Read Central Bicolano Ezekiel 43 Bible Online

Ezekiel 43 - Central Bicolano bible

Ezekiel 43

¹Ipinag-iba ako kan lalaki sa trangkahan na atubang sa sirangan.

²Dangan nahiling kong nagdadangadang hale sa sirangan an kamurawayan kan Dios nin Israel. An tingog nin Dios nakakaarog sa hagubohob kan dagat, asin an daga nagliwanag huli kan saiyang kamurawayan.

³An bisyon na ini arog man kan bisyon na nahiling ko kan maghilig an Dios sa pagraot kan Jerusalem, asin arog man kan nahiling ko sa tampi kan Salog nin Kebar. Dangan nagdapa ako sa daga.

⁴An kamurawayan nin Kagurangnan nag-agi sa trangkahan sa sirangan dangan naglaog sa Templo.

⁵Initaas ako kan espiritu nin Kagurangnan dangan dinara sa patyong nasa laog, saen nahiling kong napano an Templo kan kamurawayan nin Kagurangnan.

⁶Nagtindog sa kataed ko an lalaki, dangan nadangog kong nagtaram sako an Kagurangnan hale sa Templo,

⁷“Aki nin tawo, uya digdi an sakong trono. Mag-eerok ako digdi sa kaibahan kan banwaan nin Israel asin paghahadean ko sinda sagkod pa man. An sakong banal na ngaran dai na nanggad didigtaan kan mga Israelita asin kan saindang mga hade, sa paagi nin pagsamba sa ibang dios-dios o sa paglubong kan mga bangkay kan saindang mga hade sa lugar na ini.

⁸Itinugdok kan mga hade an pintoan kan saindang palasyo sa kataed kan pintoan kan sakong Templo, kaya saro sanang kudal an pagultanan nyamo. Dinigtaan ninda an banal kong ngaran sa paagi kan makauuyam na mga bagay na saindang ginibo, kaya sa sakong kaanggotan tinunaw ko sinda.

⁹Ngunyan kaipuhan ontokon na ninda an pagsamba sa ibang mga dios-dios asin haleon na ninda an mga bangkay kan saindang mga hade, dangan maerok ako sa kaibahan ninda sagkod pa man.”

¹⁰Nagsabi pa an Kagurangnan, “Aki nin tawo, iladawan mo sa mga Israelita an sakuyang Templo asin paadalan mo sainda an plano kaiyan, tanganing masopog sinda kan maraot nindang mga gibo.

¹¹Dangan kun nasosopog na sinda kan saindang mga ginibo, ipaliwanag mo sainda an plano kan Templo, an pakagibo kaiyan, an mga laogan saka mga luwasan, an bilog na porma kaiyan asin an gabos na pagboot saka mga togon manongod diyan. Isurat mo ini gabos para sainda, tanganing maotob ninda an sakong mga pagboot asin makuyog ninda an mga togon.

¹²Iyo ini an togon manongod sa Templo: An bilog na teritoryo sa palibot kaini sa alitoktok kan bukid sagrado asin banal.”

¹³Iyo ini an mga sukol kan altar, sosog sa parehong sukol na ginamit sa Templo. An patugmadan kan altar igwa nin sagurong na singkwenta sentimetros an rarom asin singkwenta sentimetros an lakbang. An palibot kaini igwa nin moldeng beynte y singko sentimetros an langkaw.

¹⁴An langkaw magpoon sa patugmadan sagkod sa enot na pasamano minaabot sa sarong metro, asin magpoon sa pasamanong ini paitaas, duwang metros an langkaw saka singkwenta sentimetros an lakbang sa palibot. An pinakaitaas na parte magpoon sa ikaduwang pasamano singkwenta sentimetros man an lakbang sa palibot.

¹⁵Ining pinakaitaas na parte kan altar na tinututongan kan mga dolot duwang metros an langkaw. An mga sungay na nasa apat na kanto kan altar mas halangkaw ki sa altar.

¹⁶Kwadrado an altar na igwa nin sukol na seis metros an laba asin seis metros an lakbang.

¹⁷Kwadrado man an kabtang na nasa tahaw: pitong metros an laba asin pitong metros an lakbang, na may sarong molde sa palibot na beynte y singko sentimetros an langkaw. (An sagurong kaini sa palibot may lakbang na singkwenta sentimetros.) An hagdan pasiring sa altar yaon sa parteng sirangan.

¹⁸Nagtaram sako an Kagurangnan Dios, “Aki nin tawo, dangoga an sasabihon ko saimo. Sa aldaw na ikatugdok na an altar, konsagrahon mo iyan sa paagi nin pagtutong nin mga atang asin pagwirik diyan nin dugo nin mga hayop na idodolot bilang mga sakripisyo.

¹⁹An mga padi na kaayon sa tribu ni Levi asin gikan sa pamilya ni Zadok iyo sana an madolok sako tanganing maglingkod. Ako, an Kagurangnan Dios, an nagboboot kaini. Tatawan mo sinda nin sarong torilyong baka na isasakripisyo bilang dolot para sa kasalan.

²⁰An ibang dugo kaiyan kuahon mo dangan ilahid sa apat na sungay kan altar, asin sa apat na kanto kan kabangaan na kabtang kan altar, dangan sa palibot na pasamano kaiyan. Sa paaging ini, malilinigan an altar asin makokonsagra.

²¹An torilyong baka na dolot para sa kasalan kuahon mo dangan tutongon sa talaan na lugar kan Templo, sa luwas kan banal na lugar.

²²Sunod na aldaw, magkua ka nin sarong lalaking kanding na mayo nin kaninan dangan isakripisyo mo bilang dolot para sa kasalan. Linigan mo an altar kan dugo kaiyan sa parehong paagi kan isakripisyo mo an torilyong baka.

²³Pakatapos mo kaiyan, magkua ka nin sarong torilyong baka asin sarong lalaking karnero na gabos mayo nin kaninan,

²⁴dangan darahon mo sako. Aasinan iyan kan mga padi dangan tututongon bilang sarong tinutong na atang para sako.

²⁵Aroaldaw, sa laog nin pitong aldaw, magdolot ka nin sarong kanding, sarong torilyong baka asin sarong karnero bilang dolot para sa kasalan. An gabos na iyan dapat mayo nin kaninan.

²⁶An altar lilinigan asin kokonsagrahon kan mga padi sa laog nin pitong aldaw.

²⁷Pakatapos kan pitong aldaw, popoonan kan mga padi an pagdolot kan mga tinutong na atang asin kan mga atang para sa katoninongan. Dangan mawiwilihan ko kamo gabos. Ako, an Kagurangnan Dios, an nagtaram.”