Read Central Bicolano Ezekiel 34 Bible Online

Ezekiel 34 - Central Bicolano bible

Ezekiel 34

¹Nagtaram sako an Kagurangnan,

²“Aki nin tawo, magpropesiya ka laban sa mga namamayo nin Israel. Sabihan mo sinda na ini an tataramon ko, an Kagurangnan Dios: Herak man saindo, mga pastor nin Israel! Binabasog nindo an saindong sadiri, alagad dai nindo inaataman an mga karnero.

³Iniinom nindo an gatas, ginigibong gubing an balukag asin binubuno nindo an pinakamarahay na mga karnero, alagad dai nindo sinda inaataman.

⁴Dai nindo pinakosog an mga maluluya, dai binolong an mga naghehelang, dai binugkosan an mga nalugadan, dai ibinalik an mga nalagalag, asin dai hinanap an mga nawara. Embes kaiyan ipinamate nindo sainda an saindong kakurihan saka kadahasan.

⁵Huli ta an mga karnero mayo nin pastor, nagkawararak sinda asin ginadan dangan kinakan kan mga lalaw na hayop.

⁶Kaya an sakong mga karnero nagkaralagalag sa kabukidan saka sa kabubuldan. Nagkawararak sinda sa bilog na daga asin mayo man lamang nin naghanap saka naghingowang makua sinda.

⁷“Kaya, kamong mga pastor, dangoga nindo an tataramon ko, an Kagurangnan:

⁸Ako an Dios na buhay, kaya mas marahay para saindo na maghinanyog kamo sako. An sakong mga karnero sinalakay kan mga lalaw na hayop, ginadan sinda dangan kinakan, huli ta mayo sinda nin pastor. An mga karnero dai hinanap kan sakong mga pastor. Inataman ninda an saindang sadiri asin bakong an mga karnero.

⁹Kaya paghinanyog kamo, kamong mga pastor.

¹⁰Ini an tataramon ko, an Kagurangnan Dios: Kalaban ko kamo. Hahaleon ko saindo an sakong mga karnero asin bako na kamo an mag-aataman sainda. Ililigtas ko sa kamot nindo an sakong mga karnero tanganing dai nindo sinda makakan.

¹¹“Ako, an Kagurangnan Dios, an minataram saindo na ako mismo an mahanap kan sakong mga karnero asin maataman sainda,

¹²siring na an sarong pastor nag-aataman kan saiyang mga karnerong nagkawararak, asin tinitipon niya giraray. Ibabalik ko sinda hale sa mga lugar na pinagkawararakan ninda kaidtong madiklom saka makuri na aldaw.

¹³Hahaleon ko sinda sa dayuhan na mga nasyon dangan ibabalik ko sa sadiri nindang daga. Pasasabsabon ko sinda sa kabukidan nin Israel asin dadarahon ko sa mga burabod nin tubig; papakakanon ko sinda sa mga berdeng pasabsaban kan daga.

¹⁴Ligtas na pasasabsabon ko sinda sa kabukidan nin Israel, sa mga kapatagan asin sa mga berdeng pasabsaban kan daga.

¹⁵Ako mismo an magigin pastor kan sakong mga karnero, asin ihahanap ko sinda nin lugar na pahingaloan. Ako, an Kagurangnan Dios, an nagtaram.

¹⁶“Hahanapon ko an mga karnerong nawara, ibabalik ko an mga nalagalag, bubugkosan ko an mga nalugadan, asin bobolongon an mga may helang; alagad an mga karnerong matataba saka makokosog sakuyang gagadanon, huli ta ako sarong pastor na naggigibo nin matanos.

¹⁷“Kamong mga karnero ko, ako, an Kagurangnan Dios, an nagtataram saindo na huhukoman ko an lambang saro saindo asin isisiblag ko an mga marahay sa mga maraot, an mga karnero sa mga kanding.

¹⁸An iba saindo bako sanang nagkakakan kan marahay na sabsabon kundi tinitimaktimakan pa nindo an ibang mga sabsabon. Iniinom nindo an malinig na tubig, asin pinapalabog nindo an tubig na dai nindo iniinom!

¹⁹Kaya an iba kong mga karnero nagkakakan kan mga doot na tinimaktimakan nindo, asin nag-iinom kan tubig na pinalabog nindo.

²⁰“Kaya ini an tataramon ko, an Kagurangnan Dios: Ako mismo an mahukom sa mataba saka sa maniwang na mga karnero.

²¹Sinusuag nindo an mga may helang sagkod na mapaharayo sa saindang kairiba.

²²Alagad ililigtas ko an sakong mga karnero asin dai ko na tutugotan na magin biktima pa sinda. Huhukoman ko an lambang karnero dangan sisiblagon ko an mga marahay sa mga maraot.

²³Tatawan ko sinda nin sarong hade na arog kan sorogoon kong si David, tanganing iyo sana an magpastor asin mag-ataman sainda.

²⁴Ako, an Kagurangnan, iyo an magigin Dios ninda, asin an sarong hadeng arog kan sorogoon kong si David iyo an magigin pamayo ninda. Ako, an Kagurangnan, an nagtaram.

²⁵Makikipagtipan ako sainda nin sarong tipan nin katoninongan asin hahaleon ko an mga lalaw na hayop sa daga, tanganing an sakong mga karnero matiwasay na mag-erok sa kaomahan asin magkatorog sa mga kadlagan.

²⁶“Bebendisyonan ko sinda asin tutugotan na mag-erok sa palibot kan sakong banal na bulod. Papadarahan ko sinda duman nin uran sa tamang panahon; an uran na iyan magigin sarong bendisyon.

²⁷An mga kahoy mamumunga, an kaomahan matao nin ani, asin an lambang saro matiwasay na mag-eerok sa sadiri niyang daga. Kun putolon ko na an mga kadena nin sakong banwaan asin patalingkason ko na sinda sa mga nag-oripon sainda, dangan maaaraman ninda na ako an Kagurangnan.

²⁸Dai na sinda hahabonan kan ibang mga nasyon, asin dai na sinda gagadanon dangan kakakanon kan mga lalaw na hayop. Matoninong sindang mag-eerok asin mayo nin magpapatakot sainda.

²⁹Tatawan ko sinda nin marahay na kaomahan asin tataposon ko na an gutom sa daga. Dai na sinda pagtutuyatuyaon kan mga nasyon.

³⁰Maaaraman kan gabos na ako, an Kagurangnan na saindang Dios, kaiba ninda asin sinda an sakong banwaan. Ako, an Kagurangnan Dios, an nagtaram.

³¹“Kamo, na sakong mga karnero, an ariponpon na sakuyang pinapakakan, iyo an sakong banwaan asin ako an saindong Dios,” an olay nin Kagurangnan Dios.