Read Central Bicolano Ezekiel 41 Bible Online

Ezekiel 41 - Central Bicolano bible

Ezekiel 41

¹Dangan ipinag-iba ako kan lalaki sa pinakatahaw na kwarto, an Banal na Lugar. Sinukol niya an agihan pasiring duman: tolong metros an rarom kaini

²asin limang metros an lakbang, na duwa may kabangang metros an hibog kan lanob sa mag-ibong. Sinukol niya an kwarto: beynte metros an laba kaini asin sampolong metros an lakbang.

³Dangan nagduman siya sa pinakalaog na kwarto. Sinukol niya an agihan pasiring duman: sarong metro an rarom kaini asin tolong metros an lakbang, na tolo may kabangang metros an hibog kan lanob sa mag-ibong.

⁴Sinukol niya an kwarto: dyes metros kwadrado ini. Dangan sinabihan niya ako, “An pinakalaog na kwartong ini iyo an Kabanal-banaleng Lugar.”

⁵Sinukol kan lalaki an hibog kan kudal na nasa laog kan edipisyong namumugtakan kan Templo, asin tolong metros an sukol kaini. Nakadukot sa kudal na ini, sa palibot kan Templo, an saradit na kwarto na duwang metros an lakbang.

⁶Tolong eskalon an mga kwartong ini, asin an lambang eskalon igwa nin treyntang kwarto. An kudal kan nasa itaas na eskalon mas manipis ki sa nasa ibabang eskalon, huli ta sa gilid kan kudal nakasandig an lambang eskalon.

⁷Kaya kun hihilingon sa luwas, garo parareho an hibog kan kudal kan Templo, magpoon sa ibaba sagkod sa itaas. Sa luwas kan mga kwartong ini, igwa nin duwang halakbang na hagdan na nakadukot sa kudal kan Templo, na iyo an mga hagdan na sakatan pasiring sa ikaduwa asin ikatolong eskalon.

⁸An kudal na nasa luwas kan mga kwartong ini may hibog na duwa may kabangang metros. Igwa nin sarong pintoan pasiring sa mga kwarto na nasa parteng amihan kan Templo, asin igwa man nin sarong pintoan pasiring sa mga kwartong nasa parteng habagat. Nahiling ko na igwang sarong balkonaheng duwa may kabangang metros an lakbang sa palibot kan Templo. Tolong metros an langkaw kaini sa daga, asin kapantay ini kan pundasyon kan mga kwartong nakadukot sa kudal kan Templo. Sa palibot kan Templo, sa pagultanan kan balkonahe asin kan edipisyong ginagamit kan mga padi, igwa nin sarong lugar na mayo nin atop, na sampolong metros an lakbang.

¹²Sa poro kan lugar na ini na mayong atop sa parteng solnopan kan Templo, igwa nin sarong edipisyo na kwarenta y singko metros an laba asin treynta y singko metros an lakbang; duwa may kabangang metros an hibog kan kudal na nakapalibot digdi.

¹³Sinukol kan lalaki an luwas kan Templo, asin singkwenta metros an laba kaini. Dangan singkwenta metros man an distansya magpoon sa likod kan Templo sagkod sa edipisyong nasa parteng solnopan.

¹⁴Singkwenta metros man an pagultanan magpoon sa atubangan kan Templo, kaiba na an lugar na mayong atop.

¹⁵Sinukol man niya an laba kan edipisyong ini na nasa parteng solnopan, kaiba an kudal sa mag-ibong na gilid: singkwenta metros man ini. An kwartong agihan palaog sa Templo, an Banal na Lugar, asin an Kabanal-banaleng Lugar

¹⁶nalalanoban nin kahoy magpoon sa salog sagkod sa mga bintana. An mga bintanang ini pwedeng serahan.

¹⁷An mga lanob sa laog kan Templo na kapantay kan mga pintoan, igwa nin mga inukit

¹⁸na mga kahoy na palma saka mga kerubin. An lambang kahoy na palma nakaukit sa pagultanan nin duwang kerubin, asin nakaukit ini sa palibot na lanob. An lambang kerubin igwa nin duwang lalawogon:

¹⁹an saro lalawogon nin tawo na nakaatubang sa sarong ibong kan kahoy na palma, asin an saro lalawogon nin leon na nakaatubang sa saro pang ibong. Arog kaini an ladawan na nasa palibot na lanob kan Templo,

²⁰magpoon sa salog sagkod sa itaas kan mga pintoan.

²¹Kwadrado an mga hamba kan mga pintoan kan Banal na Lugar. Sa atubangan kan laogan kan Kabanal-banaleng Lugar igwa nin sarong garo

²²altar na kahoy. Saro may kabangang metro an langkaw kaini asin sarong metro an lakbang. Kahoy an mga bitis kan altar, siring man an patugmadan saka an mga gilid. Nagtaram sako an lalaki, “Iyo ini an lamesa na nasa atubangan nin Kagurangnan.”

²³Sa poro kan agihan pasiring sa Banal na Lugar, igwa nin pintoan; siring man sa poro kan agihan pasiring sa Kabanal-banaleng Lugar.

²⁴An lambang pintoan igwa nin duwang dahon na minabuka saka minasera sa tahaw.

²⁵Igwa nin mga inukit na mga kahoy na palma saka mga kerubin sa mga pintoan kan Banal na Lugar, arog kan mga nasa lanob. Igwa nin kahoy na pantahob sa luwas kan pintoan kan kwartong agihan palaog sa kwarto.

²⁶Sa lambang gilid kan kwartong ini igwa nin mga bintana, asin an mga lanob nauukitan nin mga kahoy na palma.