Read Central Bicolano Ezekiel 38 Bible Online

Ezekiel 38 - Central Bicolano bible

Ezekiel 38

¹Nagtaram sako an Kagurangnan,

²“Aki nin tawo, kondenaron mo si Gog, an pamayo kan mga nasyon nin Mesek asin Tubal sa daga nin Magog. Kondenaron mo siya

³asin sabihan mo na ini an itinataram ko, an Kagurangnan Dios: Kalaban ko siya.

⁴Bibirikon ko siya, bubugtakan nin mga banwit an saiyang mga panga, dangan guguyodon ko siya asin an saiyang hukbo pasiring sa harayo. An saiyang hukbo, kaiba an mga kabayo saka mga naka-unipormeng sakay kan mga ini, dakula nin marahay, asin an lambang soldados armado nin kalasag saka espada.

⁵Kaiba niya an mga soldados na gikan sa Persia, Etiopia, saka Libya, na gabos armado nin kalasag saka helmet.

⁶Kaiba man niya an gabos na paralaban na hale sa kadagaan nin Gomer asin Bet-togarma sa amihan, siring man an mga hukbo na gikan sa dakul pang mga nasyon.

⁷Sabihan mo si Gog na mag-andam asin na andamon man niya an gabos na hukbong sakop niya.

⁸Pakalihis nin dakul na taon, pagbobotan ko siya na salakayon an sarong banwaan na an mga tawo ibinalik asin tinipon hale sa dakul na mga nasyon dangan nag-erok na mayo nin takot sa gera. Sasalakayon niya an kabukidan nin Israel, na kaidto mamondo asin mayong nag-eerok, alagad ngunyan pinag-eerokan na nin mga tawong namumuhay na matiwasay.

⁹Siya, an saiyang hukbo asin an dakul na nasyon na kaibahan niya, masalakay siring sa sarong bagyo asin garo panganoron na tatahoban ninda an daga.”

¹⁰Ini an itinataram nin Kagurangnan Dios ki Gog, “Pag-abot kan panahon na iyan, mapoon kang magplano nin maraot.

¹¹Madesisyon kang salakayon an sarong mayong laban na banwaan, na an mga tawo matoninong asin matiwasay na namumuhay sa mga banwaan na mayo nin mga kudal o mga trangkahan.

¹²Hahabonan mo asin sasamsaman an nag-eerok sa mga syudad na kaidto gabos rumpag. Tinipon sinda hale sa mga nasyon, asin ngunyan igwa na sinda nin mga ataman na hayop saka mga pagsadiri dangan nag-eerok na sinda sa sentro kan kinaban.

¹³Hahapoton ka kan mga taga Sheba, taga Dedan, asin kan mga negosyanteng hale sa mga banwa nin Espanya, ‘Tinipon mo daw an saimong hukbo asin nagsalakay tanganing manghabon saka manamsam? Plano mo daw na kuahon an plata asin bulawan, an mga hayop saka pagsadiri, dangan maghale na dara an siring na mga sinamsaman?’”

¹⁴“Kaya, aki nin tawo, magpropesiya ka asin sabihan mo si Gog na ini an itinataram ko, an Kagurangnan Dios: “Mantang an sakuyang banwaan na Israel namumuhay na matoninong, maluwas ka,

¹⁵mahale sa lugar mo sa amihan, kaiba an dakula saka mapangyaring hukbo nin mga soldados na gikan sa dakul na nasyon, na gabos nakakabayo.

¹⁶Sasalakayon mo an sakuyang banwaan nin Israel siring sa sarong panganoron na matahob kan daga. Pag-abot kan panahon na iyan, susugoon taka sa pagsalakay sa sakuyang daga tanganing mamidbid kan mga nasyon kun siisay ako, asin mahiling ninda an sakuyang kabanalan huli kan ipapagibo ko saimo.

¹⁷Ika an sinasabi ko kaidto, kan ipahayag ko sa paagi kan mga propeta nin Israel na sakuyang mga sorogoon, na sa maabot na aldaw dadarahon ko an sarong masalakay sa Israel.” An Kagurangnan Dios an nagtaram.

¹⁸Ini an itinataram nin Kagurangnan Dios, “Sa aldaw na salakayon ni Gog an Israel, maaanggot ako.

¹⁹Sa maimon kong kaanggotan, ipinapahayag ko na sa aldaw na iyan magkakaigwa nin makosog na linog sa daga nin Israel.

²⁰An lambang sira, an lambang gamgam, asin an lambang hayop, dakula man o sadit, patin an gabos na tawo sa ibabaw nin daga magtatarakig huli sa takot sako. Marurumpag an kabukidan, mabagsak an mga ampas asin maroronot an lambang kudal.

²¹Tatakoton ko si Gog sa paagi nin gabos na klase nin katatakotan. Ako, an Kagurangnan Dios, an nagtaram. Ibibikyaw kan saiyang mga soldados an saindang espada, asin sinda man sana an maggagaradanan.

²²Papadusahan ko siya sa paagi nin peste asin garadanan. Mahugpa sa saiya, sa saiyang hukbo asin sa mga nasyon na nag-apil saiya an uran asin an yelo, kaiba an kalayo saka asupre.

²³Sa paaging ini ipapahiling ko sa gabos na nasyon na ako dakula asin banal. Maaaraman ninda na ako an Kagurangnan.”