Read Central Bicolano Ezekiel 35 Bible Online

Ezekiel 35 - Central Bicolano bible

Ezekiel 35

¹Nagtaram sako an Kagurangnan,

²“Aki nin tawo, kondenaron mo an daga nin Edom.

³Sabihan mo sinda na ini an itinataram nin Kagurangnan Dios: “Kalaban taka, kabukidan nin Edom! Ibibikyaw ko an sakong kamot laban saimo dangan gigibohon takang sarong mamondo saka alang na daga.

⁴Pababayaan kong rumpag an saimong mga syudad asin mamondo an saimong daga; dangan maaaraman mo na ako an Kagurangnan.

⁵“Danay na kaiwal ka nin Israel asin pinabayaan mong magkagaradan an mga namamanwaan diyan sa panahon nin saindang kasakitan, an panahon nin huring pagpadusa sainda huli kan saindang mga kasalan.

⁶Kaya mantang ako, an Kagurangnan Dios na buhay, nagtataram ako saimo na kagadanan an saimong kataposan asin dai mo iyan madudulagan. Maninigo kang padusahan huli sa paggadan, kaya kagadanan man an malamag saimo.

⁷An mabulod na banwaan nin Edom gigibohon kong sarong alang na daga asin gagadanon ko an siisay man na mag-agi duman.

⁸An kabukidan papanoon ko nin mga bangkay, asin an mga bangkay kan nagkagaradan sa gera an makakapano kan mga bulod saka mga kapantayan.

⁹Ika, Edom, gigibohon kong mamondo sagkod lamang, asin mayo na nanggad nin mag-eerok sa saimong mga syudad. Dangan maaaraman mo na ako an Kagurangnan.

¹⁰“Nagsabi kang sadiri mo an duwang nasyon nin Juda saka Israel, kaiba an saindang mga daga, asin sasadirihon mo an mga iyan maski ako, an Kagurangnan, iyo an saindang Dios.

¹¹Kaya mantang ako, an Kagurangnan Dios na buhay, nagtataram ako saimo na babaloson taka huli kan saimong kaanggotan, pagkaara asin pagkaongis sa sakuyang banwaan. Maaaraman ninda na pinapadusahan taka huli kan ginibo mo sainda.

¹²Dangan maaaraman mo na ako, an Kagurangnan, an nakadangog saimo kan may pagtuyatuya na nagsabi kang mamondo an mga bukid nin Israel asin hahalonon mo an mga iyan.

¹³Nadangog ko an dakul na kahambogan na sinabi mo tumang sako.”

¹⁴Ini an itinataram nin Kagurangnan Dios, “Gigibohon takang mamondo nin makuri tanganing an bilog na kinaban mag-ogma sa saimong pagbagsak,

¹⁵siring na nag-ogma ka kan marumpag an Israel, an nasyon na sadiri ko. An bukid nin Edom, an bilog na daga nin Edom, magigin mamondo. Dangan maaaraman kan gabos na ako an Kagurangnan.”