Read Central Bicolano Ezekiel 40 Bible Online

Ezekiel 40 - Central Bicolano bible

Ezekiel 40

¹Kan ikasampolong aldaw kan bagong taon, na iyo an ikabeynte y singkong taon nin samuyang pagkatapokan, asin ikakatorseng taon kan pagkasakop nin Jerusalem, namatean ko an mapangyaring presensya nin Kagurangnan.

²Sa sarong bisyon dinara ako nin Dios sa daga nin Israel, dangan ibinugtak sa sarong halangkaw na bukid. Sa atubangan ko, nahiling ko an sarong grupo nin mga edipisyo na arog sa sarong syudad.

³Irinani niya ako duman asin nahiling ko an sarong lalaki na nagkikintab arog sa bronse. Kapot niya an sarong lubid na lino saka sarong pansukol na bariw asin nakatindog siya sa may trangkahan.

⁴Sinabihan niya ako, “Aki nin tawo, maghinanyog ka asin maanan mo nin marahay an gabos na ipapahiling ko saimo, huli ta iyan an dahelan kun tadaw ta ipinag-iba taka digdi. Ipapahayag mo sa banwaan nin Israel an gabos mong mahihiling.”

⁵An nahiling ko iyo an Templo na napapalibotan nin kudal. Kinua kan lalaki an pansukol niyang bariw asin sinukol niya an kudal. Tolong metros an langkaw kan kudal saka tolong metros an hibog.

⁶Dangan nagduman siya sa trangkahan na atubang sa sirangan. Sinakat niya an hagdan asin sa itaas sinukol niya an laogan; tolong metros an rarom kaini.

⁷Sa enotan kan trangkahan na ini igwa nin sarong agihan na sa mag-ibong igwa nin tig-tolong kwarto para sa mga bantay. Kwadrado an lambang kwarto na tolong metros kwadrado an sukol, dangan duwa may kabangang metros an hibog kan lanob sa pagultanan kan mga ini. Sa enotan kan mga kwarto igwa nin agihan na minapasiring sa sarong dakulang kwarto na atubang sa Templo; tolong metros man an sukol kan agihan na ini.

⁸Sinukol niya an dakulang kwartong ini asin naaraman niya na apat na metros an rarom kaini. An kwartong ini iyo an kasagkoran kan agihan na pinakaharani sa Templo, asin sa harayong poro kaini, an kudal may hibog na sarong metro. (

⁹

¹⁰An mga kwarto para sa mga bantay igwa nin pararehong sukol; siring man an mga lanob sa pagultanan kan mga ini.)

¹¹Dangan sinukol kan lalaki an lakbang kan agihan sa trangkahan; anom may kabangang metros ini asin an bakanteng lugar sa pagultanan kan mga bukas na trangkahan may sukol na limang metros.

¹²Sa atubang kan lambang kwarto para sa mga bantay, igwa nin hababang kudal na singkwenta sentimetros an langkaw asin singkwenta sentimetros an hibog. (An lambang kwarto tolong metros kwadrado.)

¹³Sunod na sinukol niya an distansya magpoon sa likod na lanob kan sarong kwarto sagkod sa likod na lanob kan kwarto na nasa ibong kan agihan; dose may kabangang metros an sukol kaini.

¹⁴An pinakaporong kwarto iyo an kapinonan nin sarong patyo. Sinukol niya an kwarto asin naaraman niya na sampolong metros an lakbang kaini.

¹⁵An kahalabaan kan agihan magpoon sa kudal na nasa luwas kan trangkahan sagkod sa pinakaporong kwarto minaabot sa beynte y singko metros.

¹⁶Igwa nin saradit na mga labot an kudal na nasa luwas kan mga kwarto; siring man sa mga lanob na nasa pagultanan kan mga kwarto. May inukit na mga kahoy na palma sa lanob na atubang sa agihan.

¹⁷Ipinag-iba ako kan lalaki sa patyong nasa luwas. Igwa duman nin treyntang kwarto na an mga likod nakadukot sa kudal na nasa luwas, asin sa atubangan kan mga ini igwa nin sarong palitadang gapo,

¹⁸na minapalibot sa patyo. An patyong nasa luwas mas hababa ki sa patyong nasa laog.

¹⁹Igwa nin agihan sa parteng itaas na minapasiring sa patyong nasa laog. Sinukol kan lalaki an distansya sa pagultanan kan duwang agihan, asin igwa ini nin sukol na singkwenta metros.

²⁰Dangan sinukol kan lalaki an trangkahan sa parteng amihan na minapasiring sa patyong nasa luwas.

²¹An tolong kwarto para sa mga bantay sa mag-ibong kan agihan, an mga lanob sa pagultanan kan mga kwartong ini, asin an dakulang kwarto gabos igwa nin pararehong sukol na arog kan mga nasa trangkahan sa sirangan. An kahalabaan kan agihan minaabot sa beynte y singko metros, asin an kahalakbangan minaabot sa dose may kabangang metros.

²²An dakulang kwarto, an mga bintana asin an mga inukit na kahoy nin palma arog kan mga nasa trangkahan sa sirangan. Igwa digdi nin pitong tangga na minapaitaas pasiring sa trangkahan, asin an dakulang kwarto makukua sa poro, atubang sa patyo.

²³Sa ibong kan patyo hale sa trangkahan na ini sa amihan, igwa pa nin sarong trangkahan na minapasiring sa patyong nasa laog, siring na igwa man kaini sa parteng sirangan. Sinukol kan lalaki an distansya sa pagultanan kan duwang trangkahan asin an sukol minaabot sa singkwenta metros.

²⁴Dangan ipinag-iba ako kan lalaki sa parteng habagat, asin nahiling mi duman an saro pang trangkahan. Sinukol niya ini asin pareho man ini kan iba.

²⁵An mga kwarto kan trangkahan na ini igwa man nin mga bintana arog kan iba. An kahalabaan kan trangkahan igwa nin sukol na beynte y singko metros, asin an kahalakbangan igwa nin sukol na dose may kabangang metros.

²⁶Igwa nin pitong tanggang minaitaas pasiring sa trangkahan na ini, asin an dakulang kwarto kaini yaon man sa poro, atubang sa patyo. Igwa man nin inukit na mga kahoy na palma sa mga lanob na atubang sa agihan.

²⁷Igwa man digdi nin sarong trangkahan na minapasiring sa patyong nasa laog. Sinukol kan lalaki an distansya pasiring sa ikaduwang trangkahan, asin igwa ini nin sukol na singkwenta metros.

²⁸Dangan ipinag-iba ako kan lalaki sa patyong nasa laog, asin duman kami nag-agi sa trangkahan sa habagat. Sinukol niya an trangkahan sa habagat, asin pareho man an sukol kaini sa mga trangkahan sa kudal na nasa luwas.

²⁹An mga kwarto para sa mga bantay, an dakulang kwarto asin an mga lanob na nasa laog parareho man an sukol sa mga nasa ibang trangkahan. An mga kwarto kan trangkahan na ini igwa man nin mga bintana. An kahalabaan kan trangkahan minaabot sa beynte y singko metros, asin an kahalakbangan minaabot sa dose may kabangang metros.

³⁰

³¹An dakulang kwarto nakaatubang sa sarong patyo, asin igwa nin inukit na mga kahoy na palma sa mga lanob kan agihan. Igwa digdi nin walong tanggang minapaitaas pasiring sa trangkahan na ini.

³²Ipinag-iba ako kan lalaki sa patyong nasa laog, asin duman kami nag-agi sa trangkahan sa sirangan. Sinukol niya an trangkahan sa sirangan asin pareho man an sukol kaini kan sa iba.

³³An mga kwarto para sa mga bantay, an dakulang kwarto asin an mga lanob na nasa laog parareho man an sukol sa mga nasa ibang trangkahan. Igwa man ini nin mga bintana sa palibot; siring man sa dakulang kwarto. An kahalabaan kan trangkahan minaabot sa beynte y singko metros asin an kahalakbangan minaabot sa dose may kabangang metros.

³⁴An dakulang kwarto nakaatubang sa patyong nasa luwas, asin igwa nin inukit na mga kahoy na palma sa mga lanob kan agihan. Igwa digdi nin walong tanggang minapaitaas pasiring sa trangkahan na ini.

³⁵Dangan ipinag-iba ako kan lalaki sa trangkahan sa amihan. Sinukol niya ini asin pareho man an sukol kaini kan sa iba.

³⁶An mga kwarto para sa mga bantay, an dakulang kwarto asin an mga lanob na nasa laog parareho man an sukol sa mga nasa ibang trangkahan. An kahalabaan kan trangkahan minaabot sa beynte y singko metros, asin an kahalakbangan minaabot sa dose may kabangang metros.

³⁷An dakulang kwarto nakaatubang sa patyong nasa luwas, asin igwa nin inukit na mga kahoy na palma sa mga lanob kan agihan. Igwa digdi nin walong tanggang minapaitaas pasiring sa trangkahan na ini.

³⁸Sa patyong nasa luwas, igwa nin sarong edipisyong kasugpon kan trangkahan na nasa laog, sa parteng amihan. Agihan ini pasiring sa dakulang kwarto na atubang sa patyo, asin digdi hinuhugasan an binunong mga hayop na tututongon bilang sakripisyo.

³⁹Sa dakulang kwartong ini igwa nin apat na lamesa, duwa sa mag-ibong na gilid. Sa mga lamesang ini binubuno an mga hayop na idodolot bilang mga sakripisyo, na bilog na tututongon o na idodolot para sa kasalan o bilang kabayadan.

⁴⁰Sa luwas kan dakulang kwarto, igwa man nin apat na lamesa, duwa sa mag-ibong na gilid kan laogan kan trangkahan sa amihan.

⁴¹Walo gabos an lamesang binubunoan kan mga hayop na iaatang: apat sa laog kan kwarto asin apat sa patyo.

⁴²Igwa man nin apat na lamesa sa laog kan edipisyo. Ginagamit ini sa pag-andam kan mga atang na tututongon na bilog. An mga lamesang ini gabos tinabas na gapo, na an lambang saro may langkaw na singkwenta sentimetros asin an ibabaw kaini setenta y singko sentimetros kwadrado. Sa mga lamesang ini ibinubugtak an gabos na kagamitan sa pagbuno kan mga hayop na iaatang.

⁴³An moldora sa palibot kaini setenta y singko milimetros an lakbang. Sa mga lamesang ini ibinubugtak an gabos na karneng idodolot bilang sakripisyo.

⁴⁴Dangan ipinag-iba ako kan lalaki sa patyong nasa laog. Igwa digdi nin duwang kwarto: an saro atubang sa habagat, kataed kan trangkahan sa amihan, asin an saro atubang sa amihan, kataed kan trangkahan sa habagat.

⁴⁵Sinabihan ako kan lalaki na an kwartong atubang sa habagat iyo an para sa mga padi na naglilingkod sa Templo,

⁴⁶asin an kwartong atubang sa amihan iyo an para sa mga padi na naglilingkod sa altar. An gabos na padi naggikan ki Zadok; sa mga kaayon sa tribu ni Levi, sinda sana nanggad an tinutugotan na makarani sa Kagurangnan asin maglingkod saiya.

⁴⁷Sinukol kan lalaki an patyong nasa laog, asin singkwenta metros kwadrado an sukol kaini. An Templo yaon sa parteng solnopan, asin sa atubangan kan Templo igwa nin sarong altar.

⁴⁸Dangan ipinag-iba ako kan lalaki sa kwartong agihan palaog sa Templo. Sinukol niya an laogan kaini; duwang metros may kabanga an rarom kaini, asin pitong metros an lakbang. An mag-ibong na lanob kan agihan igwa nin hibog na sarong metro may kabanga.

⁴⁹Igwa nin mga tangga na minapaitaas pasiring sa agihan, na sampolong metros an lakbang asin anom na metros an rarom. Igwa nin duwang harigi na namumugtak sa mag-ibong na gilid kan laogan.