Read Central Bicolano Ezekiel 4 Bible Online

Ezekiel 4 - Central Bicolano bible

Ezekiel 4

¹Nagtaram an Dios, “Aki nin tawo, kumua ka nin ladrilyo, ibugtak mo iyan sa atubangan mo dangan iukit mo diyan an sarong syudad, an syudad nin Jerusalem.

²Dangan, bilang pagladawan nin sarong pagsalakay, bugtakan mo nin mga trinsera asin tambakan mo nin daga an palibot kaiyan. Magpatindog ka nin mga kampo sa palibot kaiyan asin bugtakan mo nin mga trosong panrumpag nin kudal an palibot kaiyan.

³Kumua ka nin kawaleng lansang asin ibugtak mo iyan na garo kudal sa pagultanan mo asin kan syudad. Atubangon mo an syudad na garo sinasalakay an syudad, asin ika an nagsasalakay kaiyan. Ini an magigin tanda para sa nasyon nin Israel.

⁴“Dangan maghigda ka na nakatagilid sa wala, asin ibubugtak ko saimo an padusa kan nasyon nin Israel. Arog kaiyan an magigin kamugtakan mo asin magtitios ka huli kan saindang kasalan sa laog nin tres syentos nubentang aldaw, pareho kan bilang kan mga taon nin pagpadusa ko sainda.

⁶Pakatapos mo kaiyan, magtagilid ka sa too asin magtios ka para sa kasalan nin Juda sa laog nin kwarentang aldaw—sarong aldaw para sa lambang taon nin pagpadusa ko sainda.

⁷“Maanan mo an pagsalakay sa Jerusalem. Ibikyaw mo an gugom mong kamot sa direksyon kan syudad asin magpropesiya ka laban sa syudad.

⁸Gagaposon taka tanganing dai ka magparaturutagilid sagkod na dai pa natatapos an pagsalakay.

⁹“Kumua ka nin trigo, sebada, antak, lintehas, surgom, saka ispelta. Saralakon mo iyan gabos sa laog nin sarong lalagan, dangan maggibo ka nin tinapay. Iyan an kakakanon mo sa laog kan tres syentos nubentang aldaw na nakahigda ka na nakatagilid sa wala.

¹⁰Sagkod sana sa dos syentos treyntang gramo nin tinapay an saimong kakanon sa sarong aldaw.

¹¹Magkakaigwa ka man nin kadikit na tubig na saimong iinomon—duwang kalis sa sarong aldaw.

¹²Gamiton mo an odo nin tawo bilang igatong. Sa baga kaiyan, magluto ka nin tinapay, dangan kakanon mo iyan sa panhiling kan gabos na tawo.”

¹³Nagtaram an Kagurangnan, “Iyan an magigin pagkakan kan mga Israelita, pagkakan na ipinapangalad kan Katogonan, kun iwarak ko na sinda sa mga dayuhan na nasyon.”

¹⁴Alagad nagsimbag ako, “Kagurangnan Dios, dai ko pa lamang dinigtaan an sakong sadiri. Magpoon kan ako aki pa, dai pa lamang ako nagkakan nin karne nin hayop na nagadan sa natural na paagi o nin hayop na ginadan nin lalaw na hayop. Dai pa ako nagkakan nin anoman na ibinibilang na maati.”

¹⁵Kaya nagtaram an Dios, “Kun siring, tutugotan takang gamiton an odo nin baka, embes na odo nin tawo, sa pagluto mo nin tinapay.”

¹⁶Nagsabi pa siya, “Aki nin tawo, oontokon ko an pag-abot nin tinapay sa Jerusalem. An mga tawo duman mawawaraan nin paglaom asin mahahandal mantang sinusukol ninda an tinapay na saindang kakakanon asin an tubig na saindang iinomon.

¹⁷Gigibohon ko ini tanganing mawaraan sinda nin tinapay saka tubig; mawawaraan sinda nin paglaom asin magagadan sinda huli sa saindang mga kasalan.”