Read Central Bicolano Ezekiel 44 Bible Online

Ezekiel 44 - Central Bicolano bible

Ezekiel 44

¹Dangan ibinalik ako kan lalaki sa trangkahan na nasa luwas, sa parteng sirangan kan lugar na namumugtakan kan Templo; serado an trangkahan na ini.

²Dangan nagtaram sako an Kagurangnan, “An trangkahan na ini danay na magigin serado asin dai nanggad iyan bubukasan; mayo nin siisay man na pwedeng maglaog diyan. Dai iyan pwedeng gamiton nin siisay man, huli ta ako, an Kagurangnan Dios nin Israel, nag-agi diyan; kaya kaipuhan magdanay iyan na serado.

³Alagad an naghahadeng prinsipe pwedeng magduman tanganing magkakan nin tinapay sa presensya ko. Sa paglaog asin pagluwas niya, kaipuhan na sa kwartong agihan palaog siya mag-agi.”

⁴Dangan ipinag-iba ako kan lalaki sa atubangan kan Templo; sa trangkahan sa amihan kami nag-agi. Kan magmasid ako, nahiling kong napano an Templo kan kamurawayan nin Kagurangnan. Nagdapa ako sa daga.

⁵Nagtaram sako an Kagurangnan, “Aki nin tawo, tandaan mo nanggad an saimong nahihiling asin nadadangog. Itataram ko saimo an mga pagboot saka pagsusundon manongod sa Templo. Tandaan mo nanggad kun siisay an pwede asin dai pwedeng maglaog sa Templo.

⁶“Sabihan mo an rebeldeng banwaan nin Israel na ako, an Kagurangnan Dios, dai na nanggad matugot kan makauuyam na mga bagay na ginibo ninda.

⁷Dinigtaan ninda an sakong Templo huli ta an bakong sirkomsisyonadong mga dayuhan, mga tawong dai nagsusunod sako, tinugotan nindang maglaog diyan, mantang idinodolot sako an taba saka an dugo kan mga hayop na isinakripisyo. Kaya an sakong tipan linapas kan sakong banwaan huli kan makauuyam na mga bagay na ginibo ninda.

⁸Dai ninda inataman an banal na mga bagay sa sakong Templo, asin an mga dayuhan pa an saindang pinaataman kaiyan.

⁹“Ako, an Kagurangnan Dios, nagpapahayag na mayo nin siisay man na bakong sirkomsisyonadong dayuhan, mayo nin siisay man na dai nagsusunod sako, na makakalaog sa sakong Templo, maski na an mga dayuhan na nag-eerok sa kaibahan kan mga Israelita.”

¹⁰Nagtaram sako an Kagurangnan, “Papadusahan ko an mga Levita huli ta nagtalikod sinda sako asin nagsamba sa mga dios-dios, arog kan ibang mga Israelita.

¹¹Pwede sindang maglingkod sako sa Templo sa paagi nin pamamahala kan mga trangkahan asin nin paggibo kan mga trabaho sa laog kan Templo. Pwede sindang magbuno kan mga hayop na dolot kan mga tawo para sa tinutong na atang saka mga sakripisyo, asin sinda an maglilingkod sa tawo.

¹²Alagad huli ta sinda an namahala kan pagsamba kan mga Israelita sa mga dios-dios, asin sinda an nagdara sa mga tawo sa pagkakasala, ako, an Kagurangnan Dios, minasumpa na kaipuhan padusahan sinda.

¹³Dai sinda maglilingkod bilang mga padi ni makakarani sa arin man na bagay na banal para sako, ni makakalaog sa Kabanal-banaleng Lugar. Iyo ini an padusa para sa makauuyam na mga bagay na saindang ginibo.

¹⁴Gigibohon ko sana sindang mga katabang sa ibang mga trabaho sa Templo.”

¹⁵Nagtaram an Kagurangnan Dios, “Alagad an mga padi na kaayon sa tribu ni Levi asin gikan sa pamilya ni Zadok padagos na naglingkod sako kan an gabos na Israelita nagtalikod sako. Kaya ngunyan sinda an maglilingkod sako, asin madolok sa pagdolot kan taba saka dugo kan mga hayop na isinakripisyo.

¹⁶Sinda sana an makakalaog sa Templo, malingkod sa sakong altar asin mamamahala sa pagsamba na gigibohon sa Templo.

¹⁷Kun maglaog sinda sa trangkahan pasiring sa patyong nasa laog, masulot sinda nin mga gubing na lino. Kaipuhan dai sinda maggamit nin anoman na gibo sa lana kun naglilingkod sinda sa patyong nasa laog o sa Templo.

¹⁸Tanganing dai sinda pagganoton, turban na lino saka pantalon na lino an gagamiton ninda, alagad dai sinda maggamit nin hagkos.

¹⁹Bago sinda magduman sa patyong nasa luwas, sa pinagtitiripon kan mga tawo, kaipuhan hubaon ninda an mga gubing na sulot ninda kan maglingkod sinda sa Templo, dangan iwalat ninda an mga iyan sa banal na mga kwarto. Kaipuhan ibang gubing an isulot ninda tanganing an mga tawo dai maano kan banal na mga gubing.

²⁰“An mga padi kaipuhan dai mag-aris kan saindang buhok sa payo, ni magpahalaba kaiyan; puputolon ninda iyan sa tamang laba.

²¹Dai sinda dapat mag-inom nin anoman na arak bago magduman sa patyong nasa laog.

²²Dai sinda pwedeng mag-agom nin balo o nin babaeng sinuhayan nin agom. An pwede sana nindang agomon iyo an sarong birhen na Israelita o an balo nin kapwa padi.

²³“Itutukdo kan mga padi sa mga tawo an kalaenan kan anoman na banal sa bako, an kalaenan kan bagay na malinig sa maati.

²⁴Kun igwa nin kaso an mga namamanwaan, sinda an magigin hukom asin huhukoman ninda an kaso sosog sa sakong mga togon. Kaipuhan kuyogon ninda an sakong mga togon saka mga pagboot manongod sa sakong mga talaan na pyesta, asin pakabanalon ninda an mga Sabbath.

²⁵“Kaipuhan dai ninda pagdigtaan an saindang sadiri huli kan pagduta sa bangkay nin sarong tawo, pwera sana kun saindang ama o ina, aki o tugang na lalaki o tugang na babae na dai pang agom an gadan.

²⁶Pakatapos na malinigan niya giraray an nadigtaan niyang sadiri, kaipuhan maghalat siya nin pitong aldaw,

²⁷dangan magduman siya sa patyong nasa laog kan Templo asin magdolot nin atang para sa saiyang kasalan. Ako, an Kagurangnan Dios, an nagtaram.

²⁸“An mga padi dai magkakaigwa nin kahirasan sa daga na itinao ko sa Israel. Ako an saindang kahirasan. Dai sinda tatawan nin anoman na pagsadiri sa Israel. Ako an saindang pagsadiri.

²⁹An dolot na pagkakan, an dolot para sa kasalan, asin an dolot para sa kabayadan nin kasalan iyo an magigin kakanon kan mga padi, asin mapapasainda an gabos na idinolot sako nin Israel.

³⁰Mapapasainda an pinakamarahay kan gabos na enot na ani, asin kan gabos na idinolot sako. Sa lambang paggibo nin tinapay kan mga tawo, itatao ninda sa mga padi an enot na naluto bilang atang, tanganing mag-abot sa saindang mga harong an sakuyang bendisyon.

³¹An mga padi kaipuhan na dai magkakan nin anoman na gamgam o hayop na nagadan sa natural na paagi, o ginadan nin ibang hayop.”