Read Central Bicolano Ezekiel 3 Bible Online

Ezekiel 3 - Central Bicolano bible

Ezekiel 3

¹Nagtaram an Dios, “Aki nin tawo, kakana an librong ini, dangan lakaw asin taraman mo an banwaan nin Israel.”

²Kaya nagnganga ako, asin itinao niya sako an libro tanganing kakanon ko.

³Nagsabi siya, “Aki nin tawo, kakanon mo an librong ini na itinatao ko saimo; magpakabasog ka kaini.” Kinakan ko an libro asin nanamitan kong arog ini kahamis sa dugos.

⁴Dangan nagtaram sako an Dios, “Aki nin tawo, dumuman ka sa banwaan nin Israel asin sabihan mo sinda kan itataram ko saimo.

⁵Sinusugo taka sa mga Israelita asin bakong sa sarong nasyon na nagtataram nin dipisil na lengwahe.

⁶Kun sinugo taka sa darakulang mga nasyon na nagtataram nin dipisil na mga lengwahe na dai mo nasasabotan, dadangogon ka ninda.

⁷Alagad dai ka dadangogon kan mga Israelita; habo ngani sindang magdangog sako, huli ta mga sutil sinda asin rebelde.

⁸Alagad iaarog taka katagas sainda.

⁹Gigibohon takang pusog siring sa gapo, matagas siring sa diamante; dai ka matakot sainda huli ta mga rebelde sinda.”

¹⁰Nagtaram pa siya sako, “Aki nin tawo, dangoga asin giromdoma an gabos na itinataram ko saimo.

¹¹Dangan magduman ka sa saimong mga kahimanwa na nasa pagkatapokan asin sabihan mo sinda na ini an tataramon ko sainda, ako na Kagurangnan Dios an nagtataram, magdangog man sinda saimo o dai.”

¹²Dangan initaas ako kan espiritu nin Dios, asin sa likodan ko nakadangog ako nin sarong makosog na tingog na nagsabi, “Pag-omawon an kamurawayan nin Kagurangnan sa kaitaasan nin langit!”

¹³Nadangog ko an ribok kan mga pakpak kan mga buhay na linalang mantang naglalayog an mga ini, asin an ribok kan mga rweda na arog kakosog kan ribok nin sarong makosog na linog.

¹⁴Makosog na nag-abot sakuya an kapangyarihan nin Kagurangnan asin dinara ako kan saiyang espiritu. Mantang dinadara ako, namatean ko an kapaitan nin boot asin kaaanggotan.

¹⁵Dangan nakaabot ako sa Tel Abib, sa tampi kan Salog nin Kebar, saen nag-eerok an mga itinapok, asin nag-ontok ako duman sa laog nin pitong aldaw, mga aldaw na pano nin pagngalas sa sakong nahiling saka nadangog.

¹⁶Pakalihis kan pitong aldaw, nagtaram sako an Kagurangnan,

¹⁷“Aki nin tawo, ginigibo takang bantay kan nasyon nin Israel. Itataram mo sainda an anoman na patanid na madangog mo sako.

¹⁸Kun magtaram akong magagadan an sarong maraot na tawo alagad dai mo siya pinatanidan tanganing mabago an saiyang gawe tanganing makaligtas an saiyang buhay, magagadan siya sa saiyang kasalan, alagad ika an babasolon ko sa saiyang pagkagadan.

¹⁹Alagad kun patanidan mo an maraot na tawo alagad dai siya magtalikod sa saiyang karatan, magagadan siya sa saiyang kasalan, asin ikakaligtas mo an saimong buhay.

²⁰“Siring man, kun an sarong matanos na tawo magpoon sa paggibo nin maraot, dangan ibinugtak ko siya sa pag-alaman, magagadan siya kun dai mo siya patanidan. Magagadan siya huli kan saiyang mga kasalan—dai ko na gigiromdomon an mga karahayan na saiyang ginibo—asin ika an babasolon sa saiyang pagkagadan.

²¹Alagad kun patanidan mo an matanos na tawo tanganing dai siya magkasala asin nagdangog siya saimo saka dai nagkasala, mabubuhay siya asin ikakaligtas mo man an saimong buhay.”

²²Namatean ko an mapangyaring presensya nin Kagurangnan dangan nadangog ko siyang nagtataram sako, “Tumindog ka asin magduman ka sa kapantayan; duman ako makikiolay saimo.”

²³Kaya nagduman ako sa kapantayan, asin nahiling ko duman an kamurawayan nin Kagurangnan siring kan pakahiling ko kaiyan sa tampi kan Salog nin Kebar. Nagdapa ako sa daga,

²⁴alagad naglaog sako an espiritu nin Dios asin pinatindog ako. Nagtaram sako an Kagurangnan, “Magpuli ka na asin dai ka magluwas sa saimong harong.

²⁵Gagaposon ka nin mga lubid asin dai ka makakaluwas saka makakahampang sa mga tawo.

²⁶An saimong dila papadukoton ko sa saimong ngaragngag tanganing mapola ka saka dai mo mapatanidan an rebeldeng banwaan na ini.

²⁷Dangan kun magtaram giraray ako saimo, bubukasan ko an saimong ngoso asin tataraman mo sinda na ako, an Kagurangnan Dios, an nagtataram. An iba sainda madangog alagad an iba dai, huli ta saro sindang nasyon nin mga rebelde.”