Read Central Bicolano Ezekiel 28 Bible Online

Ezekiel 28 - Central Bicolano bible

Ezekiel 28

¹Nagtaram sako an Kagurangnan,

²“Aki nin tawo, sabihan mo an pamayo nin Tiro kun ano an itinataram ko saiya, ako an Kagurangnan Dios: Sa kapaabaw-abawan, minasabi ka na ika sarong dios. Minasabi ka na nagtutukaw ka sa trono, arog sa sarong dios sa tahaw nin kadagatan. Nagsasagin-sagin kang sarong dios alagad saro ka man sanang tawo.

³Naghohona ka na mas madonong ka ki Daniel, asin mayo nin anoman na sekretong pwedeng tagoon saimo.

⁴Huli kan saimong kadonongan saka pakasabot nagyaman ka asin nakatipon nin bulawan saka plata.

⁵Huli kan dakula mong kadonongan sa negosyo, nadagdagan an saimong kayamanan, asin nagin mapaabaw-abaw ka huli kaiyan.

⁶“Kaya iyo ini an itinataram ko, an Kagurangnan Dios: Huli ta naghohona ka na siring ka kadonong sa sarong dios,

⁷madara ako nin mariringis na mga kaiwal tanganing salakayon ka. Raraoton ninda sa espada an gabos na magagayon na mga bagay na nakamtan mo huli kan saimong kadonongan asin pakaaram.

⁸Gagadanon ka ninda asin itatapok ka sa sarong matubig na lulubngan.

⁹Sa atubang kan magadan saimo, makakasabi ka pa daw na ika sarong dios, maski tawo ka man sana asin bakong dios?

¹⁰Magagadan kang arog sa sarong ayam sa kamot kan mga mayong dios na mga dayuhan. Ako, an Kagurangnan Dios, an nagtao kan pagboot.”

¹¹Nagtaram giraray sako an Kagurangnan,

¹²“Aki nin tawo, mag-awit ka nin sarong panambitan para sa hade nin Tiro, asin sabihan mo siya na iyo ini an itinataram ko, an Kagurangnan Dios: Kaidto, ika an ladawan nin sarong mayong kaninan, madonong asin gwapo!

¹³Nag-erok ka sa Eden, an tatamnan nin Dios, dangan sulot mo an gabos na mahahalagang bato: rubi saka diamante; topasyo, berilo, kornalina, saka haspe; safiro, esmeralda asin karbunko. Igwa ka nin mga samno na gibo sa bulawan. Ginibo iyan para saimo kan aldaw na lalangon ka.

¹⁴Nagtalaga ako nin sarong anghel duman tanganing bantayan ka. Nag-erok ka sa sakong banal na bukid asin naglakaw sa tahaw kan nagkikintab na mga bato.

¹⁵Marahay an ugale mo magpoon kan lalangon ka, sagkod na magpoon kang maggibo nin maraot.

¹⁶An dakul mong negosyo iyo an nagdara saimo sa kadahasan asin sa kasalan. Kaya napiritan akong pahaleon ka sa sakong banal na bukid, asin pinahale ka kan bantay mong anghel sa tahaw kan nagkikintab na mga bato.

¹⁷Nagpaabaw-abaw ka huli kan saimong pagkagwapo, asin an kabantogan mo iyo an nagdagka saimo na mamuhay na garo lolong. Huli kaini, itinapok taka sa daga dangan binayaan bilang sarong patanid para sa ibang mga hade.

¹⁸Nagin maraot ka sa saimong pagnegosyo, kaya nadigtaan mo an saimong mga santwaryo. Huli kaiyan nagpadara ako nin kalayo sa syudad, asin tinutong ini. An gabos na naghihiling saimo ngunyan, nakakahiling nin sarong tambak nin abo.

¹⁹Tapos ka na, mayo ka na nanggad, asin an gabos na nasyon na nakakamidbid saimo natatakot na tibaad makaarog man sinda saimo.”

²⁰Nagtaram sako an Kagurangnan,

²¹“Aki nin tawo, kondenara an syudad nin Sidon.

²²Sabihan mo an mga tawo duman na iyo ini an itinataram ko, an Kagurangnan Dios: Kalaban taka, Sidon; oomawon ako kan ibang banwaan huli kan gigibohon ko saimo. Maaaraman ninda na ako an Kagurangnan kun ipahiling ko nang banal ako huli sa pagpadusa ko sa mga nag-eerok diyan saimo.

²³Papadarahan taka nin peste asin papabuloson ko an dugo sa saimong mga tinampo. Sasalakayon ka sa gabos na direksyon asin magagadan an mga namamanwaan mo. Dangan maaaraman mo na ako an Kagurangnan.”

²⁴Nagtaram an Kagurangnan, “Maski saro kan mga nasyon na nakapalibot sa Israel na nagtuyatuya saiya kaidto dai na nanggad magigin arog sa mga tonok asin mga binit na malugad sa Israel. Dangan maaaraman ninda na ako an Kagurangnan Dios.”

²⁵Nagtaram an Kagurangnan Dios, “Titiponon ko giraray an banwaan nin Israel hale sa mga nasyon na pinagwarakan ko sa sainda, asin maaaraman kan gabos na nasyon na ako banal. An banwaan nin Israel mag-eerok sa sadiri nindang daga, sa daga na itinao ko ki Jacob na sakuyang sorogoon.

²⁶Matiwasay sindang mag-eerok duman. Matugdok sinda nin mga harong saka matanom nin mga ubas. Papadusahan ko an mga kataed ninda na nagtuyatuya sainda. Dangan maaaraman ninda na ako an Kagurangnan na saindang Dios.”