Read Central Bicolano Ezekiel 29 Bible Online

Ezekiel 29 - Central Bicolano bible

Ezekiel 29

¹Kan ikadoseng aldaw, kan ikasampolong bulan, kan ikasampolong taon kan samuyang pagkatapokan, nagtaram sako an Kagurangnan,

²“Aki nin tawo, kondenara an hade nin Egipto. Sabihan mo siya asin an bilog na daga nin Egipto kun paano ko sinda papadusahan.

³Sabihan mo siya na ini an itinataram nin Kagurangnan Dios: Kalaban taka, hade nin Egipto, ika na sarong dakulang buaya, na naglulubgob sa salog. Nagsasabi kang saimo an Nilo asin ika an naggibo kaiyan.

⁴Bubugtakan ko nin banwit an saimong salang asin papadukoton ko sa saimong mga kiskis an mga sira sa salog. Dangan hahawason taka sa Nilo, kaiba an mga sira na nakadukot saimo.

⁵Ika asin an mga sira itatapok ko sa kalangtadan. An hawak mo mabagsak sa daga, babayaan diyan asin dai ilulubong. Itatao ko iyan sa mga gamgam saka mga hayop bilang kakanon.

⁶Dangan maaaraman kan gabos na tawo sa Egipto na ako an Kagurangnan.” Nagtataram an Kagurangnan, “Ika, Egipto, an sinarigan kan mga Israelita, alagad maluya ka man arog sa sarong bariw.

⁷Nabari ka kan kapotan ka ninda dangan natusok an saindang mga yukyuk; nabari ka kan sandigan ka ninda dangan nabari an saindang piad.

⁸Kaya ako, an Kagurangnan Dios, an nagtataram saimo na mapadara ako nin mga tawong may espada sa pagsalakay saimo, asin gagadanon ninda an saimong mga namamanwaan saka mga hayop.

⁹An Egipto magigin sarong alang saka mamondong daga. Dangan maaaraman mo na ako an Kagurangnan. “Huli ta nagsabi ka na sadiri mo an Nilo asin ika an naggibo kaiyan,

¹⁰kalaban taka asin an saimong Nilo. An bilog na Egipto gigibohon kong sarong alang saka mamondong daga magpoon sa syudad nin Migdol sa amihan sagkod sa syudad nin Aswan sa habagat dangan sagkod sa pagdolonan kan Etiopia.

¹¹Mayo nang maagi diyan maski tawo o hayop. Sa laog nin kwarentang taon, mayo nin maerok diyan.

¹²An Egipto gigibohon kong pinakamamondong daga sa kinaban. Sa laog nin kwarentang taon, magigin rumpag an mga syudad nin Egipto, orog pang rumpag ki sa arin man na syudad. An mga Egipcio iwawarak ko sa mga nasyon, asin mag-eerok sinda sa tahaw nin ibang mga nasyon.”

¹³Ini an itinataram nin Kagurangnan Dios, “Pakatapos kan kwarentang taon, titiponon ko an mga Egipcio hale sa mga nasyon na pinagwarakan ko sainda.

¹⁴Dadarahon ko sinda sa daga nin Patros, an daga na saindang ginikanan. Sinda magigin sarong maluyang kahadean duman,

¹⁵an pinakamaluya sa gabos na kahadean, asin dai na nanggad ninda paghahadean an ibang nasyon. Ibababa ko sinda nin marahay kaya dai na nanggad maduko sainda an arin man na nasyon.

¹⁶An mga Israelita dai na nanggad masarig sa Egipto. An nangyari sa Egipto magpapagiromdom sa sainda na nasala sinda sa pagsarig sa nasyon na idto. Dangan maaaraman nin Israel na ako an Kagurangnan Dios.”

¹⁷Kan enot na aldaw kan enot na bulan kan ikabeynte y syeteng taon kan samuyang pagkatapokan, nagtaram sako an Kagurangnan,

¹⁸“Aki nin tawo, sinalakay ni Hadeng Nebukadnezzar kan Babilonia an Tiro. An saiyang mga soldados pinasuknong saka pinapasan niya nin magagabat na karga kaya nakalbo an saindang mga payo asin nalugadan an saindang mga abaga. Alagad an hade asin an saiyang mga soldados mayo nin nakuang anoman sa Tiro bilang kabayadan kan saindang kapagalan.

¹⁹Kaya ngunyan ini an itinataram ko, an Kagurangnan Dios: Itinatao ko an daga nin Egipto ki Hadeng Nebukadnezzar. Hahabonan niya ini asin sasamsaman dangan an kayamanan nin Egipto dadarahon niya tanganing ibayad sa saiyang hukbo.

²⁰Itinatao ko saiya an Egipto bilang kabayadan saiya, huli ta naglingkod sako an saiyang hukbo. Ako, an Kagurangnan Dios, an nagtaram.

²¹“Kun mangyari na iyan, papakosogon ko an banwaan nin Israel, dangan tutugotan taka, Ezekiel, na magtaram sa pandangog kan gabos tanganing maaraman ninda na ako an Kagurangnan.”