Read Central Bicolano Ezekiel 36 Bible Online

Ezekiel 36 - Central Bicolano bible

Ezekiel 36

¹Nagtaram an Kagurangnan, “Aki nin tawo, magpropesiya ka laban sa mga bukid nin Israel asin sabihan mo sinda na dangogon an mensahe ko sainda.

²Ini an tataramon ko sainda, ako an Kagurangnan Dios: An mga kaiwal nin Israel may kapasloan na nagsabi, ‘Ngunyan samuya na ining suanoy na kabubuldan!’

³“Kaya magpropesiya ka asin isabi mo na ini an itinataram ko, an Kagurangnan Dios: Kan an kabukidan nin Israel sakopon asin samsaman kan mga kataraed na nasyon, an Israel pinag-olog-olog kan gabos na banwaan.

⁴Kaya ini an itinataram ko, an Kagurangnan Dios, sa saindo, mga bukid saka mga bulod, mga ampas saka mga kapantayan, mga lugar na mamondo saka mga syudad na mayo nang nag-eerok, na sinamsaman asin pinagtuyatuya kan gabos na nasyon sa palibot.

⁵“Ako, an Kagurangnan Dios, nagtataram sa maimon kong kaanggotan laban sa mga nasyon sa palibot, asin sa bilog na Edom. Pano nin kaogmahan saka pagtuyatuya na sinakop ninda an sakong daga dangan sinamsaman.

⁶“Kaya magpropesiya ka manongod sa daga nin Israel asin sabihan mo an mga bukid saka mga bulod, an mga ampas saka mga kapantayan, na ini an itinataram ko, an Kagurangnan Dios: Nagtataram akong igwa nin maimon na kaanggotan, huli ta nagtios kamo kan mga pagtuyatuya kan mga nasyon.

⁷Kaya ako, an Kagurangnan Dios, minasumpa na an mga nasyon sa palibot nindo pagtutuyatuyaon man.

⁸Alagad sa kabukidan nin Israel, an mga kahoy magdadahon asin mamumunga para sa saindo, sakuyang banwaan nin Israel. Madali na kamong magpuli.

⁹Kaapil nindo ako, asin hihingowahon ko na an saindong daga maarado giraray dangan matanoman.

¹⁰Papadakulon ko an saindong bilang. Mag-eerok kamo sa mga syudad asin hihirahayon nindo giraray an mga nagkararaot.

¹¹Papadakulon ko an bilang kan mga tawo saka mga hayop. Magigin mas dakul sinda ki sa kaidto, asin magkakaigwa kamo nin dakul na aki. Mag-eerok kamo duman arog kaidtong panahon asin orog ko kamong papauswagon. Dangan maaaraman nindo na ako an Kagurangnan.

¹²Banwaan kong Israel, ibabalik ko kamo sa daga tanganing duman giraray mag-erok. Masasadirihan nindo iyan asin dai nanggad tutugotan kaiyan na magutom an saindong kaakian.

¹³“Ini an itinataram ko, an Kagurangnan Dios: Totoong an daga inaapod kan banwaan na sarong daga na parakakan nin tawo saka parahabon kan mga aki kan nasyon.

¹⁴Alagad magpoon ngunyan, dai na iyan aapodon na sarong parakakan nin tawo, na nanghahabon kan mga aki kan nasyon. Ako, an Kagurangnan Dios, an nagtaram.

¹⁵An daga dai ko na tutugotan na makadangog pa nin mga pagtuyatuya kan mga nasyon, asin dai na iyan matios kan mga pagsopog nin mga banwaan. Dai na kaiyan hahabonan nin mga aki an nasyon. Ako, an Kagurangnan Dios, an nagtaram.”

¹⁶Nagtaram sako an Kagurangnan,

¹⁷“Aki nin tawo, kan an mga Israelita mag-erok sa sadiri nindang daga, dinigtaan ninda ini sa paagi kan saindang pamumuhay saka mga gibo. An saindang gawe ibinilang kong arog sa pagkani-maati nin sarong babae na nasa panahon nin pagregla.

¹⁸Kaya inula ko sa sainda an labi-labi kong kaanggotan huli kan dakul na dugo na pinabulos ninda sa daga, asin huli kan mga dios-dios na nagin dahelan kan pagdigta ninda sa daga.

¹⁹Hinukoman ko sinda sosog sa saindang pamumuhay saka mga gibo, asin iwinarak ko sinda sa mga dayuhan na nasyon.

²⁰Saen man sinda nagduman, dinarahan ninda nin kasosopgan an banal kong ngaran kan magsabi an mga banwaan manongod sainda, ‘Ini an banwaan nin Kagurangnan, alagad kaipuhan maghale sinda sa saiyang daga.’

²¹Alagad may pagmakulog ako sa banal kong ngaran, na dinigtaan kan mga Israelita saen man sinda nagduman.

²²“Kaya sabihan mo an mga Israelita na ini an itinataram ko, an Kagurangnan Dios: Banwaan nin Israel, an gigibohon ko bakong huli sa saindo, kundi huli sa banal kong ngaran na dinigtaan nindo sa lambang nasyon na dinumanan nindo.

²³Kun ipahiling ko na sa mga nasyon an kabanalan kan dakula kong ngaran, an ngaran na dinigtaan nindo sa tahaw ninda, dangan maaaraman ninda na ako an Kagurangnan. Ako, an Kagurangnan Dios, an nagtaram. Gagamiton ko kamo tanganing ipahiling sa mga nasyon na ako banal.

²⁴Hahaleon ko kamo sa lambang nasyon asin daga dangan ibabalik ko kamo sa sadiri nindong daga.

²⁵Wiwirikan ko kamo nin malinig na tubig dangan magigin malinig na kamo sa gabos nindong dios-dios asin sa gabos na nakadigta sa saindo.

²⁶Tatawan ko kamo nin bagong puso, asin bubugtakan ko kamo nin bagong espiritu. Hahaleon ko sa saindo an sutil na pusong gapo asin tatawan ko kamo nin pusong makinuyog.

²⁷Ibubugtak ko saindo an sakong espiritu asin gigibohon ko nanggad na magkuyog kamo sa sakong mga togon saka mag-otob kan mga pagboot na itinao ko saindo.

²⁸Dangan mag-eerok kamo sa daga na itinao ko sa saindong mga ginikanan. Kamo an magigin banwaan ko asin ako an saindong magigin Dios.

²⁹Ililigtas ko kamo sa gabos na nakakadigta saindo. Pagbobotan ko an trigo na magdakul, tanganing dai na nanggad kamo magkaigwa nin gutom.

³⁰Papadakulon ko an bunga kan saindong mga kahoy saka mga oma, tanganing dai na kamo magkaigwa nin gutom na masopog sa saindo sa tahaw kan mga nasyon.

³¹Dangan magigiromdoman nindo an maraot nindong mga ugale saka mga gawe. Mauuyam kamo sa saindong sadiri huli kan saindong mga kasalan asin kasombikalan.

³²O Israel, boot kong maaraman mo na ginigibo ko an gabos na ini bakong huli saimo. Boot kong mamatean mo an kasosopgan saka an pagkawara nin onra huli kan mga ginigibo mo. Ako, an Kagurangnan Dios, an nagtaram.”

³³Ini an itinataram nin Kagurangnan Dios, “Sa aldaw na linigan ko na kamo kan gabos nindong kasalan, tutugotan ko kamong mag-erok giraray sa saindong mga syudad asin maghirahay kan mga nagkararaot.

³⁴Nahiling kan gabos na nag-aragi kaidto sa saindong kaomahan na alang na an mga ini, alagad tutugotan ko kamong omahon giraray iyan.

³⁵Dangan mataram sinda, ‘An dagang ini na alang kaidto arog na ngunyan sa tatamnan nin Eden; an mga syudad na ginaraba, sinamsaman, mamondo, pinag-eerokan na ngunyan asin pinapapusog.’

³⁶Dangan maaaraman kan mga nasyon na nagkatarada sa palibot mo na ako, an Kagurangnan, an naghihirahay kan mga raot na syudad asin nagtatanom sa kaomahan na kaidto alang. Ako, an Kagurangnan, an nagtaram, asin gigibohon ko iyan.”

³⁷Ini an itinataram nin Kagurangnan Dios, “An mga Israelita tutugotan ko giraray na maghagad sako nin tabang, asin papadakulon ko sinda sa bilang arog sa sarong ariponpon nin mga karnero.

³⁸An mga syudad na rumpag ngunyan mapapano nin mga tawo, siring na an Jerusalem dating pano nin mga karnero na idinolot bilang atang sa talaan na pyesta. Dangan maaaraman ninda na ako an Kagurangnan.”