Read Central Bicolano Ezekiel 42 Bible Online

Ezekiel 42 - Central Bicolano bible

Ezekiel 42

¹Dangan ipinag-iba ako kan lalaki sa patyong nasa luwas asin giniyahan ako pasiring sa sarong edipisyo na nasa parteng amihan kan Templo harani sa edipisyong nasa solnopan na kabtang kaini.

²An edipisyong ini igwa nin sukol na singkwenta metros an laba asin beynte y singko metros an lakbang.

³An sarong gilid kaini nakaatubang sa lugar na mayong atop, na sampolong metros an lakbang, asin an saro pang gilid nakaatubang sa palitada kan patyong nasa luwas. Tolong eskalon an edipisyong ini.

⁴Sa parteng amihan kan edipisyo, igwa nin agihan na limang metros an lakbang asin singkwenta metros an laba; an mga pintoan kaini nasa parteng amihan.

⁵An mga kwarto sa itaas na eskalon mas saradit ki sa mga yaon sa tahaw saka pinakaibabang mga eskalon.

⁶An mga kwarto sa tolong eskalon gabos nakapatugmad sa balkonahe, asin mayo nin mga harigi, bakong arog kan ibang mga edipisyong nasa patyo.

⁷Sa pinakaibabang eskalon, an kudal na nasa luwas kan edipisyo, solido sa lakbang na beynte y singko metros, kabanga kan kahalabaan kan edipisyo, asin sa natatadang beynte y singko metros igwa nin mga kwarto. Sa pinakaitaas na eskalon, igwa nin mga kwarto sa bilog na kahalabaan kan edipisyo.

⁹Sa ibaba kan mga kwartong ini, sa poro kan edipisyo sa parteng sirangan saen minapoon an kudal, igwa nin luwasan pasiring sa patyong nasa luwas. Sa parteng habagat kan Templo, igwa nin edipisyong arog man kan nasa solnopan na parte kan Templo.

¹¹Sa atubangan kan mga kwarto, igwa nin agihan na arog man kan nasa parteng amihan. Pareho man an sukol kaini, pareho an pakagibo kan mga pintoan asin pareho an mga laogan.

¹²Igwa nin sarong pintoan sa irarom kan mga kwarto sa parteng habagat kan edipisyo, sa sirangan na poro saen minapoon an kudal.

¹³Nagtaram sako an lalaki, “An duwang edipisyong ini parehong banal. Diyan nagkakakan kan pinakabanal na mga atang an mga padi na minarani sa Kagurangnan. Huli ta banal an mga kwarto, diyan ibubugtak kan mga padi an mga banal na atang: an dolot na pagkakan, an atang para sa kasalan asin an dolot bilang kabayadan.

¹⁴Kun nakalaog na an mga padi sa Templo dangan boot nindang magluwas pasiring sa patyong nasa luwas, kaipuhan iwalat ninda sa mga kwartong ini an banal na mga gubing na isinulot ninda mantang naglilingkod sa Kagurangnan. Kaipuhan magsulot sinda nin ibang gubing bago sinda magduman sa lugar na pinagtitiriponan kan mga tawo.”

¹⁵Kan tapos na an lalaki sa pagsukol kan sa laog na kabtang kan Templo, ipinag-iba niya ako sa luwas; nag-agi kami sa trangkahan sa sirangan dangan sinukol niya an luwas na kabtang kan mga edipisyong nakapalibot sa Templo.

¹⁶Kinua niya an pansukol dangan sinukol an kabtang sa sirangan: dos syentos singkwenta metros ini.

¹⁷Dangan sinukol niya an mga kabtang sa amihan, sa habagat saka sa solnopan: an lambang kabtang igwa nin parehong sukol na dos syentos singkwenta metros,

²⁰kaya an lugar na napapalibotan kan kudal sesenta y dos mil kinyentos metros kwadrado. An kudal iyo an minasiblag kan banal na lugar sa ordinaryong mga lugar.