Read Central Bicolano Ezekiel 33 Bible Online

Ezekiel 33 - Central Bicolano bible

Ezekiel 33

¹Nagtaram sako an Kagurangnan,

²“Aki nin tawo, ipahayag mo sa saimong banwaan an mangyayari kun magpadara na ako nin gera sa sarong lugar. An mga nag-eerok sa lugar na iyan mapili nin sarong bantay.

³Kun mahiling na niyang nagdadangadang an kaiwal, papatanogon niya an trompeta bilang patanid sa mga tawo.

⁴An siisay man na makadangog kaiyan dangan dai magpahalaga sa patanid na iyan, magagadan pag-abot kan kaiwal; siya an babasolon sa saiyang pagkagadan.

⁵Siya an babasolon, huli ta dai niya pinahalagahan an patanid. Kun pinahalagahan kuta niya, nakadulag kuta siya.

⁶Alagad kun mahiling kan bantay an nagdadangadang na kaiwal dangan dai niya patanogon an trompeta tanganing patanidan an mga tawo, an bantay an babasolon ko kan saindang pagkagadan.

⁷“Kaya ngunyan, aki nin tawo, ginibo takang bantay kan nasyon nin Israel. Itataram mo sainda an ano man na patanid na madadangog mo sako.

⁸Kun magtaram akong magagadan an sarong maraot na tawo alagad dai mo siya pinatanidan tanganing mabago an saiyang gawe tanganing makaligtas an saiyang buhay, magagadan siya sa saiyang kasalan, alagad ika an babasolon ko sa saiyang pagkagadan.

⁹Alagad kun patanidan mo an maraot na tawo alagad dai siya magtalikod sa saiyang karatan, magagadan siya sa saiyang kasalan, asin ikakaligtas mo an saimong buhay.”

¹⁰Nagtaram sako an Kagurangnan, “Aki nin tawo, ipagiromdom mo sa mga Israelita kun ano an pinagsasabi ninda: ‘Nagagabatan kami kan samong mga kasalan asin mga kasombikalan. Luway-luway kaming nagagadan; paano pa kaming mabubuhay?’

¹¹Sabihan mo sinda na mantang ako, an Kagurangnan Dios na buhay, dai ako naoogma kun nagagadan an sarong parakasala; kundi boot kong mag-ontok siya sa pagkakasala dangan mabuhay. Israel, ontoka an karatan na saimong ginigibo. Tadaw ta boot mong magadan?

¹²“Aki nin tawo, taraman mo an saimong banwaan na kun magkasala an sarong matanos na tawo, dai siya ikakaligtas kan karahayan na saiyang ginibo. Kun an sarong tampalasan mag-ontok sa paggibo nin karatan, dai siya papadusahan, asin kun an sarong matanos magpoon na magkasala, dai niya ikakaligtas an saiyang buhay.

¹³Pwede akong manuga na an matanos mabubuhay, alagad kun mag-isip siyang tama na an mga karahayan na ginibo niya kaidto dangan magpoon siyang magkasala, dai ko gigiromdomon an mga karahayan na ginibo niya. Magagadan siya huli kan saiyang mga kasalan.

¹⁴Pwede kong patanidan an sarong tampalasan na siya magagadan, alagad kun ontokon niya an saiyang pagkakasala dangan maggibo siya nin matanos saka marahay—

¹⁵halimbawa ibalik niya an garantiya nin sarong utang o ipuli an saiyang hinabonan—kun ontokon niya an saiyang pagkakasala dangan otobon niya an mga togon na nagdadara nin buhay, dai siya magagadan kundi mabubuhay.

¹⁶Papatawadon ko an mga kasalan na saiyang ginibo, asin mabubuhay siya huli ta ginibo niya an matanos saka tama.

¹⁷“Alagad minasabi an saimong banwaan na bakong tama an sakong ginigibo maski ngani an saindang ginigibo iyo an bakong tama!

¹⁸Kun ontokon kan sarong matanos an paggibo nin marahay dangan maggibo siya nin karatan, magagadan siya huli kaiyan.

¹⁹Kun ontokon kan sarong tampalasan an paggibo nin karatan, dangan maggibo siya nin matanos saka tama, mabubuhay siya huli kaiyan.

²⁰Alagad Israel, minasabi ka na bakong tama an sakong ginigibo. Huhukoman taka sosog sa mga ginigibo mo.”

²¹Kan ikalimang aldaw kan ikasampolong bulan kan ikadoseng taon kan samuyang pagkatapokan, sarong lalaking nakadulag hale sa Jerusalem an nag-abot dangan nagbareta sako kan pagbagsak kan Jerusalem.

²²Kan bisperang banggi kan saiyang pag-abot namatean ko an mapangyaring presensya nin Kagurangnan. Pagkaaga, pag-abot kan lalaki, ibinalik na sako nin Kagurangnan an kapangyarihan sa pagtaram dangan bako na akong pola.

²³Nagtaram sako an Kagurangnan,

²⁴“Aki nin tawo, an mga nag-eerok sa mga rumpag na syudad kan daga nin Israel nagsasarabi: ‘Saro sana si Abraham alagad itinao saiya an bilog na daga. Ngunyan mas dakul na kita, kaya satuya na an daga.’

²⁵“Kaya sabihan mo sinda na ini an itinataram ko, an Kagurangnan Dios: Nagkakakan kamo nin karne na igwa pa nin dugo. Nagsasamba kamo sa mga dios-dios, saka nanggagadan. Papaano nindo naiisip na sadiri nindo an daga?

²⁶Nananarig kamo sa saindong mga espada. Makauuyam an saindong mga gawe, asin an lambang saro saindo nakikidorog sa bako niyang agom. Paano nindo naiisip na sadiri nindo an daga?

²⁷“Sabihan mo sinda na ini an tataramon ko, an Kagurangnan Dios: Mantang ako an Dios na buhay, magagadan sa espada an mga nag-eerok sa rumpag na mga syudad. An mga nag-eerok sa kaomahan kakakanon kan mga lalaw na hayop. An mga nagtatago sa mga kabukidan saka mga lungib magagadan sa peste.

²⁸Gigibohon kong mamondo saka alang an daga, asin matatapos an kapangyarihan na ipinag-oorgulyo ninda. An kabukidan nin Israel magigin makatatakot kaya mayo na nin maagi duman.

²⁹Kun padusahan ko na an banwaan huli kan saindang mga kasalan, asin kun an daga gibohon ko nang mamondo saka alang, dangan maaaraman ninda na ako an Kagurangnan.”

³⁰Nagtaram an Kagurangnan, “Aki nin tawo, an saimong banwaan nagtataram manongod saimo kun nagtitiripon sinda harani sa mga kudal kan syudad asin sa may pintoan kan saindang mga harong. An olay ninda, ‘Madya asin dangoga an mensahe na hale sa Kagurangnan.’

³¹Kaya nagtitiripon sa pagdangog saimo an sakong banwaan, alagad dai ninda gigibohon an ipinapagibo mo. Oomawon ninda an saimong itinataram, alagad magpapadagos sinda sa saindang kapasloan.

³²Para sa sainda, arog ka man sana sa sarong parakanta nin mga awit nin pagkamoot na igwa nin magayon na tingog, asin arog sa sarong paratugtog nin sarong instrumento. Dadangogon ninda an gabos mong itinaram alagad dai ninda susunodon maski an saro kaiyan.

³³Alagad kun magkatotoo na an gabos mong itinaram—asin magkakatotoo mananggad iyan—dangan maaaraman ninda na igwa nin sarong propeta sa tahaw ninda.”