Read Central Bicolano Ezekiel 37 Bible Online

Ezekiel 37 - Central Bicolano bible

Ezekiel 37

¹Namatean ko an mapangyaring presensya nin Kagurangnan, asin dinara ako kan saiyang espiritu dangan ibinugtak sa sarong kapantayan na pano nin mga tolang.

²Ilinibot niya ako sa kapantayan, saka nahiling ko na dakul nin marahay an mga tolang asin ini gabos alang na nin marahay.

³Nagtaram siya sako, “Aki nin tawo, pwede pa daw na mabuhay an mga tolang na ini?” Nagsimbag ako, “Kagurangnan Dios, ika sana an makakasimbag kaiyan!”

⁴Nagsabi siya, “Magpropesiya ka sa mga tolang na ini. Sabihan mo an alang na mga tolang na ini na magdangog sa itataram nin Kagurangnan.

⁵Sabihan mo sinda na ako, an Kagurangnan Dios, an nagtataram sainda: Tatawan ko kamo nin hinangos asin mabubuhay kamo.

⁶Bubugtakan ko kamo nin mga ugat saka laman asin papatoson ko kamo nin kublit. Tatawan ko kamo nin hinangos asin mabubuhay kamo. Dangan maaaraman nindo na ako an Kagurangnan.”

⁷Kaya nagpropesiya ako siring sa ipinagboot sako. Mantang nagtataram ako, nakadangog ako nin ribok saka nin kinamaskamas, asin an mga tolang nagpoon na magsurugponan.

⁸Mantang nagmamasid ako, an mga tolang nagkaigwa nin mga ugat saka laman, dangan napatos nin kublit. Alagad mayo pa nin hinangos an mga iyan.

⁹Nagtaram sako an Dios, “Aki nin tawo, magpropesiya ka sa doros. Sabihan mo an doros na ako, an Kagurangnan Dios, an nagboboot saiya na hale sa apat na direksyon hangosan ninda an gadan na mga hawak na ini tanganing magkaburuhay.”

¹⁰Kaya nagpropesiya ako siring kan ipinagboot sako. Naglaog an hinangos sa mga hawak, dangan nagkaburuhay an mga ini asin nagtirindog. Dakul sinda gabos kaya pwedeng makabilog nin sarong hukbo.

¹¹Nagtaram sako an Dios, “Aki nin tawo, arog sa mga tolang na ini an banwaan nin Israel. Nagsasabi sindang alang na sinda asin mayo na nin paglaom para sa maabot na panahon.

¹²Kaya magpropesiya ka sa sakuyang banwaan nin Israel asin sabihan mo sinda na ini an tataramon ko, an Kagurangnan Dios: Bubukasan ko an saindang mga lulubngan. Iluluwas ko sinda asin ibabalik sa daga nin Israel.

¹³Kun bukasan ko na an mga lulubngan na namumugtakan kan sakuyang banwaan, dangan iluwas ko na sinda, maaaraman ninda na ako an Kagurangnan.

¹⁴Tatawan ko sinda kan sakong espiritu asin mabubuhay sinda, dangan tutugotan ko sindang mag-erok sa sadiri nindang daga. Dangan maaaraman ninda na ako, an Kagurangnan, an nagtaram asin gigibohon ko iyan.”

¹⁵Nagtaram giraray sako an Kagurangnan,

¹⁶“Aki nin tawo, kumua ka nin taldok dangan suratan mo iyan kan mga tataramon na ini: ‘An kahadean nin Juda.’ Dangan kumua ka nin saro pang taldok asin suratan mo kan mga tataramon na ini: ‘An kahadean nin Israel.’

¹⁷Dangan sugponon mo an duwang taldok asin kapotan mo tanganing mahiling na garo saro sanang taldok an duwa.

¹⁸Kun hapoton ka kan saimong banwaan kun ano an kahulogan kaiyan,

¹⁹sabihan mo sinda na ako, an Kagurangnan Dios, an makua kan sarong taldok na tanda kan Israel asin isusugpon ko iyan sa taldok na tanda kan Juda. An duwang taldok na ini kakapotan ko na garo saro sanang taldok.

²⁰“An duwang taldok kapotan mo na garo saro sanang taldok asin ipahiling mo sa mga tawo.

²¹Dangan sabihan mo sinda na ako, an Kagurangnan Dios, an makua sainda hale sa mga nasyon na dinumanan ninda, titiponon ko sinda dangan ibabalik sa sadiri nindang daga.

²²Sasaroon ko sinda bilang saro sanang nasyon sa daga, sa kabukidan nin Israel. Magkakaigwa sinda nin saro sanang hade na mamamayo sainda, asin dai na sinda mababanga sa duwang nasyon o sa duwang kahadean.

²³Dai na ninda didigtaan an saindang sadiri huli kan saindang mga dios-dios, kan saindang makauuyam na mga gawe, asin kan saindang mga kasombikalan. Ililigtas ko sinda sa mga gawe na ipinagkasala ninda, asin lilinigan ko sinda. Sinda an magigin banwaan ko asin ako an magigin Dios ninda.

²⁴Sarong hade na arog ki David na sakuyang sorogoon an magigin hade ninda. Magkakasararo sinda sa irarom kan pamamayo nin sarong hade asin maimbod na kukuyogon ninda an sakuyang mga togon.

²⁵Mag-eerok sinda sa daga na itinao ko sa sakong sorogoon na si Jacob, an daga na pinag-erokan kan saindang mga ginikanan. Duman na sinda mag-eerok sagkod pa man, siring man an saindang mga aki asin an gabos nindang kapagarakian. Sarong hade na arog kan sorogoon kong si David an maghahade sa sainda sagkod lamang.

²⁶Makikipagtipan ako sainda nin sarong tipan nin katoninongan, asin iyan magigin sarong daing kataposan na tipan. Bebendisyonan ko sinda asin papadakulon; an sakong Templo danay na matindog sa tahaw ninda sagkod pa man.

²⁷Mag-eerok ako sa kaibahan ninda; ako an magigin Dios ninda asin sinda an magigin banwaan ko.

²⁸Kun ibugtak ko na an sakuyang Templo sa tahaw ninda sagkod pa man, dangan maaaraman kan mga nasyon na ako, an Kagurangnan, an nagpili sa Israel na magin sadiri kong banwaan.”