Read Central Bicolano Ezekiel 39 Bible Online

Ezekiel 39 - Central Bicolano bible

Ezekiel 39

¹Nagtaram an Kagurangnan Dios, “Aki nin tawo, kondenaron mo si Gog, an pinakapamayo kan mga nasyon nin Mesek saka Tubal, asin sabihan mo siya na kalaban ko siya.

²Bibirikon ko siya pasiring sa sarong bagong direksyon asin gigiyahan ko paluwas sa amihan sagkod na makaabot siya sa kabukidan nin Israel.

³Dangan aagawon ko an pana saka bosog sa saiyang mga kamot.

⁴Si Gog, an saiyang hukbo, asin an mga kaapil niya matutumbang gadan sa kabukidan nin Israel. An saindang mga bangkay pababayaan kong magin kakanon nin mga gamgam saka mga lalaw na hayop.

⁵Matutumba sindang gadan sa kaomahan. Ako, an Kagurangnan Dios, an nagtaram.

⁶Mapadara ako nin kalayo sa daga nin Magog asin sa mga baybayon nin dagat saen toninong na nag-eerok an mga tawo, dangan maaaraman nin gabos na ako an Kagurangnan.

⁷Ipapamidbid ko an banal kong ngaran sa banwaan nin Israel, asin dai ko tutugotan na madigtaan pa iyan. Dangan maaaraman kan mga nasyon na ako, an Kagurangnan, iyo an banal na Dios nin Israel.”

⁸Nagtaram an Kagurangnan Dios, “Maabot nanggad an aldaw na sinabi ko.

⁹An mga nag-eerok sa mga syudad nin Israel maluwas dangan titiponon an nabayaan na mga armas tanganing gamiton bilang igatong. Maamak sinda nin kalayo na an igatong iyo an mga kalasag, mga pana, mga bosog, mga garod, saka mga pamukpok, asin masagkod an mga igatong na ini sa laog nin pitong taon.

¹⁰Dai na sinda maduman sa kaomahan tanganing mangua nin igatong, asin dai na sinda mamamalod nin kahoy sa kadlagan, huli ta an nabayaan na mga armas iyo an gagamiton ninda. Hahabonan asin sasamsaman ninda an nanghabon saka nanamsam sainda.” An Kagurangnan Dios an nagtaram.

¹¹Nagtaram an Kagurangnan, “Kun mangyari na an gabos na ini, tatawan ko si Gog nin lulubngan sa Israel, sa Kapantayan nin mga Parabyahe, na nasa sirangan kan Gadan na Dagat. Duman ilulubong si Gog asin an saiyang hukbo, dangan an kapantayan aapodon ‘Kapantayan nin Hamon-gog.’

¹²Mabilang nin pitong bulan an mga Israelita bago ninda matapos an paglubong kan gabos na bangkay asin an paglinig sa daga.

¹³An lambang saro sa daga matabang sa paglubong, asin oomawon sinda sa aldaw nin sakuyang panggana. Ako, an Kagurangnan Dios, an nagtaram.

¹⁴Pakalihis kan pitong bulan, pipilion an nagkapirang lalaki tanganing maglibot sa bilog na daga sa paghanap asin sa paglubong kan natada pang mga bangkay sa ibabaw kan daga, tanganing malinigan ninda ini.

¹⁵Sa paglibot ninda sa daga, kun makahiling sinda nin tolang nin tawo, bubugtakan ninda nin tanda an lugar, tanganing makua kan mga paralubong dangan ilulubong iyan sa Kapantayan nin Hamon-gog.

¹⁶(Magkakaigwa man nin sarong banwa sa harani kaiyan na an ngaran sosog sa ngaran kan hukbo.) Sa paaging ini, malilinigan giraray an daga.”

¹⁷Nagtaram sako an Kagurangnan Dios, “Aki nin tawo, apodon mo an gabos na klase nin gamgam saka hayop tanganing magdigdi hale sa gabos na direksyon, tanganing kakanon an sakripisyo na inaandam ko para sainda. Saro iyan na dakulang bangkete sa kabukidan nin Israel, saen makakan sinda nin laman asin mainom nin dugo.

¹⁸Kakakanon ninda an bangkay kan mga soldados saka iinomon ninda an dugo kan mga pamayo sa kinaban, na gabos magagadan siring sa mga lalaking karnero, mga kordero, kanding, asin pinatabang mga baka.

¹⁹Kun gadanon ko na an mga tawong ini siring sa mga dolot na sakripisyo, kakakanon kan mga gamgam saka mga hayop an taba na kaya nindang kakanon saka iinomon ninda an dugo sagkod na maburat sinda.

²⁰Sa sakuyang lamesa, kakakanon ninda an mga kabayo asin an mga lunad kaini, sagkod an mga soldados saka mga paralaban. Ako, an Kagurangnan Dios, an nagtaram.”

²¹Nagtaram an Kagurangnan, “Ipapahiling ko sa mga nasyon an sakuyang kamurawayan asin kun paano ko ginagamit an sakuyang kapangyarihan tanganing maotob an matanos kong mga paghukom.

²²Magpoon sa aldaw na iyan, maaaraman kan mga Israelita na ako an Kagurangnan na saindang Dios.

²³Maaaraman man kan mga nasyon na itinapok an mga Israelita huli kan mga kasalan na saindang ginibo tumang sako. Tinalikodan ko sinda asin itinao sa kamot kan saindang mga kaiwal, dangan ginadan sinda kaini sa gera.

²⁴Ginibo ko an maninigo sa sainda huli kan saindang pagkani-maati saka kasombikalan, asin tinalikodan ko sinda.”

²⁵Nagtaram an Kagurangnan Dios, “Alagad ngunyan maheherak ako sa kapagarakian ni Jacob, sa banwaan nin Israel, asin papauswagon ko giraray sinda. Iingatan ko an banal kong ngaran.

²⁶Kun toninong na giraray sindang nag-eerok sa sadiri nindang daga, asin mayo na nin magpatakot sa sainda, malilingawan ninda kun paano sinda nawaraan nin onra huli kan pagpasaluib ninda sako.

²⁷Tanganing mahiling kan dakul na nasyon na ako banal, iluluwas ko an sakong banwaan hale sa gabos na nasyon na pinag-eerokan kan saindang mga kaiwal.

²⁸Dangan maaaraman kan sakuyang banwaan na ako an Kagurangnan na saindang Dios, huli ta ako an nagpatapok sainda sa mga dayuhan na nasyon, asin ako an nagtipon saka nagpabalik sainda gabos sa sadiri nindang daga; mayo akong iwawalat maski saro sainda.

²⁹Iuula ko an sakong espiritu sa banwaan nin Israel asin dai ko na nanggad sinda tatalikodan. Ako, an Kagurangnan Dios, an nagtaram.”