Read Central Bicolano Ezekiel 30 Bible Online

Ezekiel 30 - Central Bicolano bible

Ezekiel 30

¹Nagtaram giraray sako an Kagurangnan,

²“Aki nin tawo, magpropesiya ka asin ipahayag mo na ini an itinataram ko, an Kagurangnan Dios: Sarong aldaw na makatakot an nagdadangadang!

³Harani na an aldaw, an aldaw na may gigibohon an Kagurangnan. Sarong aldaw nin mga panganoron saka mga kapahamakan para sa mga nasyon.

⁴Magkakaigwa nin gera sa Egipto asin dakulang kasakitan sa Etiopia. Dakul sa Egipcio an magagadan; sasamsamon an yaman kan Egipto asin garabang babayaan.

⁵“An gerang iyan magadan man kan mga binayadan na mga soldados hale sa Etiopia, Libya, Lydia, Arabia, Kub, asin sagkod kan mga hale sa sakong banwaan.”

⁶Nagtataram an Kagurangnan, “An gabos na nagtatabang sa Egipto magagadan sa gera—magpoon sa Migdol sa amihan sagkod sa Aswan sa habagat. Ibabagsak an mapaabaw-abaw na hukbo nin Egipto. Ako, an Kagurangnan Dios, an nagtaram.

⁷An daga iyo an magigin pinakamamondo sa bilog na kinaban asin an mga syudad kaiyan babayaan na rumpag nanggad.

⁸Kun suloon ko na an Egipto asin magadan na an gabos na nagtabang kaiyan, dangan maaaraman ninda na ako an Kagurangnan.

⁹“Pag-abot kan aldaw na iyan, asin rumpag na an Egipto, mapadara ako nin mga sugo na nakalunad sa mga barko tanganing takoton an mayong pakaaram na banwaan nin Etiopia, dangan magkakatarakot sinda. Nagdadangadang na an aldaw na iyan!”

¹⁰Nagtataram an Kagurangnan Dios, “Gagamiton ko si Hadeng Nebukadnezzar nin Babilonia tanganing taposon na an yaman nin Egipto.

¹¹Madatong siya asin an saiyang maringis na hukbo tanganing raoton an daga. Sasalakayon ninda an Egipto na may darang espada, dangan mapapano an daga nin mga bangkay.

¹²Papamarahon ko an Salog nin Nilo asin ibubugtak ko an Egipto sa irarom kan pamamahala nin maraot na mga tawo. An bilog na nasyon raraoton nin mga dayuhan. Ako, an Kagurangnan, an nagtaram.”

¹³Nagtataram an Kagurangnan Dios, “Raraoton ko an mga ladawan asin an mga dios-dios sa Memfis. Mayo na nin maghahade sa daga nin Egipto asin tatakoton ko an gabos na tawo.

¹⁴Raraoton ko an Patros asin susuloon ko an Zoan. Papadusahan ko an pangenot na syudad nin Tebes.

¹⁵Ipapamate ko sa syudad nin Pelusium an sakong kaanggotan. Raraoton ko an gabos na kayamanan nin Tebes.

¹⁶Susuloon ko an Egipto, asin an Pelusium magkakaigwa nin dakulang kasakitan. Marurumpag an mga kudal nin Tebes asin magbabaha sa syudad na iyan.

¹⁷An mga hoben na lalaki sa mga syudad nin Heliopolis saka Bubastis magagadan sa paagi nin espada, asin mabibihag an mga babae.

¹⁸Magdidiklom an Tafnes kun barion ko na an kapangyarihan nin Egipto asin taposon ko na an kosog na ipinag-orgulyo niya. An Egipto matatahoban nin sarong panganoron asin mabibihag an gabos na tawo sa saiyang mga syudad.

¹⁹Kun padusahan ko na an Egipto sa paaging ini, maaraman ninda na ako an Kagurangnan.”

²⁰Kan ikapitong aldaw kan enot na bulan kan ikaonseng taon nin samong pagkatapokan, nagtaram sako an Kagurangnan,

²¹“Aki nin tawo, binari ko na an braso kan hade nin Egipto. Mayo nin nagbugkos o nagbolong kaiyan tanganing dai man iyan magkosog dangan magkapot giraray nin espada.

²²Kaya ini an itinataram ko, na Kagurangnan Dios: Kalaban ko an hade nin Egipto. Babarion ko an duwa niyang braso—an makosog niyang braso saka an brasong dati nang bari—dangan mabubutasan niya an espada.

²³Iwawarak ko an mga Egipcio sa bilog na kinaban.

²⁴Dangan papakosogon ko an mga braso kan hade nin Babilonia asin itatao ko saiya an sakong espada. Alagad babarion ko an mga braso kan hade nin Egipto, asin maagrangay dangan magagadan sa atubangan kan saiyang kaiwal.

²⁵Papaluyahon ko siya asin papakosogon ko an hade nin Babilonia. Kun itao ko na sa hade nin Babilonia an sakuyang espada dangan ibingat na niya iyan sa Egipto, maaraman kan gabos na ako an Kagurangnan.

²⁶Iwawarak ko sa bilog na kinaban an mga Egipcio. Dangan maaraman ninda na ako an Kagurangnan.”