Read Central Bicolano Ezekiel 32 Bible Online

Ezekiel 32 - Central Bicolano bible

Ezekiel 32

¹Kan enot na aldaw kan ikadoseng bulan kan ikadoseng taon nin samuyang pagkatapokan, nagtaram sako an Kagurangnan,

²“Aki nin tawo, patanidan mo an hade nin Egipto asin itao mo saiya an mensaheng ini: Garo ka leon kun minahiro sa atubang kan mga nasyon, alagad orog kang nakakaarog sa sarong buayang naglalangoy-langoy sa salog. Pinapalabog mo an tubig huli kan saimong mga bitis asin dinidigtaan mo an mga salog.

³Kun magtiripon na an mga nasyon, dadakopon taka sa sakong hikot, dangan ipapaguyod ko sa sainda an hikot pasiring sa baybayon.

⁴Itatapok taka sa daga dangan dadarahon ko an gabos na gamgam saka mga hayop sa kinaban tanganing kakanon ka.

⁵An mga bukid saka mga kapantayan papanoon ko kan naglalapa mong bangkay.

⁶Iuula ko an dugo mo sagkod na maglakop iyan sa mga bukid asin mapano kaiyan an mga sapa.

⁷Sa panahon na gadanon taka, tatahoban ko an kalangitan asin papadiklomon ko an mga bitoon. An aldaw matago sa mga panganoron asin an bulan dai matao nin liwanag.

⁸Papalsokon ko an gabos na ilaw sa langit asin padidiklomon ko an saimong daga. Ako, an Kagurangnan Dios, an nagtaram.

⁹“Dakul na nasyon an magkakariribok kun an saimong pagkarumpag ibareta ko na sa mga daga na dai mo pa aram.

¹⁰Makukubhanan an dakul na nasyon sa gigibohon ko saimo. An saindang mga hade magtatakig sa takot kun iwasiwas ko na an sakong espada. Sa aldaw nin saimong pagbagsak, gabos sinda magtatakig sa takot para sa sadiri nindang buhay.”

¹¹Ini an itinataram nin Kagurangnan Dios sa hade nin Egipto: “Maatubang ka sa espada kan hade nin Babilonia.

¹²Tutugotan kong gadanon nin mga soldados na gikan sa makuring mga nasyon an saimong banwaan. An bilog mong banwaan asin an gabos na ipinag-oorgulyo mo magagadan.

¹³Gagadanon ko an gabos mong hayop sa lambang pararaan. Mayo na nanggad nin tawo o hayop na madigta kan mga tubig na iyan.

¹⁴Dangan papalinawon ko an saimong katubigan asin gigibohon kong magin matoninong an pagbulos kan tubig sa saimong mga salog. Ako, an Kagurangnan Dios, an nagtaram.

¹⁵Kun pamondoon ko na an Egipto asin gadanon ko na an gabos na nag-eerok diyan, maaaraman ninda na ako an Kagurangnan.

¹⁶An patanid na ini magigin sarong awit nin panambitan. Aawiton ini kan kababaehan nin mga nasyon sa pagmondo para sa Egipto asin para sa mga nag-eerok diyan. Ako, an Kagurangnan Dios, an nagtaram.”

¹⁷“Kan ikakinseng aldaw kan enot na bulan kan ikadoseng taon nin samuyang pagkatapokan, nagtaram sako an Kagurangnan,

¹⁸“Aki nin tawo, magmondo ka para sa dakul na Egipcio. Isubol mo sinda sa kinaban kan mga gadan kaiba kan mga taga ibang nasyon.

¹⁹Sabihan mo sinda: “Naghohona kamong mas magayon kamo ki sa iba? Maduman kamo sa kinaban kan mga gadan asin kaiba kan mga bakong diosnon, mahigda kamo duman.

²⁰“An mga Egipcio mabagsak kaiba kan mga nagkagaradan sa gera. Andam na an sarong espada na magadan sainda gabos.

²¹Sasabaton sinda sa kinaban kan mga gadan kan dakulang mga pamayo na nag-apil sainda sa gera. Makurahaw an mga ini: ‘Nag-abot na digdi an bakong diosnon na mga tawong nagkagaradan sa gera, asin uya sinda digdi naghihigda!’

²²“Yaon duman an Asiria, na napapalibotan kan mga lulubngan kan saiyang mga soldados. Sinda gabos nagadan sa gera

²³asin an saindang mga lulubngan yaon sa pinakahararom na kabtang kan kinaban kan mga gadan. An gabos niyang soldados na nagadan sa gera, asin an saindang lulubngan nakapalibot sa lulubngan niya. Alagad kaidto tinakot ninda an daga kan mga nabubuhay.

²⁴“Yaon duman an Elam, na napapalibotan kan mga lulubngan kan saiyang mga soldados. Gabos sinda nagadan sa gera, asin naglusad, sinda na bakong diosnon na mga tawo, sa kinaban kan mga gadan. Kan buhay pa sinda, tinakot ninda an daga kan mga nabubuhay, alagad ngunyan dara ninda sa lulubngan an kasosopgan kaiba kan mga nagkagaradan.

²⁵Naghihigda siya kaiba kan mga nagadan sa gera, asin an saiyang lulubngan napapalibotan kan mga lulubngan kan saiyang mga soldados. An mga ini gabos bakong diosnon na tawo, na nagadan sa gera. Kan buhay pa sinda, tinakot ninda an daga kan mga nabubuhay, alagad ngunyan dara ninda sa lulubngan an kasosopgan kaiba kan mga nagkagaradan.

²⁶“Yaon man duman an Mesek saka an Tubal, na napapalibotan kan mga lulubngan kan saindang mga soldados. Sinda gabos bakong diosnon na tawo, asin sinda gabos nagadan sa gera. Kan buhay pa sinda, tinakot ninda an daga kan mga nabubuhay.

²⁷An paglubong sainda bakong arog kan paglubong sa mga bayani kan nakaaging panahon, na dara an mga armas sa kinaban kan mga gadan, na nauulonan an espada asin an saindang kalasag nasa ibabaw kan saindang daghan. An mga bayaning ini igwa kaidto nin kapangyarihan sa pagtakot sa daga kan mga nabubuhay.

²⁸“Siring kaiyan an mangyayari sa mga Egipcio, ronot na mahigda kaiba kan bakong diosnon na mga tawong nagkagaradan sa gera.

²⁹“Yaon duman an Edom kaiba an saiyang mga hade saka mga prinsipe. Mga mapangyaring soldados sinda, alagad ngunyan naghihigda kaiba kan bakong diosnon na mga tawong nagkagaradan sa gera.

³⁰“Yaon duman an gabos na prinsipe sa amihan; siring man an mga taga Sidon. Mapangyari sinda asin nanakot kaidto, alagad ngunyan naglusad sindang dara an kasosopgan kaiba kan mga nagkagaradan. Sinda bakong diosnon na mga tawo, na dara an kasosopgan kan maglusad sa kinaban kan mga gadan kaiba kan mga nagkagaradan.

³¹“An kamugtakan ninda magigin sarong kaalingan para sa hade nin Egipto asin sa saiyang hukbo,” an olay nin Kagurangnan Dios.

³²“Tinugotan kong manakot sa daga kan mga nabubuhay an hade nin Egipto, alagad magagadan siya asin an saiyang hukbo, dangan ilulubong kaiba kan bakong diosnon na mga tawong nagkagaradan sa gera.” Ako, an Kagurangnan Dios, an nagtaram.