyan sarong kahoy na sedro na hale sa Lebanon.

⁶An mga kahoy na hamurawon nin Basan iyo an ginibo nindang mga sagwan; asin an mga salog mo gibo sa mga kahoy na aguho, na hale sa Chipre, na tinampokan nin mga marpil.

⁷An mga layag mo gibo sa mga binurdahan na pinong lino na hale sa Egipto, na madaling mamidbid maski sa harayo. An mga panlipod sa mga bintana mo mga telang kolor asul saka purpura, na hale sa isla nin Chipre.

⁸Gikan sa mga syudad nin Sidon saka Arvad an saimong mga parasagwan. Asin an mga tripulante iyo an mga eksperto mong tawohan.

⁹An mga karpintero kan barko mga matitibay na karpintero nin Byblos. Mga paradagat na hale sa lambang barko an nagbabakal kan saimong mga produkto.

¹⁰“Naglilingkod sa saimong hukbo an mga soldados na hale sa Persia, Lydia, saka Libya. Isinasabit ninda an saindang mga kalasag saka mga helmet sa mga bugtakan mo nin armas. Sinda an mga soldados na nagtao saimo nin kamurawayan.

¹¹Mga soldados na hale sa Arvad an nagbantay kan saimong mga kudal, asin mga soldados na hale sa Gamad an nagbantay kan saimong mga tore. Isinasabit ninda an saindang mga kalasag sa saimong mga kudal. Sinda an mga soldados na nagpagayon saimo.

¹²“Nakipagnegosyo saimo an Espanya, asin an mga produkto mo rinibayan ninda nin plata, lansang, lata, saka timga.

¹³Nakipagnegosyo saimo an Grecia, Tubal, asin Mesek. An mga produkto mo rinibayan ninda nin mga oripon saka mga kagamitan na gibo sa bronse.

¹⁴An mga produkto mo rinibayan nin Bet-togarma kan saindang mga kabayong pantrabaho, mga kabayong panggera, saka mga mula.

¹⁵Nakipagnegosyo saimo an mga taga Rodes; an mga tawong nag-eerok sa tampi kan dagat nagtao saimo nin mga marpil saka mga itom na kahoy bilang karibay kan saimong mga produkto.

¹⁶Huli kan dakul mong produkto, nakipagnegosyo saimo an mga taga Siria. An mga produkto mo rinibayan ninda nin esmeralda, mga telang kolor purpura, mga binurdahan na tela, mga pinong lino, mga batong koral, saka mga batong agata.

¹⁷Nakipagnegosyo saimo an Juda saka an Israel. An mga produkto mo rinibayan ninda nin trigo, dugos, lana nin oliba, saka mga pahamot.

¹⁸Nakipagnegosyo saimo an Damasco. An mga produkto asin manlaen-laen na kagamitan mo rinibayan ninda nin arak na gikan sa Helbon, asin telang lana na gikan sa Sahar; rinibayan ninda nin lansang saka mga pahamot an saimong mga itinitinda.

²⁰An saimong mga produkto rinibayan kan mga taga Dedan nin mga telang para sa kamadero nin mga kabayo.

²¹An mga taga Arabia saka mga prinsipe nin Kedar nakipagnegosyo saimo. An mga produkto mo rinibayan ninda nin mga kordero, mga karnero, saka mga kanding.

²²Nakipagnegosyo saimo an mga negosyante nin Sheba saka Raama. An mga kagamitan mo rinibayan ninda nin mga alahas, bulawan, saka mga pinakamarahay na mga pahamot.

²³Nakipagnegosyo saimo an mga syudad nin Haran, Canne, saka Eden, an mga negosyante nin Sheba, asin an mga syudad nin Assur saka Kilmad.

²⁴Nakiribay sinda nin mga mamahalon na gubing, mga gubing na kolor purpura, mga binurdahan na tela, makolor na mga alpombra, asin matitibay na mga pisi saka lubid.

²⁵An mga produkto mo dinara kan mga darakulang barko nin Tarsis. “Garo ka sarong barko sa dagat na pano nin mga kargamento.

²⁶Kan ipalawod ka na sa dagat kan mga parasagwan, rinonot ka sa tahaw kan dagat kan doros na hale sa sirangan.

²⁷Nagkarulunod sa dagat an mga produkto mo, an gabos na parasagwan saka mga piloto; an mga karpintero saka mga negosyante mo; an lambang soldados na nasa laog kan barko. An gabos na kairiba mo nawara sa dagat kan maronot an saimong barko.

²⁸Nag-aniningal sa mga baybayon an kurahaw kan mga tripulante mo.

²⁹“Nawaraan na nin tawo an lambang barko, asin nagpasiring sa pangpang an gabos na parasagwan saka tripulante.

³⁰Nagmomondo sinda nin makuri para saimo, nagbubugtak nin alpog sa saindang payo asin nagliligid sa abo.

³¹Inaaris ninda an saindang buhok asin naggugubing nin sako, mamondo sinda, mantang nagtatangis para saimo.

³²Nag-aawit sinda nin sarong panambitan para saimo: ‘Siisay an pwedeng ibaing sa Tiro, na sa dagat ngunyan dai nagkakaalo?

³³Kan an mga produkto mo nakaabot sa ibang nasyon, nahipnoan mo an mga pangangaipo nin dakul na tawo. Nagyaman an mga hade huli kan dakul mong produkto.

³⁴Ngunyan naronot ka sa dagat; nag-irarom ka sa katubigan. An mga produkto mo asin an gabos na nagtrabaho para saimo nalunod na kaiba mo.’

³⁵“An gabos na nag-eerok sa tampi kan dagat namongnan sa nangyari saimo. Nagtarakig maski an saindang mga hade, asin nahiling sa saindang lalawogon an pagkatakot.

³⁶Mayo ka na, mayo na sagkod pa man, asin an gabos na negosyante sa bilog na kinaban natatakot, ta tibaad makaarog sinda saimo.”