Read Central Bicolano Ezekiel 48 Bible Online

Ezekiel 48 - Central Bicolano bible

Ezekiel 48

¹Ini an pagbanga kan daga para sa lambang tribu: poon sa pagdolonan sa amihan, magpoon sa Dagat nin Mediteraneo sa may Hetlon sagkod sa Agihan nin Hamat asin sa Syudad nin Enon (na nasa pagultanan kan Damasco asin Hamat), magpoon sa sirangan sagkod sa solnopan iyo an kahirasan kan tribu ni Dan.

²Kadolonan kan daga ni Dan, magpoon sa sirangan sagkod sa solnopan iyo an kahirasan ni Aser.

³Kadolonan kan daga ni Aser, magpoon sa sirangan sagkod sa solnopan iyo an kahirasan ni Neftali.

⁴Kadolonan kan daga ni Neftali, magpoon sa sirangan sagkod sa solnopan iyo an kahirasan ni Manases.

⁵Kadolonan kan daga ni Manases, magpoon sa sirangan sagkod sa solnopan, iyo an kahirasan ni Efraim.

⁶Kadolonan kan daga ni Efraim, magpoon sa sirangan sagkod sa solnopan iyo an kahirasan ni Ruben.

⁷Kadolonan kan daga ni Ruben, magpoon sa sirangan sagkod sa solnopan iyo an kahirasan ni Juda.

⁸An kabtang kan daga na kadolonan kan daga ni Juda lalaenon para sa Kagurangnan. An kabtang na iyan kaipuhan kwadrado: dose may kabangang kilometros an lakbang poon sa amihan sagkod sa habagat, asin parehong laba, poon sa sirangan sagkod sa solnopan, siring kan kabtang na ipapanongod sa sarong tribu. Digdi itutugdok an Templo.

⁹Sa tahaw kan kabtang na ini, iyo an lalaenon nindo para sa Kagurangnan; an sukol kaiyan kaipuhan dose may kabangang kilometros an laba, asin sampolong kilometros an lakbang.

¹⁰An mga padi kaipuhan igwa man nin kahirasan sa banal na kabtang na ini. An sukol kan kahirasan ninda, poon sa sirangan pasiring sa solnopan, kaipuhan dose may kabangang kilometros an laba, asin poon sa amihan pasiring sa habagat, kaipuhan limang kilometros an lakbang. An Templo nin Kagurangnan ibubugtak sa tahaw kan kahirasan na ini.

¹¹An banal na lugar na ini para sa mga padi na kapagarakian ni Zadok. Maimbod sindang naglingkod sako, asin dai sinda naggibo nin maraot arog kan ibang mga Israelita saka arog kan ibang mga kaayon sa tribu ni Levi.

¹²Kaya magkakaigwa sinda nin nangongorog na kahirasan na kataed kan daga kan mga Levita, asin iyan an magigin pinakabanal sa gabos.

¹³An mga Levita magkakaigwa pa nin nangongorog na lugar, sa habagat kan daga kan mga padi. An sukol kaiyan kaipuhan dose may kabangang kilometros (magpoon sa sirangan sagkod sa solnopan) an laba asin limang kilometros an lakbang (magpoon sa amihan sagkod sa habagat).

¹⁴An lugar na linaen para sa Kagurangnan iyo an pinakamarahay na parte kan daga asin an arin man na kabtang kaiyan dai pwedeng ipabakal o ribayan o ibalyo sa kiisay man. Iyan banal saka pagsadiri nin Kagurangnan.

¹⁵An natatadang kabtang kan nangongorog na daga, na dose may kabangang kilometros an laba saka duwa may kabangang kilometros an lakbang, magagamit kan mga tawo para sa anoman na katuyohan. Pwede sindang mag-erok diyan asin pwede nindang gamiton an daga. Sa tahaw kaiyan ibubugtak an syudad,

¹⁶asin ini an magigin sukol kaiyan: iyan kwadrado na lambang lado may sukol na dos mil dos syentos singkwenta metros.

¹⁷Sa palibot kan syudad, kaipuhan igwa nin bakanteng lugar na syento beynte singko metros an lakbang.

¹⁸An kabtang kan daga na matatada pakatugdok kan syudad, an pinakaharaning kabtang sa habagat kan banal na lugar, asin may sukol na limang kilometrong laba saka duwa may kabangang kilometrong lakbang sa parteng sirangan, gagamiton bilang oma kan mga tawo na nag-eerok sa syudad.

¹⁹An siisay man na nag-eerok sa syudad, maski sa anong tribu siya maghale, pwedeng makaoma kan daga.

²⁰Kaya an kabilogan na sukol kan lugar na nasa tahaw kan kabtang na lalaenon kaipuhan dose may kabangang kilometros sa lambang lado, asin kaiba na diyan an lugar para sa syudad.

²¹Sa sirangan saka sa solnopan kan lugar na ini na namumugtakan kan Templo, an daga kan mga padi, an daga kan mga Levita, saka an lugar para sa syudad, iyo an matatadang daga na masasadirihan kan prinsipe. Sa sirangan, abot iyan sa pagdolonan sa sirangan; sa solnopan, abot iyan sa Dagat nin Mediteraneo; sa amihan, an pagdolonan iyo an daga na sadiri nin Juda; dangan sa habagat, an pagdolonan iyo an daga na sadiri ni Benjamin.

²³Ini an kahirasan kan ibang mga tribu: poon sa sirangan pasiring sa solnopan, sarong kabtang para ki Benjamin.

²⁴Kadolonan kan daga ni Benjamin, poon sa sirangan pasiring sa solnopan, sarong kabtang para ki Simeon.

²⁵Kadolonan kan daga ni Simeon, poon sa sirangan pasiring sa solnopan, sarong kabtang para ki Issakar.

²⁶Kadolonan kan daga ni Issakar, poon sa sirangan pasiring sa solnopan, sarong kabtang para ki Zabulon.

²⁷Kadolonan kan daga ni Zabulon, poon sa sirangan pasiring sa solnopan, sarong kabtang para ki Gad.

²⁸An pagdolonan sa habagat kan daga ni Gad mapoon sa Tamar asin masagkod sa Meribat-Kades mantang an pagdolonan sa habagat mapoon sa kasagkoran kan Egipto asin masagkod sa Dagat nin Mediteraneo.

²⁹Nagtaram an Kagurangnan Dios, “Iyan an pagbanga na gigibohon nindo sa daga para sa mga tribu nin Israel.”

³⁰Kaipuhan igwa nin doseng laogan pasiring sa syudad nin Jerusalem. An lambang saro sa apat na kudal kaiyan kaipuhan igwa nin sukol na dos mil dos syentos singkwenta metros, dangan igwa nin tolong trangkahan na ngangaranan sosog sa ngaran kan mga tribu. An mga trangkahan kan kudal sa amihan ngangaranan trangkahan ni Ruben, trangkahan ni Juda, asin trangkahan ni Levi. An mga nasa sirangan, ngangaranan trangkahan ni Jose, trangkahan ni Benjamin, saka trangkahan ni Dan. An mga nasa habagat ngangaranan trangkahan ni Simeon, trangkahan ni Issakar, asin trangkahan ni Zabulon. An mga nasa solnopan ngangaranan trangkahan ni Gad, trangkahan ni Aser, saka trangkahan ni Neftali.

³⁵An kahalabaan kan kudal sa apat na lado kan syudad kaipuhan nuebe mil metros. Poon ngunyan an ngaran kan syudad magigin “An Kagurangnan Uya Digdi!”