Read Central Bicolano Ezekiel 31 Bible Online

Ezekiel 31 - Central Bicolano bible

Ezekiel 31

¹Kan enot na aldaw kan ikatolong bulan kan ikaonseng taon kan samuyang pagkatapokan, nagtaram sako an Kagurangnan,

²“Aki nin tawo, sabihan mo an hade nin Egipto asin an bilog niyang banwaan: Sa ano ko ikakabaing an saimong kadakulaan?

³Ibabaing taka sa sarong kahoy na sedro nin Lebanon, na may magayon saka marambong an mga sanga, halangkaw na kahoy na an poro abot sa mga panganoron.

⁴Igwa nin tubig na nagpapatalubo kaiyan, asin an katubigan sa irarom an nagpapahalangkaw kaiyan. Tinubigan ninda an lugar na natatanoman kaiyan, asin man an gabos na kahoy kan kadlagan.

⁵Kaya an kahoy na iyan naghalangkaw orog pa ki sa arin man na kahoy sa kadlagan. Nagdarakula saka nagharalaba an mga sanga kaiyan.

⁶Sa mga sanga kaiyan naggibo nin salagan an gabos na klase nin gamgam; sa lindong kaiyan nag-orogbon an mga lalaw na hayop; sa lindong kaiyan nag-erok an mga nasyon sa kinaban.

⁷Magayon na marahay an kahoy na iyan— halangkaw nin marahay, na may haralabang sanga. An mga gamot kaiyan nakaabot sa hararom na katubigan.

⁸Mayo nin arin pa man na sedro sa tatamnan nin Dios an makakaarog kaiyan. Mayo nin kahoy na pino na igwa nin siring na mga sanga, asin mayo nin kahoy na igwa nin mga sangang arog kaiyan; mayong kahoy sa tatamnan nin Dios an arog kaiyan an kagayonan.

⁹Ginibo ko iyan na magayon, na may marambong na mga sanga. Naori diyan an gabos na kahoy sa Eden, an tatamnan nin Dios.

¹⁰“Kaya ako, an Kagurangnan Dios, an nagtataram saimo kun ano an mangyayari sa kahoy na iyan na naghalangkaw sagkod na an poro nakaabot sa mga panganoron. Mantang naghahalangkaw iyan, nagin mapaabaw-abaw man.

¹¹Kaya isinikwal ko iyan asin itatao sa kamot nin sarong dayuhan na pamayo, na iyo an matao sa kahoy na iyan kan maninigo sa saiyang karatan.

¹²Papalodon iyan dangan babayaan kan mariringis na mga dayuhan. Mababari an mga sanga kaiyan dangan mahugpa sa gabos na bukid saka kapantayan kan daga. Maharale an gabos na nasyon na nag-erok sa lindong kaiyan.

¹³Sa natumbang kahoy na iyan matugdon an mga gamgam, asin an mga sanga kaiyan titimaktimakan kan lalaw na mga hayop.

¹⁴Kaya magpoon ngunyan, maski marahay an patubig, mayo nang kahoy na mahalangkaw nin marahay saka mapaabot kan saiyang poro sa mga panganoron. Gabos iyan magagadan arog sa mga tawo; gabos natatalaga sa pakiiba sa mga yaon sa kinaban nin mga gadan.”

¹⁵Ini an itinataram nin Kagurangnan Dios, “Sa aldaw na an kahoy na iyan magduman sa kinaban nin mga gadan, papalantopan ko iyan sa katubigan na nasa kairaroman bilang pagmondo, asin pupugolon ko an mga salog saka mga sapa tanganing dai magbulos paluwas. Huli ta gadan na an kahoy na iyan, papatoson ko nin kadikloman an kabukidan nin Lebanon, asin maaalang an gabos na kahoy kan kadlagan.

¹⁶Kun ihulog ko na iyan sa kinaban kan mga gadan, an tanog kan pagbagsak kaiyan makakatanyog sa mga nasyon. An gabos na kahoy sa Eden saka an gabos na piling kahoy nin Lebanon na marahay an patubig na nagduman na sa kinaban kan mga gadan maoogma sa pagbagsak kaiyan.

¹⁷Sinda gabos maiba saiya pasiring sa kinaban kan mga gadan, tanganing mag-iba sa mga nagkagaradan na. Dangan an gabos na nag-erok sa lindong kan kahoy na iyan mawawarak sa mga nasyon.

¹⁸“An kahoy na iyan iyo an hade nin Egipto asin an bilog niyang banwaan. Dai nakaarog sa kamurawayan saka kadakulaan kaiyan an arin man na kahoy sa Eden. Alagad ngunyan, arog kan kakahoyan nin Eden maduman iyan sa kinaban kan mga gadan, tanganing masakaibahan kan mga tawong bakong diosnon asin mga nagkagaradan sa gera. Ako an nagtaram,” olay nin Kagurangnan Dios.