Read Central Bicolano Ezekiel 46 Bible Online

Ezekiel 46 - Central Bicolano bible

Ezekiel 46

¹Ini an itinataram nin Kagurangnan Dios, “An trangkahan kan patyong nasa laog na atubang sa sirangan kaipuhan serado sa laog kan anom na aldaw nin pagtrabaho, alagad kaipuhan bukas iyan sa aldaw nin Sabbath asin sa Pyesta kan Bagong Bulan.

²Hale sa patyong nasa luwas, an prinsipe malaog sa dakulang kwarto sa may trangkahan, dangan matindog sa may harigi kan trangkahan, mantang an mga padi nagdodolot kan mga tinutong na atang saka mga atang para sa katoninongan. Duman siya sa may trangkahan masamba dangan maluwas; alagad an trangkahan dai seserahan sagkod magbanggi.

³Lambang Sabbath asin lambang Pyesta kan Bagong Bulan, an mga tawo kaipuhan magduko saka magsamba sa Kagurangnan sa atubangan kan trangkahan.

⁴Kun Sabbath, an prinsipe madara bilang atang sa Kagurangnan nin anom na kordero asin sarong karnero na gabos mayo nin kaninan.

⁵Kaiba kan lambang karnero madolot siya nin dyes y syete may kabangang litrong dolot na pagkakan dangan kaiba kan lambang kordero madolot siya kan ano man na boot niyang itao. Kaiba kan lambang dolot na pagkakan madara siya nin tolong litrong lana nin oliba.

⁶Kun Pyesta kan Bagong Bulan, madolot siya nin sarong torilyong baka, anom na kordero asin sarong lalaking karnero na gabos mayo nin kaninan.

⁷Kaiba kan lambang torilyong baka saka lalaking karnero, madolot siya nin dyes y syeteng litrong dolot na pagkakan asin kan anomam na boot niyang itao. Kaiba kan lambang dolot na pagkakan, siya matao man nin tolong litrong lana nin oliba.

⁸An prinsipe malaog saka maluwas sa parehong dakulang kwarto sa may trangkahan.

⁹“Kun an mga tawo magdolok sa pagsamba sa Kagurangnan sa mga talaan na pyesta, an mga naglalaog sa trangkahan sa amihan kaipuhan magluwas sa trangkahan sa habagat pakatapos nindang magsamba; an mga naglalaog sa trangkahan sa habagat kaipuhan magluwas sa trangkahan sa amihan. Mayo nin siisay man na maluwas sa trangkahan na inagihan niya paglaog.

¹⁰Paglaog kan mga tawo, malaog man kaiba ninda an prinsipe, dangan kun magruluwas na man an mga tawo maluwas man siya kaiba ninda.

¹¹Sa mga pyesta saka sa mga talaan na panahon, an dolot na pagkakan kaipuhan dyes y syete may kabangang litro an kaiba kan lambang torilyong baka o lalaking karnero; dangan kaiba kan lambang kordero madolot an masamba kan anoman na boot niyang itao. Tolong litrong lana nin oliba an kaiba kan lambang dolot na pagkakan.

¹²“Kun an prinsipe boot magtao nin boluntad na atang sa Kagurangnan, tinutong na atang man o dolot para sa katoninongan, bubukasan an trangkahan sa sirangan para saiya. Idodolot niya an tinutong na atang o an dolot para sa katoninongan sa parehong paagi kan pagdolot niya kun Sabbath. Dangan seserahan an trangkahan pakaluwas niya.”

¹³An Kagurangnan nagtataram, “Aga-aga, sarong kordero na sangtaon an edad na mayo nin kaninan an kaipuhan idolot bilang tinutong na atang para sa Kagurangnan. Kaipuhan gibohon ini aroaldaw.

¹⁴Kaiba kan atang na ini aga-aga, kaipuhan idolot man an duwang kilo nin arina saka sarong litrong lana nin oliba, na isasalak sa arina. An mga pagsusundon na ini kaipuhan na kuyogon sagkod lamang.

¹⁵An kordero, an arina, saka an lana nin oliba kaipuhan idolot aga-aga para sa Kagurangnan sagkod lamang.”

¹⁶Ini an ipinagboboot nin Kagurangnan Dios, “Kun iregalo kan prinsipe sa saro kan saiyang mga aking lalaki an arin man na kabtang kan daga na sadiri niya, an kabtang na iyan magigin sadiri kan aki; magigin kabtang iyan kan saiyang pamana.

¹⁷Alagad kun arin man na kabtang kan daga na sadiri kan prinsipe an iregalo niya sa saro kan saiyang mga sorogoon, masasadirihan giraray niya iyan sa Taon nin Katalingkasan. Sadiri iyan kan Prinsipe, asin siya sana saka an saiyang mga aking lalaki an makakasadiri kaiyan sagkod pa man.

¹⁸An prinsipe dai dapat magkua kan arin man na pagsadiri kan mga tawo. An arin man na daga na ipapamana niya sa saiyang mga aking lalaki kaipuhan gikan sa daga na sadiri niya, tanganing dai niya maapi an siisay man sa sakuyang banwaan sa paagi kan pagkua niya kan saindang daga.”

¹⁹Dangan ipinag-iba ako kan lalaki sa laogan kan mga kwartong atubang sa amihan, harani sa trangkahan na nasa parteng habagat kan patyong nasa laog. Iyo ini an banal na mga kwarto para sa mga padi. Itinukdo niya sako an sarong lugar na nasa parteng solnopan kan mga kwarto

²⁰dangan nagsabi, “Digdi lalabonan kan mga padi an karneng dolot bilang sakripisyo para sa kasalan asin bilang kabayadan na atang; diyan man lulutoon an dolot na pagkakan, tanganing an anoman na banal dai madara sa patyong nasa luwas dangan may maraot na mangyari sa mga tawo.”

²¹Dangan giniyahan niya ako pasiring sa patyong nasa luwas asin ipinahiling sako na sa lambang kanto kan patyo igwa nin sarong sadit na patyong beynte metros an laba saka kinse metros an lakbang.

²³An lambang sadit na patyo napapalibotan nin kudal; igwa ini nin lugar na paglulutoan na nakadukot sa gapong kudal.

²⁴Tinaraman ako kan lalaki, “Iyo ini an mga kusina. Digdi lalabonan kan mga sorogoon sa Templo an mga sakripisyong dolot kan mga tawo.”