Read Central Bicolano Ezekiel 47 Bible Online

Ezekiel 47 - Central Bicolano bible

Ezekiel 47

¹Dangan ibinalik ako kan lalaki sa laogan kan Templo. Igwa nin tubig na nagbubulos hale sa irarom kan laogan kan Templo pasiring sa sirangan, huli ta an Templo atubang sa sirangan. An tubig nagbubulos hale sa habagat na parte kan Templo asin sa parteng habagat man kan altar.

²Dangan giniyahan ako kan lalaki paluwas sa Templo. Sa trangkahan sa amihan kami nagluwas, dangan ilinibot niya ako pasiring sa trangkahan na atubang sa sirangan. Igwa nin sarong sadit na sapa na nagbubulos hale sa parteng habagat kan trangkahan.

³Dinakit mi an sapa pasiring sa sirangan; may dara siyang pansukol. Nagsukol siya nin kinyentos metros dangan nagdakit kami sa tubig. An rarom kan tubig sagkod sana sa buko-buko.

⁴Dangan nagsukol giraray siya nin kinyentos metros, asin an tubig abot na sa sakong tuhod. Nagsukol giraray siya nin kinyentos metros, asin an tubig abot na sa sakong habayan.

⁵Nagsukol pa siya nin kinyentos metros, asin hararom na nin marahay an tubig kaya dai ko na madakit. Tanganing makabalyo, kaipuhan nang maglangoy.

⁶Sinabihan niya ako, “Aki nin tawo, tandaan mo ini gabos.” Dangan naglakaw kami pabalik sa pangpang kan salog.

⁷Pag-abot ko duman, nahiling kong kadakul an mga kahoy sa mag-ibong na pangpang.

⁸Sinabihan niya ako, “An tubig na ini nagbubulos pasiring sa parteng sirangan kan daga, pasiring sa Kapantayan nin Jordan sagkod sa Gadan na Dagat. Pagbulos kaiyan sa Gadan na Dagat, malilinigan an tubig duman.

⁹Saen man magbulos an tubig kan sapa, mapasiring man diyan an gabos na klase nin hayop saka sira. Malilinigan kan tubig na ini an tubig sa Gadan na Dagat, asin saen man magbulos an tubig na ini, magdadara iyan nin buhay.

¹⁰Magpoon sa Mga Sapa nin Engedi sagkod sa Mga Sapa nin Eneglaim, igwa nin mga parasira na matirindog sa baybayon kan dagat, asin bibikladon ninda an saindang mga hikot. An mga sapang iyan magkakaigwa nin manlaen-laen na klase nin sira, siring kadakul kan mga sira sa Dagat nin Mediteraneo.

¹¹Alagad an tubig sa katiboan dai malilinigan; babayaan iyan sa siring na kamugtakan tanganing pagkuahan nin asin.

¹²Sa mag-ibong na pangpang kan sapa matalubo an gabos na klase nin kahoy tanganing magtao nin kakanon. Dai maaalang an mga dahon kaiyan asin dai iyan mawawaraan nin bunga. Mabunga iyan bulan-bulan, huli ta natutubigan iyan kan sapa na nagbubulos hale sa Templo. An saindang bunga magigin pagkakan asin saindang mga dahon gagamiton sa pagbolong.”

¹³An Kagurangnan Dios nagtaram, “Iyo ini an mga pagdolonan kan daga na babangaon para sa doseng tribu. An duwang kabtang kan daga na iyan itatao ki Jose.

¹⁴Nanuga ako sa saindong mga ginikanan na tatawan ko sinda kan daga na ini, dangan ini an saindong magigin pamana; kaya kaipuhan parareho an pagkabanga nindo kaiyan.

¹⁵“An pagdolonan sa amihan mapoon sa Dagat nin Mediteraneo, dangan mapasiring sa sirangan sagkod sa Syudad nin Hetlon, sa Agihan nin Hamat asin sa Syudad nin Zedad,

¹⁶sagkod sa mga syudad nin Berota saka Sibraim (na nasa pagultanan kan mga pagdolonan nin Damasco asin Hamat), dangan sagkod sa syudad nin Ticon (na harani sa pagdolonan kan distrito nin Hauran).

¹⁷Kaya an pagdolonan sa amihan mapoon sa Dagat nin Mediteraneo dangan mapasiring sa sirangan sagkod sa Syudad nin Enon, na nasa amihan na pagdolonan kan Damasco saka Hamat.

¹⁸“An pagdolonan sa sirangan mapoon sa pagultanan kan Damasco saka Hauran, dangan mapasiring sa habagat. An Salog nin Jordan iyo an magigin pagdolonan kan daga nin Israel sa parteng solnopan asin kan Gilead sa parteng sirangan, sagkod sa Tamar, sa Gadan na Dagat.

¹⁹“An pagdolonan sa habagat mapoon sa Tamar dangan mapasiring sa habagat-solnopan sa Meribat-Kades; dangan mapasiring sa amihan-solnopan, mamamaybay sa Sapa nin Egipto sagkod sa Dagat nin Mediteraneo.

²⁰“An pagdolonan sa solnopan mapoon sa Dagat nin Mediteraneo, dangan mapasiring sa amihan sagkod sa sarong lugar na atubang sa Agihan nin Hamat.

²¹“Barangaon nindo an dagang ini sa gabos nindong tribu.

²²Babangaon nindo an pamanang iyan para sa saindo asin para sa mga dayuhan na nag-eerok sa kaibahan nindo, mga dayuhan na nagkaigwa na nin mga aki mantang nag-eerok sa kaibahan nindo. Tatrataron nindo sinda bilang mga tunay na Israelita, asin hirasan nindo sinda kan pamanang daga kaiba kan mga tribu nin Israel.

²³An lambang dayuhan hihirasan nindo kan daga na hale sa kahirasan kan tribu na pinag-eerokan niya. Ako, an Kagurangnan Dios, an nagtaram.”