Read Central Bicolano Ezekiel 6 Bible Online

Ezekiel 6 - Central Bicolano bible

Ezekiel 6

¹Nagtaram sako an Kagurangnan,

²“Aki nin tawo, mag-atubang ka sa kabukidan nin Israel asin magpropesiya ka laban sainda.

³Sabihan mo an kabukidan nin Israel na magdangog sa tataramon kan Kagurangnan Dios—na magdangog sa tataramon ko, an Kagurangnan Dios, sa kabukidan asin kabubuldan, sa mga ampas saka mga kapantayan: Mapadara ako nin espada tanganing raoton an mga lugar na pinagsasambahan kan mga tawo nin mga dios-dios.

⁴An saindang mga altar rurumpagon ko asin an saindang mga altar nin insenso paparasaon ko. An gabos na tawo duman gagadanon ko sa atubang kan saindang mga dios-dios.

⁵Iwawarak ko an mga bangkay kan mga taga Israel; iwawarak ko an saindang mga tolang sa palibot kan saindang mga altar.

⁶An gabos na syudad nin Israel marurumpag, tanganing an gabos nindang altar saka mga dios-dios magkaroronot, an saindang mga altar nin insenso magkararaot asin mapapara an gabos nindang ginibo.

⁷An mga tawo gagadanon maski saen na lugar, asin an mga matatada magmimidbid na ako iyo an Kagurangnan.

⁸“Alagad tutugotan kong mabuhay an nagkapira sainda. An mga makakadulag iwawarak ko sa mga nasyon,

⁹saen mamumuhay sinda sa pagkatapokan. Duman ninda ako magigiromdoman asin maaaraman ninda na pinadusahan saka hinahalean ko sinda nin onra, huli ta tinalikodan ako kan saindang bakong maimbod na mga puso asin pinaorog ninda an mga dios-dios ki sa sako. Ikakaongis ninda an saindang sadiri huli sa mga karatan saka makauuyam na mga bagay na saindang ginibo.

¹⁰Maaaraman ninda na ako an Kagurangnan asin dai masusudya an mga patanid ko.”

¹¹Nagtaram an Kagurangnan Dios, “Gugoma an mga kamot mo! Iparagpadag mo an saimong mga bitis! Maghibi ka sa kamondoan huli kan gabos na maraot saka makauuyam na mga bagay na ginibo kan mga Israelita. Magagadan sinda sa gera o sa gutom o sa peste.

¹²An mga nasa harayo maghehelang dangan magagadan; an mga nasa harani magagadan sa gera; an matatada magagadan sa gutom. Mamamatean ninda an gabat kan sakuyang kaanggotan.

¹³An saindang mga bangkay magkakawararak sa palibot kan mga altar sa kaibahan kan mga dios-dios, magkakawararak sa lambang halangkaw na bulod, sa alitoktok kan lambang bukid, sa lindong nin lambang berdeng kahoy asin lambang madahon na hamurawon, sa lambang lugar na pinagdolotan ninda nin sakripisyo para sa saindang mga dios-dios. Dangan maaaraman ninda gabos na ako an Kagurangnan.

¹⁴Uunaton ko an sakong kamot laban sainda. An saindang daga raraoton ko asin gigibohon na mamondo, magpoon sa kalangtadan sa habagat sagkod sa syudad nin Ribla sa amihan; mayo akong papaligtason sa arin man na lugar na pinag-eerokan kan mga Israelita. Dangan maaaraman kan gabos na ako an Kagurangnan.”