Read Central Bicolano Ezekiel 45 Bible Online

Ezekiel 45 - Central Bicolano bible

Ezekiel 45

¹Kun bangaon na an daga dangan tawan na nin kahirasan an lambang tribu, sarong kabtang kaiyan an lalaenon para sa Kagurangnan. Ini an sukol kan kabtang na lalaenon: dose may kabangang kilometros an laba, asin sampolong kilometros an lakbang. Magigin banal an bilog na kabtang na iyan.

²Sa kahirasan na iyan, kaipuhan igwa nin kabtang na may sukol na sesenta y dos mil kinyentos metros kwadrado para sa Templo, asin sa palibot kaini sarong kabtang para sa patyo na may sukol na beynte y singko metros an lakbang.

³An kabanga kan kabtang na ini susukolon nindo para sa Templo, an pinakabanal na lugar sa gabos: dose may kabangang kilometros an laba asin limang kilometros an lakbang.

⁴Iyan an banal na kabtang kan daga, na linaen para sa mga padi na naglilingkod sa Kagurangnan sa saiyang Templo. Iyan an lugar para sa mga harong kan mga padi asin para sa Templo.

⁵An natatadang kabtang kan kahirasan na iyan iyo an magigin pagsadiri kan mga Levita, na nagtatrabaho sa Templo. Magkakaigwa diyan nin mga banwa na saindang eerokan.

⁶Kataed kan lugar na linaen bilang banal na kahirasan, lalaenon pa an sarong lote na dose may kabangang kilometros an laba asin duwa may kabangang kilometros an lakbang. Ini an lugar na pwedeng pag-erokan kan mga Israelita.

⁷Saro man na lote na kataed kan lugar na linaen bilang banal na kahirasan an lalaenon para sa prinsipe. An loteng ini mapoon sa pagdolonan sa solnopan kan dagang ini asin minasagkod sa Dagat nin Mediteraneo; dangan an pagdolonan sa sirangan masagkod sa Salog nin Jordan, kaya an laba kan loteng ini pareho kan laba nin sarong kahirasan na daga nin sarong tribu nin Israel.

⁸An loteng ini iyo an magigin kahirasan kan prinsipe nin Israel, tanganing dai na niya pag-apihon an mga tawo, kundi pababayaan na an ibang kabtang kan daga na masadirihan kan mga tribu nin Israel.

⁹Nagtaram an Kagurangnan Dios, “Nagkasala kamo sa haloy nang panahon, mga pamayo nin Israel! Ontoka nindo an kadahasan asin an pang-aapi. Giboha nindo an matanos asin tama. Dai na nanggad nindo pagpahaleon sa saindang daga an sakuyang banwaan. Ako, an Kagurangnan Dios, an nagtataram saindo kaini.

¹⁰“Maggamit kamo nin mga timbangan saka mga sukol na mayo nin daya:

¹¹“An takadan na efa asin an takadan na bat kaipuhan pareho an sukol, na dapat katimbang kan ikasampolong parte kan homer. An homer iyo an basihan na sukol.

¹²An takadan na siklo kaipuhan pareho sa beynteng gera. An limang siklo kaipuhan limang siklo mananggad, asin an sampolong siklo, sampolo mananggad. An sarong mina kaipuhan pareho sa sesentang siklo.

¹³Iyo ini an saindong idodolot: sarong ikaanom na kabtang kan efa sa lambang homer nin trigo asin sebada;

¹⁴sa sarong kor nin lana nin oliba, sarong ikasampolong kabtang nin sarong bat (an sarong kor, arog kan homer sa timbang nin sampolong takadan nin bat).

¹⁵Sa karnero, saro an idolot nindo sa lambang dos syentos. Ini an saindong mga dolot na pagkakan, mga tinutong na atang asin dolot para sa katoninongan, tanganing patawadon an saindong mga kasalan. Ako, an Kagurangnan Dios, an nagboboot kaini.

¹⁶“An gabos na tawo sa daga kaipuhan magtao kan mga dolot na ini sa prinsipe nin Israel.

¹⁷Katongdan kan prinsipe na pagtao kan mga hayop na tututongon, kan mga dolot na pagkakan, saka kan dolot na inomon para sa bilog na nasyon nin Israel sa mga Pyesta kan Bagong Bulan, sa mga Sabbath, asin sa iba pang talaan na mga pyesta. Siya an matao kan mga dolot para sa kasalan, mga dolot na pagkakan, mga tinutong na atang saka an mga atang para sa katoninongan, tanganing mabayadan an mga kasalan kan banwaan nin Israel.”

¹⁸Nagtaram an Kagurangnan Dios, “Sa enot na aldaw kan enot na bulan, makua kamo nin sarong torilyong baka na mayo nin kaninan, tanganing linigan an Templo.

¹⁹An ibang dugo kan dolot na ini para sa kasalan kukuahon kan padi dangan ilalahid sa mga hamba kan pintoan kan Templo, sa apat na sungay kan altar, saka sa mga harigi kan trangkahan kan patyong nasa laog.

²⁰Sa ikapitong aldaw kan bulan, ini man an gigibohon nindo para sa kiisay man na nagkasala na dai man tinutuyo o huli sa dai pakaaram. Sa paaging ini lilinigan nindo an Templo.

²¹“Sa ikakatorseng aldaw kan enot na bulan, poonan nindo an pagselebrar kan Pyesta nin Paskwa. Sa laog nin pitong aldaw, an lambang saro makakan nin tinapay na mayo nin lebadura.

²²Sa enot na aldaw kan pyesta, an prinsipe nin Israel madolot nin sarong torilyong baka bilang atang para sa saiyang mga kasalan asin para sa kasalan kan bilog na banwaan.

²³Aroaldaw, sa laog kan pitong aldaw kan pyesta, madolot siya nin pitong torilyong baka saka pitong karnero na gabos mayo nin kaninan, bilang mga tinutong na atang para sa Kagurangnan. Madolot man siya aroaldaw nin sarong lalaking kanding bilang dolot para sa kasalan.

²⁴Para sa lambang baka asin para sa lambang karnerong isasakripisyo, madolot siya nin dyes y syete may kabangang litrong dolot na pagkakan, dangan tolong litrong lana nin oliba.

²⁵“Para sa Pyesta nin mga Harong-harong, mapoon sa ikakinseng aldaw kan ikapitong bulan, an prinsipe nin Israel madolot man nin parehong mga dolot para sa kasalan, mga tinutong na atang asin mga dolot na pagkakan saka lana nin oliba sa laog kan pitong aldaw nin pyesta.”